Lewitikas 1 - Nobonob Baibel

Manaknu ofa haknu ippu

¹ Yawe Nug nuhig mettid haknu peh lag danab ah appa qagmetteb ele, Nug appa dayaya ewa, Moses amegppa aum.

² “Na Israel amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Haen ag oolagppa laa nug doɗ mana Yawe medatte amu, nug nuhig doɗ sipsip, o meeme, o makau oolagppanu laa awa, Yawe toppa wakkuoitte.

³ Am laa ⌊nug ofa mameg,⌋ nug manaknu ofa hekkunu haaha, nug makau awa dotte dayeb, Yawe Nug mana mettak amunu ena doya aokkunu amu, ofa mameg nug makau dawai laa beɗuppa eheɗ laa iitta ele awa doa, nug Yawe gumitta ukka, mettid haknu peh lag danab ah appa qagmetteb ele, nug lag amu odppa, Yawe medakkuoitte.

⁴ Nug amu hewowa, nug eppeg doɗ makau dawai igippa meeb, Yawe Nug doɗ amunu, am danab amu ou daatte antta aokku. Yawe Nug antteb, haen mana mettak danab nug doɗ amuppa mana mettak hette amu, danab amunu eheɗ haknu nob nau doɗ amu tiigppa iitta meeb elele medakku.

⁵ Nug eppeg makau gaiɗ igippa mewowa, nug appa Yawe noobppa makau baag otaɗkkuoitte. Nug amu ha maleb, Aron bekkod, ag am mana mettak danab, ag geha tiig aon, Yawe mettanna, ag mettid haknu peh lag danab ah appa qagmetteb ele, ag lag amu odppa qaɗab daatte, ag qaɗab gigin waɗele ohppa tauɗ qettaglag.

⁶ Amu ofa mameg nug doɗ gaɗa tola, teppu tuqeb, huppu huppu nekku.

⁷ Mana mettak danab Aron bekkod ag, ag aab ottag qaɗabppa daatteb akkan, aben laippuppa qagmena, amuppa aab bau qaɗabppa atognona mekkulag.

⁸ Aron bekkod, ag mana mettak danab, ag geha doɗ teppu huppu huppu, ikki amu ittag ele diina, ag qaɗabppa atognona, aab eotte qaɗeppa mekkulag.

⁹ Amge ofa mameg nug tatam ooppan keeke, gamag, uɗuag, biig keeke, amu baekkud ele, amuam tatam leppa ihakkuoitte. Amu malak amu, mana mettak danab ag doɗ kunum oh aakku qaɗabppa manan, Yawe mettaglag. Mana mettak amuam manaknu ofa; am aab aɗunu ofa aakku. Mana mettak amunu muttuɗignu, Yawe Nug ooppa ena dootte.

¹⁰ Am laa nug manaknu ofa hekkunu haaha, nug doɗ aɗppanu sipsipte, o meemete laa awa dotte amu, nug sipsip dawai laa, o meeme dawai laa, beɗuppa eheɗ laa iitta ele awa dokkuoitte.

¹¹ Amu nug Yawe noobppa, qaɗab heqoppa, laih yawalti uɗitteppanu, nug appa, nug doɗ baag otaɗkkuoitte. Aron bekkod, ag mana mettak danab, ag tiig aon, qaɗab gigin waɗele ohppa tauɗ qettaglagoitte.

¹² Amu ofa mameg nug doɗ tuqeb, huppu huppu neeb, amu mana mettak danab nug mana mettaknu huppu huppu amu, ikki, ittag ele am diia, nug qaɗabppa atognoa, aab eotte qaɗeppa mekkuoitte.

¹³ Amge ofa mameg nug tatam ooppan keeke, gamag, uɗuag, biig keeke, amu baekkud ele oh amu, nug leppa ihakkuoitte. Amu malak amu, mana mettak danab nug doɗ kunum oh awa, aakku qaɗabppa mana, Yawe medakku. Mana mettak amuam manaknu ofa; am aab aɗunu ofa aakku. Mana mettak amunu muttuɗignu, Yawe Nug ooppa ena dootte.

¹⁴ Am laa nug manaknu ofa hekkunu haaha, nug ai awa doa, Yawe mettaknu hekku dayeb amu, nug uppuɗil beɗulag nakok, o uppuɗil beɗulag okkai nag awa dokku oitte!

¹⁵ Mana mettak danab nug ai amu awa, qaɗabppa wana, baag itoɗieb mauheb, ikki pakkua, qaɗabppa meeb eokku. Nug heeb, tiig amu madmad qaɗab daugppa nekkuoitte

¹⁶ Mana mettak danab nug baagppan eeqao awa, amu ai uɗig ele leppeb neeb, qaɗabppa laih kaɗag uɗitteppan, appa akkeb ona, uhuɗppa daakkuoitte.

¹⁷ Anam hewowa, nug haug laih laih aɗalata taietteb, ai beɗu pana otaleb, anamib dayaɗ! Anam hewowa, nug qaɗabppa aab attan meeb eokku. Mana mettak amuam manaknu ofa; am aab aɗunu ofa aakku. Mana mettak amunu muttuɗignu, Yawe Nug ooppa ena dootte.