Josua 9 - Nobonob Baibel

Gibeon danab ag Israel buppualadppig

¹ Aria, Jodan lenu qaban uɗitteppanu king oh ag aɗi keeke beumnu dooppig. King amu ag am Hit, Amo, Kanan, Peres, Hiwi, amu Jebus ele dilag king. King amu ag wan laih qauko qauko ele, amu qauko nakok qauko okkai diigppa daatteb, amuam laih qaban nedeppan wan laih, amu laih Mediterenia yu ihi ukka, Lebanon batakppa, ag appa daappig.

² King amu ag keeke beumnu doon, ag ahan, ag ahilkad ban daup aɗaeg ooho, ag Josua, Israel ele ban hekkulagnu dabmeppig.

³ Amge haen Gibeon danab ah ag Josua nug Jeriko, Ai ele dilahppa aɗi heum, ag amu doona,

⁴ ag Josua, Israel danab ah ele buppualadppeg, Israel ban daup ag ii aqamnanu dabmeppig. Ag nai awa ukkak danab maatteg, Josua toppa goppig, amge Josua aɗi ag anadna, “Danab amu ag wan umanabnu, kalam ganettai oin oin uɗippig,” anam dooglagnu, ag donki qaɗeppa bek alag ma, nauhattak daappig. Amu doɗ gaɗa nippud wain inaknu alag me, danab ag bappaidppig ele, ag amu ele akkaeg teum.

⁵ Ag anam hena, nai awa ukkak danab amu ag baelkad gaɗa nauhe, eɗua babaittak, amu lamen alag ele maadna goppig. Ag bret qaɗaiettak, gi qak ele, ag amu ele Josua ippunidkkulagnu aon goppig.

⁶ Ag Gilgal appa Israel dilag haen tutu dayaknu aab kalakppa tena, amu ag Josua, am Israel danab ele inam iikku amelagppa appig. “Ig ag ele maɗoɗ daagnignu, ig nug tituanta nai qakkagnignu oɗ mattagnignu wan umanabnu ahat uɗimut,” aon appig.

⁷ Ag anam aeg amu, Israel ag nai nob mena, Hiwi danab amelagppa appig. “Ag am miag ippanu iitta amu, ig attem heta doognig? Ag am miag ippanu anam doyadkkunig dayeb amu, ig ag ele nug tituanak ii hemata,” aon appig.

⁸ Israel ag anam appig, aria Hiwi danab ag appig. “Ig ahilkad maɗi nid daagnignu hettem,” appig amunu, Josua oɗ matta aum, “Ag am atteg? Ag adeppanu uɗippig?” awa oɗ mattom.

⁹ Josua nug anam a, ag nai nob mena appig. “Ig, ig ahilkad maɗi nid amu, ig Yawe, ahilag Kayak, ig Nug onig okkainu doomut amunu, ig wan umanabnu uɗimut. Ig Yawe, ahilag Kayak, nuhig hak ɠagattag, Isip appa heum amu doomut amunu, ig uɗimut.

¹⁰ Ig Yawe Nug Hesbonnu King Sihon, amu Basannu King Og, nug Astarot dayom amu, ig Nug ahilahppa aɗi heum amu, ig doomut. King aɗit amu aa Amo dilag king, aa Jodan lenu kaɗag uɗitteppanu daapiɗ.

¹¹ Anam amunu, ikki danab ihinkad, amu danab ah ihinkad ele ag ig ib elabnab imu uɗignignu bappaidna mekkaeg uɗimut. Ag ig amenigppa inam appig. ‘Ag gona, Israel danab ah anatteg! Anadna amu, ag ag amelagppa inam appeg dooglag. “Ig ahilkad maɗi nid daagnignu hettem amunu, ag ig ele maɗoɗ daagnignu, ig nug tituanta nai qakkagnignu oɗ madattem.” Ag anam aon aig!’ anana heeg uɗimut.

¹² Bret imu amu manak abenppanu nakok gakkaɗak dayeye aot uɗimut. Amge gemu amu, bret imuam qaɗaiettak, gi qak ele iikkude antteg!

¹³ Amu doɗ gaɗa nippud wain inaknu imu, ag am bau ena dayeye, wain inamut, amge gemu ag alag mena pattiɗadtteb. Ihinkad lamen, baenkad gaɗa ele amu ib imuag elabnab uɗiutut nauhadppig,” aon appig.

