Josua 8 - Nobonob Baibel

Israel ag Ai eɗidppig

¹ Aakku Yawe Nug Josua amegppa aum. “Na aib baɗame. Nahip dabmak ele qe nak aib dayom. Na ban daup oh diippe, ag gona, Ai ele ban heig! Da king Ainu, nuhig danab ah, nuhig aab okkai, amu nuhig wan ele oh na mettami daatte.

² Geha ag Jeriko, nuhig king ele heeg nauhom bia, ag Ai heppeg nauhkku. Amge gemu, haen imuppa amu, ag danab dilagppan doɗ keeke, ag aoglag amu, ag amu oh ag ahilagnu aɗaglag. Amu ag ban hekkulagnu, ag aab okkai dimugppa lokkumna daappeg, haen beeb ag ahan, ban hekkulag,” awa aum.

³ Yawe anam aum amunu, Josua nug Israel ban daup ele ag gona, Ai ele ban hekkulagnu bappaidppig. Amu haknu amu, Josua nug nuhikkud ban danab oolagppanu ban danab nakok kuɗum, ag ban danab ɠagattagnab amu, nug ag otiatta, tuqanppa maatte goppig.

⁴ Ag gokkulagnu daaegeg, nug ag inam hekkulagnunab ag amelagppa aum. “Doyeg! Ag gona, ban hekkulagnu amu, aab okkai dimugppa aab okkainu uma iitta, appa ag lokkumna bappaidna daappeg, haen beeb ahan, ban heig!

⁵ Haen da ban danab laala imu ele, ig digmeta ban hebupput amu, geha Ai ag ihinkadppanu ban laa amuppa heppig bia, ig iqaglagnu dokkulag amunu, ig oolta gokkunig.

⁶ Ig ag anam uuadpput lamigna, ag aab okkaippan oh ahan, dimittim uɗiglag. Amu ag aakku akkulag. ‘Israel ag haen laa heppig bia, ag oolna gotteb,’ akkulag amunu, ag aab okkai uuna, dimittim uɗin dim lamignana, aab okkai guguittak ii daamna.

⁷ Ai ag anam heppeg, ig Israel laa ig ele anam hepput amu, ag lokkumna daaglag ele, ag amu anidna, ag ahilag haen aakku beum doon, ag ahan, ban hena, aab okkai amu eɗidna aoglag. Yawe, ahilag Kayak, Nug ag madakku.

⁸ Haen ag aab okkai eɗidna aona amu, ag Yawe Nug haknunab aum bia, ag aab okkai amu amotppeg ewaɗ! Da ag aɗi aɗi hekkulagnunab aakku ami; ag anam heig!” awa aum.

⁹ Josua nug ag anam hekkulagnu aum amunu, ag tuqan amuppa ahan gona, ban hekkulagnu aab dimugppa lokkumna Betel, amu Ai ele gamalahppa daappig. Ag Ainu laih qaban uɗitteppanu, ag appa daappig. Amge tuqan amu, Josua nug am haen tutu dayaknu aab kalakppa, daup danab laa ele daappig.

¹⁰ Amu ii wagɗeb buttuanab, Josua nug aha, nuhikkud danab diie, nug, Israel dilag ikki danab ele oh, ag ban hekkulagnu daup danab noolag aon, Ai goppig.

¹¹ Ag gona, Ai laih Yawalti uɗitteppanu, appa tena, appa ag bannu haen tutu dayaknu aab kalaeg, aben oolnu noak laa aab, ag ele gamalahppa dayom.

¹² Matu tuqanppa amu, Josua nug daup 5,000 ag gona, Betel, Ai ele gamalahppa, aab okkai Ainu laih qaban uɗitteppanu appa lokkumna daappeg, haen beeb ban hekkulagnu maatte goppig.

¹³ Amunu ban daup oh ag ban hekkulagnu babaittak daappig. Ameg laa ag aab okkainu laih yawalti uɗitteppanu bannu haen tutu dayaknu aab kalakppa daaegeg, amu laa ag aab okkainu laih qaban uɗitteppanu, ag appa tuqanppa gona, lokkumna daappeg, haen beeb ahan, ban hekkulagnu daappig. Josua nug ⌊nuhikkud daup ele⌋ amu, ag tuqan aben oolnu noakppa nona, laih tena daappig.

¹⁴ Aria, haen Ai dilag king nug aben oolnu noakppa appa Israel anatte amu, nug, nuhikkud ban danab ele ag buttuanab ahan gona, danab nug neekkeb ukkeb, atu onig Araba anidkkunu eleleppa, appa Israel ele ban hekkulagnu goppig. Nug anam heum, amge nug danab ag ban hekkulagnu aab okkai dimugppa, lokkumppig ele, ag haen beeb ban hekkulagnu daappig amu, nug ii doyom.

¹⁵ Am Josua nug Israel ban danab nuhikkud ele ag kekeɗ, ag ameg laa eheɗ eɗatteg, oolna gotteb, ag amubia hena, atu taɗakppa gokkulagnu goppig.

¹⁶ Ag anam hena ukkaegeg, Ai dilag king nug he, Ai danab oh ahan, Josua, nuhikkud daup ele lamadna goppig. Josua, nuhikkud daup ele ag anam heeg, Ai danab ag oh aab okkai uuppig.

¹⁷ Danab laa Ai, o Betel appa laa ii dayom, oh ag ahan, Israel lamadna ukkaegeg, aab amu matulak dayom.

¹⁸ Anam daye, Yawe Nug Josua amegppa aum. “Da geha na aab okkai umu medakkul amunu, na nahip ban aeg Ai eppone!” awa aum. Nug anam a, Josua nug Yawe hekkununab aum bia heum.

