Lewitikas 10 - Nobonob Baibel

Nadap, Abihu ele dilah hipunin

¹ Amu Aron bekoɗ aɗit, Nadap, Abihu ele aa kalu danab ile muttuɗig enanag bette elenu tappiɗ ahilah aoya, ottag aguppa meya, aa kalu danab ile muttuɗig enanag bette ele amu qaɗeppa tauɗ qedapiɗ. Ottag amu doɗ main Yawe mettaknu qaɗabppan iitta amunu, aa Yawe oɗe tippalpiɗ, aa Yawe oɗe ii dim lamidya, ottag laihnu aoya, Yawe haknunab nai aum amu tappaeh ne, ottag amuppa kalu danab ile muttuɗig enanag bette ele maipiɗ.

² Aa anam hepiɗ amunu, aab aɗu Yawe toppan na, aa ewate, aa Yawe noobppa mauhpiɗ.

³ Aria, Moses, Aron amegppa aum. “Yawe Nug anukka imunu inam aum. ‘Laa ag da gukkiɗna uɗitteb amu, ag da oppiaawak daattem doon, gumiɗna dokkulagoitte. Am danab ah oh, ag da binal okkai ele daattem doon oiglagoitte’ awa aum.” Moses nug anam a, Aron nug bakkum dayom.

⁴ Aakku Moses nug Misael, Elsapan ele onilahppa e uɗipiɗ. Aa amu Aron mameg nakok Usiel bekoɗ. Nug onilahppa e uɗieh, Moses aa amelahppa aum. “Aa uɗiya, lailti gaɗalti mettid haknu peh lag imu odppa, aben imuppan mawatya, haen tutu dayaknu aab kalak dimittim ukkeɗ!” awa aum.

⁵ Moses nug anam aum amunu, aa uɗiya, Moses nug aum bia, aa haen tutu dayaknu aab kalak dimittim mawatya gopiɗ. Mauhpiɗ ele beɗulahppan lamen nakok elab, lamen amu ii uɗatppig, anam dayeye, gaɗalti mawatna goppig.

⁶ Aakku Moses nug Aron, amu nug bekoɗ aɗit, Eleasar, Itamar ele amelagppa aum. “Ag mauhmananu, Yawe Nug Israel dilag tamaniak danab ah oh dilagnu oo nauhmanu, ag aib heppeg, ikkilag uɗug mauhnoak dayom, o iitta aib lamen ahilkad pattiɗadppig. Israel laala, amu na laipad ele ag amu, ag Nadap, Abihu ele dilah, Yawe Nug aab aɗuppa he nauhpiɗ ele, ag ahilahnu mahiglagnu nai iitta.

⁷ Laa oh ag amu mahiglag, amge Yawenu laittaknu goɗen ahilagppa daatte amunu, ag mauhmananu, ag aib mettid haknu peh lag danab ah appa qagmetteb ele, ag lag amunu od uuidna goppig,” awa aum. Anam amunu, ag Moses nug aum bia heppig.

Mana mettak danab dayaknu ulum nai

⁸ Aria, Yawe Nug Aron amegppa aum.

⁹ “Na, amu na buɗunadppa ele ag iinab wain, o le ɠagattag laa lawona, mettid haknu peh lag danab ah appa qagmetteb ele, ag lag amu ooppa nokkulagoitte. Ag anam lawona, mettid haknu peh lag ooppa ii nokkulag dayeb amu, ag ii mauhmana. Ɗo imu buɗub buɗub doobob, ahilagnu hanhan daakkunu daatte.

¹⁰ Ag keeke Kayaknu tituanak daatte, amu deɗ ohppan keeke hamunu ele anidna epeɗina dooglagoitte. Amuam, ag aɗi keeke am Kayaknu neekkakppa dubuttid ele, amu aɗi keeke Kayaknu neekkakppa am dubuttid iitta ele amu, ag amu anidna, epeɗina dooglagoitte.

