Kolosi 4 - Nobonob Baibel

¹ Gumak danab ag ele ahilag Naɗi, Nug hab aabppa daatte amu, ag Nug waappa daatteb amunu, ag amu dabmenana, ag begbeg maɗi nid ahilkad dilagppa kobol ena tutukkuib heig!

Ɠagattag unuqittak kobol amu tutukku oiyak kobol ele

² Amu ag oh ag Kolosi daatteb amu, ag unuqittak hekkulagnu oolag mettan, ag unuqidnana, ag hamu aib heppig. Iitta. Ag dabmak ele unuqidkkulag, amu ag anam henana, ag Kayak amegppa, “Ena hen mekkame,” ele aon aig!

³ Ag ihinignu ele, ig Kayaknu dabmak Kristusnu, tatam lokkumak dayom, ig nai amu mehuqkkunignu amu, ag Kayak Nug ib babaitta megakkunu unuqitteg! Da nai amu mehuqaknu amu, da maniguittakppa daattem.

⁴ Da Kristusnu nai miagib mehuqkkulnu amu, ag amunu ele unuqitteg! Aɗinu? Kayak Nug uɗat amu da hekkulnu meɗom.

⁵ Danab ag Nai Enanu oolagppa genab ii dootteb ele, ag Kolosi danab ag danab amu oolagppa oinna, ag akka ahilag oiyaknu dabmena autna aonna, ag uɗat ena hekkulagnu laa dayeb anidna, ag aib uuppig. Ag haen aguppanab heig!

⁶ Ag nai mattinna, ag hanhan oo bodoettak kobol dim lamidna, ag danab oh dilag oɗmak oolagppa daatte nob mekkulagnu elele daaglagnu, ag dabmak tutukku tatam aowona, nai mattieg!

Pol Kolosi tamaniak dilag humittak nai me ukkom

⁷ Ig lainignab Tikikus, nug geha da attem daattem imu ohnu mattieb, ag dooglag. Nug am ig ele uɗat laippu, amu nug Naɗinu maɗi nid nug uɗat nuhig oo metta ii uuak kobolppa hette.

⁸ Nug ukka, ag amelagppa ab, ag ig attem daattem dooglagnu, nug ag oolag ɠagattag qedakkunu ele, diig aɗit amunu amu da mei gotte.

⁹ Amu da hei, Onesimus Tikikus ele oh gottep. Onesimus nug ele am ig lainignab, nug ele am Naɗinu maɗi nid nug uɗat nuhig oo metta ii uuak kobolppa hette, amu nug am ag ele aab laippuppanu. Danab aɗit amu aa geha aɗi keeke oh ippa ihinignu bette ele amu, aa amunu mattiglah.

¹⁰ Aristarkus, nug da ele oh maniguittakppa daattep, amu Mak ele aa ag humadttep. Mak, Barnabas ele aa tiilah laippu, amu ag Maknu nai aoppig. Nug ag gumatta ukka dayeb, ag nug ele laippu dayaknu oolagppa eleleib doyeg!

¹¹ Josua, onig laa Jastus, nug ele ag humadtte. Juda danab oolagppanu danab ewam amu aakkuib ag Rom ippa da ele Kayaknu ɗo maɗoɗnu uɗat laippu hettem. Ahilagppa da oo mak aottem.

¹² Epapras, ahilag nid laa, Kristus Jesusnu maɗi nid, nug ele ag humadtte. Haen oh nug nuhig unuqittak ɠagattagppa nug ag ehanattatta, Nug Kayak heeb, ag Kayaknu dabmaknab awak pehettan doon, anamib ɠagattag daanna, danab kalulag ele daanna, ag dabmak aɗit ele iitta daaglagnu unuqidtte.

¹³ Nug ag Kolosi daatteb, amu Laodisia danab ah, amu Hierapolis daatteb ele, ahilagnu unuqittakppa ehanattak uɗat okkainab hette amu, da amu doyeye madikkulnu elele.

¹⁴ Luk, ig lainignab, nug dokta, nug Demas ele aa ele ag humadttep.

¹⁵ Amu ag dahil humittak ig lainkad laa Laodisia daatteb ele amu ag matteg! Laa ele, ag dahil humittak Nimpa, amu Kristen tamaniak nug laugppa qagmetteb ele, ag matteg!

¹⁶ Ag uɗug imu ebqewona amu, ag meppeg ukkeb, Laodisia Kristen tamaniak ele ebqeig! Aria uɗug Laodisia dilag yaami amu ag Kolosi daatteb amu, ag amu ele ebqeig!

¹⁷ Aria ag Arkipus amegppa, “Na uɗat Naɗi eppegppanu aome amu, na uɗat amu heppe gogppa taɗ!” aon appeg doyaɗ!

¹⁸ Da Pol, da dakka da eppelppa humattak nai uɗug imuppa iikku yaattem. Da maniguittakppa daattem amunu, Kayak dahilnu unuqidkkulagnu aib daulag atiom. Kayaknu ehanittak okkai hamu mettak ahilagppa dayaɗ!