¹⁹ Haen Josua nug amu he amu, danab ag lokkumna daappeg, haen beeb ahan, ban hekkulagnu daappig ele, ag bittalna wana, aab okkai ooppa goppig. Ag pahanab aab okkai aona, amoteg ewom.

²⁰ Ag amoteg ewewe, Ai danab ag dimulagppa eɗun neegna, ag aab kah aab okkaippanu ta, lomppa teete anidppig. Ag anidna, ag adeppatai laa gokkulagnu ib laa ii anidppig. Amu Israel ag atu taɗakppa gokkulagnu oolna goppig ele, ag appanu eɗueg, danab ag lamadppig ele amu, ag ag ele ban heppig.

²¹ Ag amu heppignu diig am, haen Josua, nug Israel ban danab nug ele goppig amu, ag aab kah aab okkaippan beebe anidppig, diig amunu ag, danab ag lokkumna daappeg, haen beeb ban hekkulagnu daappig ele amu, ag aakku aab okkai aon malappig dooppig. Anam doona, ag eɗueg, Ai danab ele ban heppig.

²² Aria, Israel ban danab aab okkai ooppanu amu, ag dimittim uɗieg, danab ag Josua, nuhikkud danab ele ban heppig amu, ag ag digmena aqappig amunu, Ai danab ag aakku pelemppa tena, ag oh mauhadppig. Laippu laa ii dayom, o oola ukkom.

²³ Ai dilag king aakkuib ag aɗan aon, Josua toppa goppig.

²⁴ Israel danab ag aab dimittim danab Ainu oh, laa ag dad okkaippa daappig, laa ag lamatteg, atu taɗakppa oolna goppig ele amu, Israel ag danab amu ohnab aqan malona, ag eɗun nona, aab ooppa daappig oh aqappig.

²⁵ Amunu deɗ amu Ai danab ah oh, am ahilag ebqak 12,000, ag oh mauhna malappig.

²⁶ Josua nug eppegppa ban aeg Ai epponom, nug eppeg amuppa ban he ukke, aun aɗi ag Ai daappig ele oh, ag Yawenuib nuhig pelemppa daappig.

²⁷ Amge doɗ, aab okkai ooppan keeke laa ag aoglag bia amu, ahilag daaglagnu, ag ii heeg nauhom. Israel ag Yawe Nug anam haknunab Josua amegppa aum bia heppig.

²⁸ Israel dilag ban danab ag anam hena, aab Ai amoteg ewa, aakku nauha auta autanab awa, Ai am kinipan ameg okkai hume tak, anamib aakku daakkunu anam dayom. Aab amuam hele-ettak anam daye uɗie, gemu ⌊nai imu yaak haenppa⌋ ele anamib daatte.

²⁹ Josua nug Ai dilag king qe mauhe, beɗu am appa ad attan aihe daye ukka, uudoum. Aam noono amu, Josua nug Israel ag king beɗu autna, aon aab okkainu aɗ od oɗeppa buɗieg ukka niikkununab aum. Nug anam a, ag heeg niieye, ag men akkan, qaɗeppa tonan, qagmeeg ukka, qauko nakok bia beum; gemu ⌊nai imu yaak haenppa⌋ ele aakku daatte.

Yawe Nug Israel ele, ag nug tituana nai qakkak baula heppig

³⁰ Anam daye amu, Josua nug aakku qauko Ebal appa, Yawe, Israel dilag Kayak, nug nuhig qaɗab laa buuom.

³¹ Nug Israel dilagnu ippunittak nai, Yawenu maɗi nid Moses nug Ɗo Nai Buk, Kayak Nug nai amu Moses amegppa a, Moses nug bukppa yom amu, nug nai amu antta, dim lamitta buuom. Yawe Nug inam amegppa aawo yom. “Qaɗab dahil, men ii otaɗak, amu aen qattippa men laa ii kuhak ele, amuppa buue!” Nug qaɗab he, ag qaɗab amuppa manaknu ofa, amu laippu dayaknu ofa ele Yawenu heppig.

³² Am Israel ag anttegeg, Josua nug Mosesnu ɗo, bukppa yom amu, nug nai amu qaɗab mak menppa yaalattom.

³³ Nug anam hewowa amu, nug Israel danab ah obate, ameg aɗit daappig. Obatak aɗit ohppa amu, wan laihnu danab daappig, ikki danab, Israel dilag ehanittak anuqak danab, amu epeɗiak danab, ag ele, ag oh ameg aɗit amuppa nona daappig. Ameg laa amu qauko onig Gerisim ukkakppa dayom, laa amu qauko Ebal ukkakppa dayom. Ameg aɗit amu aa Yawenu Tituanak Nainu Kunup kontrak inak ele laih laih daaeheh, mana mettak danab, ag Lewi buɗub amu, ag kunup amu maoppig ele, ag gamagppa daappig. Danab ah oh ag kunup amu neekkidna daappig. Imu oh am anukka Moses, Yawenu maɗi nid, nug Israel danab ah itittak ena aoglagnu, ag anam daan aoglagnu haknunab aum.

³⁴ Aakku Josua nug Moses nug Ɗo Nai Bukppa ɗo yom, nug amu oh ebqeum. Nai amu laa am itittak ena awaknu, laa am eheɗ laa awaknu anak waappa dayaknu nai.

³⁵ Keeke haknunab, Moses nug mattom ele amu, nug amu oh danab, ah, nid naunau, amu wan laihnu danab ah, ag uɗin Israel oolagppa daappig amu, nug ag oh dooglagnu ebqeum. Nug maha nakok laa ii tippalom.