Kolosi 3 - Nobonob Baibel

Oppiaawak dayaknu ippu

¹ Kayak Nug he, ag Kristus ele oh eɗun hippaidppig amunu, ag keeke attannu, aben amuppa Kristus Nug Kayak eppeg naɗiap-ppa heɗep na daatte amu, ag keeke amuib aoglagnu dabmenana oiyeg!

² Ag hanhan keeke attan amunuib dabmak aweg! Wanppanu keeke amu, ag amunu dabmak aib aoppig.

³ Aɗinu? Ag oolagppa genab dooppig, haen amuppa ag wan imuppan oiyak nau am uuna, gemu ag Kristusnu uɗatppa bauklel aoeg, Kristus Nug bauklel amu atognoowo, Kristus, ag ele, ag oh Kayak ouqak daatteb.

⁴ Amu Kristus, Nug am ihinig bauklel diig, haen Nug miag atikku amu, ag ele miag atippeg, Nug binag amahlak oppiaawak ele daatte, ag Nug ele binag amahlak oppiaawak amu ele daaglag.

⁵ Amunu ag wan imunu kobol, kobol amu ag oolagppa uɗat henana daatteb ele amu, ag kobol amu oh aqappeg iitta meig! Amu da kobol imunu attem; gappai kobol, kobol dubuttid ele, kobol naunu oo ahe ittag doyak, amu baubau awaknu hik qak kobol, amuam kayak hambuppuak binag mak kobol laa aakku, kobol amu ele.

⁶ Danab ag kobol amu dim lamidnana, Kayak oɗe ii dim lamidtteb ele amu, diig amunu Kayaknu oppoɗi bak am ahilagppa nette.

⁷ Anukka ag Kolosi danab ag ele danab amunu oolagppa nona oinna amu, ag kobol amu hedappig,

⁸ amge ag Jesus ele bau hippaidppig, ag kobol amu oh uuppig amunu, ag gemu oo nauhak kobol, oppoɗi be ameg kokoɗ eppak kobol, oo aeg bak kobol, baeg qak kobol, amu nai nau mattiak kobol ele, ag kobol amu oh ele agappeg ukkeg!

⁹ Amu ag lailkad aib buppualadppig. Aɗinu? Ag oolag alagnu kobol oh am uuna,

¹⁰ ag danab bau beppig daatteb. Amu Kayak Nug danab bau amu heum. Amu Nug ag hanhan doyak madatta he, ag bau bena, Nug biaib daatteb.

¹¹ Amunu kobol bau amuppa laa nug Juda danab, o Grik danab, o gaɗa otaɗak, o gaɗa ii otaɗak, o Rom danab, o Skitia danab, o begbeg maɗi nid, o begbeg maɗi nid iitta daatte, amu oh am keeke hamu; huu anen anen dayak amubia ii daatte. Iitta. Kristus Nug nukka ag ikkilag daatte, amu Kristus Nug nukka nuhikkud danab iɗu iɗu ohnu oolagppa noum daatte.

¹² Amu ag am Kayaknu danab, Nug ahilagnu oo mauhe, ag tituanattom daatteb amunu, ag kobol imu dim lamitteg! Ag laa dilagnu oo bodoetta le meeb, ahilagnu oo bodoettak kobol dim lamidna, ag akka ag onilag qeppeg neeb, ag lailkad dilagppa oo bodoetta wagai ii mak kobol dim lamidna, ahilagnu ele oo maɗoɗ kobol heig!

¹³ Ag nug oo makppa daanna, amu ag oolagppa lailag laa nug layagnu eheɗ ha ⌊oo eɗueb, nug eɗua layag uhuqa medakkunu oɗ metteb amu⌋ layag amu nug eheɗ hak amu, Naɗi Nug ihinig eheɗ hak oh uhuqa mekkom, amubia nug uhuqa mettaɗ!

¹⁴ Oo mauhak kobol nug kobol ena laa oh laippunab tamanidtte amunu, ag ele laa dilagnu oolag mauhaɗ!

¹⁵ Kayak Nug ag tamaniak laippu maɗoɗ ele daaglagnu ag onilagppa eum amunu, Kristusnu maɗoɗ, Nug ig megatte ele, maɗoɗ amu nug hanhan ag oolag gumebeb oiyeg! Amu ag hanhan Kayak amegppa, “Ena hen megattem,” aon aig!

¹⁶ Kristusnu nai enanag meu ele ag oolagppa daakkuoitte! Ag akka akka doyak dabmak ena eleppa nug ippunidnana, nug ehanittak ele heig! Ag oolagppa Kayak amegppa, “Ena hen mekkame” anana, ag sam, mettidnu ahi, amu Kayak binag maknu ahi ele etteg!

¹⁷ Ag nai madittebtai, o iitta ag uɗat hettebtai, o iitta ag aɗi keeke hetteb amu, ag Jesus onigppa Mame Kayak amegppa, “Ena heme,” anana, ag keeke amu oh Naɗi Jesus onigppaib heig!

Ewau amu nid naunau ele, ag attem daaglag

¹⁸ Amu ah ag Naɗi Nug oo niitte, amubia ag gamulkad waalagppa dayeg!

¹⁹ Amu ah gamulkad ag, ag waalkad dilag oolag mauhaɗ! Ag aib ɠagattag hadappig.

²⁰ Amu nid naunau ag keeke ohppa ag anilkad mamelkad oɗelag dim lamitteg! Aɗinu? Naɗi Nug kobol anamnu ooppa ena dootte.

²¹ Amu nid naunau mamelkad, ag nid ahilkad ag kobol ena dim lamidkkulagnu, bahi yaak doomnanu amu, ag tolittak tutukkuib matteg!

Begbeg maɗi nid, gumak danab ele dilag nai

²² Begbeg maɗi nid ag ahilkad wan imuppanu okkai, keeke ohnu waalagppa dayeg! Ag okkai ahilkad amelagppaib ag oolag ittag aqakkunuib aib heppig. Ag oolag aɗitppa uɗat aib heppig. Iitta! Ag Kayaknu ebehilag oh bodoetta le meeb, ag uɗat tutukkuppaib heig!

²³ Keeke oh ag hetteb amu, ag hekkulagnu ag oolag mettan heig! Amu ag, “Ig danabnu uɗat hettem,” doonna aib heppig. Iitta. Ag, “Ig Naɗinu uɗat hettem,” doonna heig!

²⁴ Aɗinu? Ag dootteb, butti aɗi Naɗi Nug nob ena, Nug danab ah nuhikkud, ahilagnu matu babaittom daatte ele amu, Nug ag madakku. Ag am Kristusnu maɗi nid, Nug am ahilag Naɗi daatte.

²⁵ Amu danab nug eheɗ heum, nug geha eheɗ heumnu nob eheɗ aokku. Amu Kayak Nug danab oh melemel laippuppaib epeɗiadkku.