Kolosi 1 - Nobonob Baibel

Pol nug Kolosi dilagnu Kayak unuqittom

¹ Da Pol, da Kristus Jesusnu totol danab. Kayak Nug da Jesusnu totol danab daakkulnu da onilppa eum amu, da amu ig lainig Timoti ele,

² i uɗug imu ag danab ah Kolosi daatteb, i laintad, ag Kayaknu danab ah oppiaawak ele, ag Kristusnu daaglagnu oo metta ii uuak kobol dim lamidtteb, i ahilagnu yaattep. Ig Mamenig Kayak, nuhig ehanittak okkai hamu mettak, amu nuhig maɗoɗ ele ahilagppa daaglahnu oonih daatte.

^3-4 Ag Kristus Jesusnu oolagppa genab dooppignu nai, ag Kayaknu danab ah oppiaawak ele oh dilagnu oolag mauhttenu nai amu, i anam doyoɗa, unuqittak ihinihppa haen oh amu i ihinig Naɗi Jesus Kristus Mameg Kayak amegppa ahilagnu, “Ena heme,” aoɗ attep.

⁵ Ag tatam nai doyak diig genabibppanu, amuam Jesusnu Nai Ena, ag amu doon, keeke Kayak Nug hab attan ahilagnu tituanom amu, ag amu aoglagnu ele doona, gemu ag aoglagnu dabmak aɗan oitteb amunu, ag ooppa genab doyak ahilag, oo mauhak ahilag ele aɗan daatteb.

⁶ Nai Ena wan atu ohppa ukke, danab ag doonna heeg, naɗi ma amu kobol ena, doyak digdig ena ele danab kuɗum ag aakku aon hetteb. Anamib aakku ahilagppa digmeum, deɗ amuppa Nai Ena amu nug he, ag aon, ag Kayaknu ehanittak okkai hamu megatte ele diig genab doon, ag kobol ena, dabmak ena ele aɗan oitteb.

⁷ Epapras, i lainihnab, nug am Kristusnu maɗi nid ena, ihinih uɗat laippu, nug i ehanita, Kristusnu uɗat hekkunu oo metta ii uuak kobolppa hette ele amu, nug ag Jesusnu Nai Ena ippuanatte, ag dooppig.

⁸ Nug ag Kolosi danab ah, ag Kayaknu danab oh dilagnu oolag mauhtte, nug amunu i amenihppa a doomuɗ. Kobol amuam Kayak Ouɗi Nug ag mattom.

⁹ Deɗ i nai amu doomuɗ, deɗ amuppa i diig amunu Kayak ag ehanadkkunu digmeɗa unuqidɗaɗa daattep. I ahilagnu daunih ii atitte. I Kayak ag ehanatteb, ag nuhig dabmaknab awak attem daatte dooglagnu, Kayak Ouɗi Nug ag doyak dabmak ena ele, amu oo maittak ele oh ag matteb, ahilag dabmakppa daakkunu unuqidttep.

¹⁰ Anam dayeb amu, ag Naɗinu dabmak dim lamidkkulagnu, ag Nug oo niitte ohppa oiglagnu elele daanna, ad meu ena otte, amubia ag anen anen ag oinna, ag uɗat ena oh hekkulag, amu ag doyak Kayaknu tuɗidna aoglag.

¹¹ Ag Kolosi danab ag uug digdig maon ɠagattag, dagom ele daan bittumttum ii gomananu, ag anen anen ag Kayak eppegppa nuhig ɠagattag naɗi okkai aoglag. Anam amu, ag maɗoɗppan gamag ahak ele doonna,

¹² ag ig Mamenig amegppa, “Ena heme,” akkulag. Aɗinu? Nug he, ag keeke oh, Nug ag aoglagnu tituanom amu, ag amu aoglagnu elele daatteb. Ao, geha ag, amu Kayaknu danab ah oppiaawak ele laa ele, ig oh nuhig ɗo maɗoɗ, amahlak ele ooppa daattem amu, ig oh ele aognig.

¹³ Nug ig hipuninnu ɠagattag hippalikkakppanu uhuqikkom. Nug ig eɗua awikka, Nug Bekka Jesus, Nug nuhignu oo mauhtte amu, Nug nuhig ɗo maɗoɗ ooppa daagnignu meikkom.

¹⁴ Amu Nug tiigppa Nug ig hipuninnu qagaiettakppanu eɗua uhuqak ha mekka, ⌊amuppanu laih amu⌋ ig hipuninnu uhuqak aomut.

Kristusnu kobol, nuhig uɗat ele

¹⁵ Kayak Bekka Nug am Kayak, danab laa nug Nug anidkkunu elele iitta, Nug bianab aakku daatte. Nug am keeke oh Kayak he beum daatte, Nug amunu ikki anuqaknab daatte.

