Kolosi 2 - Nobonob Baibel

¹ Da ag Kolosi danab, Laodisia danab, amu danab oh da iɗul ii anidppig ele, da ag imu dooglagnu ool daatte. Da Kayak ag ehanadkkunu, da haen oh uɗat heɗiag ele hettem.

² Da ag Kolosi, laa da ii aniɗppig ele, ag diignu doyak tutukku oh en okkai bia aoglagnu, da ag oh oo ɠagattag qak aon, nug oo mauhak ele dooglagnu, da diig amunu uɗat anam hettem. Ag diignu doyak tutukku oh en okkai bia aoglagnu diig am, amuppa ag Kayaknu dabmak lokkumak dayom, amuam Kristus aakkuib dooglag.

³ Nuhigppaib doyak dabmak ena ele oh, amu doyak oh ele lokkuma daatte.

⁴ Amu da danab laa nug nuhig nai ittag ele amge meu iittappa ag eeɗadmanu dabmein, da ag amelagppa nai amu madittem.

⁵ Da ag ele oh ii daattem, amge da dahil dabmakppa amu da ag ele oh daattem bia doyeye, da ag uɗat ena tutukku hena, ag Kristusnu oolagppa genab ɠagattag dootteb ele amu, da amu oh anidttem amunu da enanagnab doottem.

Kristus ele ouqa, bau dayak awaknu nai

⁶ Ag Jesus Kristus, Nug amu ahilag Naɗi daakkunu ag oolag matulppig amunu ag tuɗidna, anamib Nug ele dayeg!

⁷ Ag nuhigppa ad wanppa ɠagattag hibaitta daatte bia ɠagattag dayeg! Ag nuhigppaib ɠagattag aweg! Ag Kayak amegppa, “Ena hen mekkame,” okkainab anana, laa ag ooppa genab doyaknu nai ippuanatteg, ag oolagppa genab dooppig, ag heppeg, ooppa genab doyak amu ɠagattag dayaɗ!

⁸ Ag danab laa nug ag ulah nai, nai meu iitta ele amelagppa mattia hambuppualatteb, nug waappa daamnanu dabmeig! Danab kobol amu hetteb ele amu, ag mattiak ahilagppa alai aɗi dilag kobolnu, amu wan imuppan ɗo ɠagattag iitta ele, ag amunu maditteb. Kristusnu amu ag ii maditteb.

⁹ Ag Kristen, ag amu dabmettaglagnu diig amu, Kayak Nug attemnab daatte, nuhigppa aɗi kobol keeke ambak daatte ele amu, amu oh Jesus Kristus nuhigppa aakku dayeye, Nug ele am danab daatte.

¹⁰ Nugib okkai ohnu, amu okkainab ohnu ele ikki daatte. Nuhigppaib amu Kayak Nug aɗi keeke madakkunu hette amu, am ahilagppa ambette.

¹¹ Ag Nug ele ouqeppig, amuppa amu ag gaɗa otaɗak kobolnab ag aakku aoppig. Keeke amuam gaɗanignu keeke iitta. Iitta. Ag Kristusnu ehanittakppa ag oolag alag, amuam beɗunu kobol, ag amu geɗidppig. Kristusnu kobol amuam gaɗa otaɗak kobol meunab daatte.

¹² Ag layattak aoppig, haen amuppa ag Kristus ele laippu ouqena daappig; ag Nug ele oh laippu moɗppa boumak daappig. Ele amu, ag layattak aoppig, haen amuppa ag ele Kayak Nug nuhig ɠagattagppa uɗat he, Jesus eɗua hibaittom oolagppa genab doyegeg, ag Kristus ele oh laippu eɗun hippaidppig daatteb.

¹³ Anukka amu ag hipunin digdig henan, ag oo alagnu kobol dim lamittegeg, kobol amu nug ag aqe mauhak bia daattappig. Amge Kayak Nug Kristus maɗette ahe, ag ele bau mattom. Nug ig oh hipunin hemut amu, Nug hipunin amu oh uhuqa mekkom.

¹⁴ Am ɗo nai yaak oh am ihinig ib oo ne dayom, amge Kayak Nug ib oo nak am loppaɗom. Ɗo nai nug am ig hettoɗikka hippalikkom, amge Kayak Nug ihinig aab amu awa, Jesus beɗuppa ma, Nug ad emaitakppa atula he, aab ihinig oh aakku iitta meum.

¹⁵ Nug Satannu daup laa ag gumak uɗat ɠagattag ele hetteb, amu laa ag gumak uɗak okkai ele hetteb amu, Nug ɠagattag ahilag aɗatta, ad emaitakppa Nug ag eɗattowa, nug danab amelagppa diia, keeke hamu bia hattom.

¹⁶ Kayak Nug anam heum amunu, ag uuppeg, danab laa nug nuhig dabmakppanu ee lanaknu, le lanaknu amu deɗ okkai mettidnu, kalam baunu mettidnu amu Sabatnu ele ɗo laala, ag dim lamidkkulagnu ii mema.

¹⁷ Keeke amu oh am keeke laanu itotog bia, am keeke amunab iitta. Amu Kristus Nug am amu oh eɗattak, Nug genabnab meunab aakku daatte.

¹⁸ Danab laa nug danab amelagppaib nug onig qe nette, amge ooppa nug nukka nuhignu, “Da am danab onil ele,” dootte, nug ele engel binalag mette amu, nug ag hambuppualatteb, ag nob ena Kayak madakkunu dabmette ele ii aomnanu ag danab amubia waappa aib daappig. Danab amubia amu nug tul niiakppa o ib attenppa aɗi keeke anttom ele amu, nug amunu nai kuɗum mattiaya, nuhig dabmak, Kayak Ouɗi Nug dabmak nuhig ii gumatte ele amu, nuhig dabmak amu he, danab amu nug nukka nuhignu am binag okkai ele dootte.

¹⁹ Danab amu nug Kristus ele ouqak ii daattep. Jesus Nug ig Kristen, ig ikkinig daatte. Ikki nug beɗu oh ɠagattag medatta he, beɗu nug diɗippa tuɗittak ouqak laippu dayaya, ena daatte. Beɗu nug am Kayaknu ɠagattagppa ba okkai mette.

²⁰ Ag am Kristus ele oh laippu mauhppig amunu, ag wan imuppan ɗo, ɠagattag iitta ele, ag ɗo amu uuppig dayeb, aɗinu gemu ag eɗun wan danab oitteb bia oitteb? Am aɗinu ag eɗun ɗo meu iitta amu waappa daatteb? Ɗo amuam inam.

²¹ “Na amu aib aɗame! Na amu aib lame! Na amu eppenppa aib lauɗidme!”

²² Keeke ag ig ii aɗamtanu, ii lamatanu, ii lauɗidmatanu atteb ele amu, keeke amu oh am dimppa iitta mekku. Ɗo amuam danab dabmakppanuib. Keeke genabnab iitta.

²³ Genab, ɗo meu iitta kuɗum, amuam ag mettid haknu atteb, ag ig ikka ig oninig qepput nekkunu atteb amu, ag ig beɗunig ele guittak mettagnignu atteb amu, ag neekkak hamuppa amu ena bia daatteb, amge anamnab iitta. Ig doottem, danabnu dabmakppanu ɗo laa nug ig ehanikkeb, beɗunu oo alag kobol, beɗunigppa eeɗigtte amu, ig ɗo amuppa qepput nokkunu elele iitta.