¹¹ Amu ag da Yawe, da ɗo nai oh Moses mettami ele amu, ag Israel danab ah ippunadkkulagoitte,” awa aum.

¹² Amu Moses nug Aron, amu nug bekoɗ, Eleasar, Itamar ele, aa ii mauhpiɗ amu, nug ag amelagppa aum, “Danab ah ag Yawe mettaknu aab aɗunu ofa hena, ag ee aegnu ofa ele haen amuppa hetteb amu, ag mana mettak danab ag eppelag laippuppa plaua appua awa, ee aegnu ofa hak amunu plaua laa daatte, amu ahilagnu aweg! Ag plaua amu yis iitta ele manak ag aon, qaɗab guguittak daanna laig! Aɗinu? Keeke amuam Kayaknu tituanaknab daatte.

¹³ Amuam keeke Yawe mettaknu aab aɗunu ofa, amu mana mettak amunu maha laa am ahilagnu, aria ag buɗulkad ele, ahilagnu daatte amunu, ag aben Kayaknu tituanak daatte ele, ag amuppa daanna lakkulagoitte. Aɗinu? Da, ag anamnab hekkulagnunab nai anam aomi.

¹⁴ Amge, na, na bekkanad, aɗenad ele ag doɗ momo, baeg naɗiapnu tuɗi ele huma epponitta mettak ele amu, ag aben laappa, aben Kayaknu neekkakppa dubuttid iitta eleppa daanna lakkulagnu am elele. Doɗ maha amuam, Israel danab ah ag laippu dayaknu ofa hena, aon dokkulag ele amu, ag, amu ag bekkalkad, aɗelkad ele haen oh ahilagnu daakkunu mattami amunu, ag lakkulag.

¹⁵ Aab aɗunu ofa hetteb ele, ittag mana mettak amuppanu, aria doɗ momo, baeg naɗiapnu tuɗi huma, Nug mettak ele amu, mana mettak danab nug amu oh awa, nug huma epponitta mettaknu ofa hekkuoitte. Momo, tuɗi amu ele am ag, amu ag bekkalkad, aɗelkad ele haen oh ahilagnu daakku. Yawe Nug haknunab aum bia, ahilagnu hanhannu daakku,” awa aum.

¹⁶ Amu Moses nug ib etta hipunin haknu ofa haknu meeme dawai, nug amunu oɗ me amu, ag aab aɗuppa manappignu amegppa appig. Moses nug aeg doya, Aron bekoɗ daapiɗ ele, Eleasar, Itamar ele amu, nug amu dilahnu oo nauhom. Nug oɗ meum.

¹⁷ “Ib etta, hipunin haknu ofanu amu, mana mettak amuam Kayaknu tituanaknab daatte amunu, aɗinu ag mana mettak amunu doɗ teppu aben Kayaknu tituanak daatte ele imuppa ii daanna lappig? Yawe Nug ag mana mettak amu hekkulagnu aum. Mana mettak amuppa Nug he, danab ah ag beɗulagppa aab iitta daatteb. Yawe noobppa mana mettak amuppa ag danab ah dilagnu hipuninnu nob nau doɗ tiigppa iitta meeb elele medakkunu hetteb.

¹⁸ Am laa nug doɗ amu tiig awa, lag ooppa Oo Gun Eleppa ii noum amunu, da ag anam hekkulagnunab ami bia, ag doɗ teppu amu aben Kayaknu tituanak daatte imuppa lalob,” awa aum.

¹⁹ Moses nug anam a amu, Aron nug amegppa aum. “Gemu amu, da bekkalaɗ aa ahilah mana mettak aɗit oh, ib etta hipunin haknu ofa, amu manaknu ofa Yawe toppa hepiɗ. Aɗi keeke gemu dahilppa beum imu antte! Anam amunu, Yawe Nug da gemu ib etta hipunin haknu ofa hak imu teppu lappi, Nug amunu oo ena daakkute?” awa aum.

²⁰ Aria, Moses nug nai amu doyowa, nug aakku oo elele dayom.