¹⁶ Ig amuam genab anidkkunignu diig am Kayak Bekka Jesus, Nug wan imuppan keeke, hab attannu keeke, keeke ig anidttem ii anidttem ele amu, amu oh Nug heum. Nug amu heum, amu keeke Nug heum ooppa amu, Nug gumak uɗat digdig ele daakkunu babaittom; laa am gumak uɗat anuqak, laa am gumak uɗat ɠagattag ele, laa am gumak uɗat okkainab, am laa am gumak uɗat okkai. Nug amu oh heum, babaittom ele, am amu oh am Nug binag mekkulagnu daatteb.

¹⁷ Nug keeke oh ii beppigppa dayom, amu keeke amu oh nuhig ɠagattagppa daatte.

¹⁸ Jesus Kristus Nug am Kristen tamaniak ikki daatte, amu Kristen tamaniak am Nug beɗu daatte. Kristen tamaniak diig amu Nugib aakku. Nug am danab anuqak moɗppan bau eɗua hibaittak danab. Nug anam daatte amunu, keeke oh ikki amu Nug aakku daatte.

¹⁹ Aɗinu? Kayak oo niiom bia Nug he, Kayak attemnab daatte, nuhigppa aɗi kobol keeke ambak daatte ele, amu oh amu anamib aakku Jesus nuhigppa anam dayom.

²⁰ Kayak Nug wanppan keeke oh, hab aabppanu keeke oh ele heeb, ag Nug ele oolag laippu daaglagnu oo dayom. Anam oo dayom amunu, Nug Kristus ad emaitakppa mauhehe, tiig gokkaɗe, Kristus tiigppa amu Nug nuhikkud kekeɗ oh amu ebehilag okkule, maɗoɗ daatte.

²¹ Anukka ag Kolosi danab ah ag dabmak eheɗ aon, kobol nau ele heppig amunu, ag Kayaknu kekeɗ daappig. Ag Kayak ele ouqak ii daappig, piɗe laih daappig.

²² Amge Kristus Nug danab beɗu awa, ad emaitakppa mauhom, ib amuppa Kayak he, ag nuhikkud danab ah oppiaawak ele, ag nuhig neekkakppa ag oolagppa kaliak laa iitta ele, amu eheɗ laa iitta ele daaglagnu ag Nug ele oolag laippu daatteb.

²³ Anam amge, keeke laa ag Nai Ena am ena baknu dabmak aɗa dayak ippunigtte, am dabmak amuppanu eeɗatteb, ag Jesusnu Nai Ena doona, oolagppa genab dooppig ele, ag ooppa genab doyak amu uuna, ag nena qemananu, ag tuɗidna, ooppa genab doyak amu ɠagattag aɗan ɠagattagnab daaglagoitte. Jesusnu Nai Ena ag dooppig ele amu, danab wan ohppa daatteb, ag amunu mehuqak dooppig. Amu da Pol, da am nai amunu maɗi nid daattem.

Pol nug Kolosi ehanattom

²⁴ Amu da gemu beɗulppa guittak maottem imu amu, da amunu maɗoɗppan gamag ahak doottem. Aɗinu? Da Kristusnu Kristen tamaniak, amuam Nug beɗu aakku amu, da tamaniak amu ehanidkkulnu ool daatte. Guittak Kristus Nug Kristen tamaniak ehanidkkunu mawom amuam daatte, amge guittak da dakka beɗulppa maottem imuam da amuppa hei, Kristus Nug guittak mawom amu aakku ambette.

²⁵ Kayak nukka Nug da tituaniɗe, da Kristen tamaniaknu maɗi nid, ag ehanadkkulnu bemi. Uɗat dahil amu da Kayaknu Nai Ena oh genab tutukku mehuqkkulnu daatte.

²⁶ Anukka Nai Ena amu danab buɗub oh amelagppa hanhan lokkumak dayom, amge gemu Nai Ena am Kayaknu danab ah oppiaawak ele, Nug ag amu anidkkulagnu oo daye he, amelagppa miag beum.

²⁷ Lokkumak nai amuam enanagnab, danab oh dilagnu. Amu Kayak Nug danab ah nuhikkud ag amu dooglagnu heum. Nai lokkumak amuam iikku. Am Kristus, ag oolagppa daatte. Nugib ag omalatteb gona, Nug ele hab attan ena daaglag.

²⁸ Ig Kristus, nuhignuib danab oh amelagppa attem. Ig danab oh anen anen ag dabmena autna aona, ag Kristusnu bena daanna, ag genab tutukku hak danab elelenab beppeg, ig ag omaladta, Kayak noobppa gokkunignu elele daagnignu, ig doyak dabmak ena ele ohppa danab oh ippunittak nai, amu dabmettak nai ele ippunadttem.

²⁹ Diig amunu da dahil ɠagattag ohppa da uɗat amu hekkulnu heɗiag okkai hettem. Kristus Nug nukka da uɗat anam hekkulnu ɠagattag okkai nuhig da meɗa, Nug da tappaɗilele hettem.