¹⁴ Gibeon danab ag anam aeg, Israel dilag ikki danab ag danab amu dilag bret italppig, amge ag amunu Yawe ii unuqidna, oɗ ele ii medappig.

¹⁵ Ag anam hena, Josua nug ahe, ag ele maɗoɗ daaglagnu nug tituanna nai qagappig, amu Israel dilag ikki danab ag nai qakkak amu aɗi aum amu, ag anamnab hekkulagnu ahilag nai ɠagattag qettan appig.

¹⁶ Ag anam heppig, amge deɗ ewam uue, Israel danab ah ag Gibeon danab ah miag daatteb, ag anam heppig dooppig.

¹⁷ Israel ag amu doon, ag laippun bappaidna gona, ag deɗ ewamppa Gibeon dilag aab okkai laala, amu italkkulagnu amuppa teppig. Aab okkai amu onilkad amu, Gibeon, Kepira, Berot, amu Kiriat Jearim ele.

¹⁸ Amge Israel ag aab amu ii loppaɗadppig. Ahilkad ikki danab ag Gibeon ele ban ii hemananu Yawe, Israel dilag Kayak, Nug onigppa ahilag nai anan qagappig amunu, ag ii heppig. Anam amu, Israel danab ah ag ahilkad ikki danab dilagnu naittuɗ okkai heppig, Aɗinu? Ag Gibeon danab ele maɗoɗ daaglagnu nug tituanna, nai qakkan, ag amu hekkulagnu ahilag nai ɠagattag qena appig.

¹⁹ Israel ag anam heppig, amge ikki danab oh ag appig. “Ig Yawe, ig Israel ihinig Kayak, ig Nug onigppa anam ii hekkunignunab nai ɠagattag qettata amut, amu gemu ig ag aqadpput mauhkkulagnu elele iitta.

²⁰ Ig nai ɠagattag qettata amut amu, ig amu loppaɗta, ii dim lamidkkunig dayeb, Yawe Nug ihinignu oppoɗi bekku amunu, ig uuadpput, bau daaglag.

²¹ Ig ag uuadpput, ag bau daaglag, amge ig hepput, ag ig Israel danab ah, ag ig oh ihinig aab, le ele aoglag,” aon appig. Amunu Gibeon danab ag aakku Israel danab ah dilag maɗi nid maɗi ah ele daaegeg, Israel dilag ikki danab ag ahilag nai ɠagattag qetta anak ele ii loppaɗppig.

²² ⌊Amge dabmak amu oh ii awak haenppa⌋ Josua nug Gibeon ikki danab onilagppa e ukkaeg, amelagppa aum. “Ag aɗinu ig buppuigppig? Aɗinu ag ig oonigppanab iikku daanna, ag wan umanabnu uɗippignu appig?

²³ Anam amunu, ag aakku gemu, haen oh ag eheɗ laa awaknu anak waappa daatteb. Gemu digmak, ag dahil Kayak, ag Nug laugnu aab aonna, ag le ele itaglag,” awa aum.

²⁴ Josua nug anam a amu, Gibeon ag nob mena appig. “Ig, nahipad maɗi nid maɗi ah ele amu, ig anam hemutnu diig am, Yawe, ahilag Kayak, Nug nuhig maɗi nid Moses amegppa, nug wan imu oh ag matteb, wan imuppan danab ah ele oh heeb, padal mekkulagnu haknunab nai aum amu, ig amu doomut amunu, ig anam hemut. Ig bau dayak ihinignu dabmeta, ag baɗadta, ig anam hemut.

²⁵ Gemu ig na eppenppa aakku daattem, na ihinignu aɗi kobol am ena, aɗi kobol am tutukku, na kobol amu hekkutnu maidttem, na amu hekkutib,” aon appig.

²⁶ Anam amunu, Josua nug Israel dilag nai ag danab amu aqaglagnu appig amu, nug aakku okkula, Gibeon ehanatte, ag ii aqaeg mauhadppig,

²⁷ amge Josua nug haen amuppa he, Gibeon danab ah ag Israel danab ah dilag, amu Yawenu qaɗabnu ele, aben adeppa qaɗab buuaknu, Yawe Nug epeɗikku amu, ag amunu ele aab awak, amu le itak uɗat ele hedappig. Babaittak ib amunu amu daye uɗie, gemu ⌊nai imu yaak haenppa⌋ ele, anamib daatte.