Josua 7 - Nobonob Baibel

Ai ag Israel eɗadppig

¹ Amge Israel ag keeke Yawenuib nuhig pelemppa daappig, ag keeke amunu Kayak ippunattomnu oo metta ii uuak kobol ii dim lamitteg, laa nug keeke amunu laala awom. Danab onig Aakan nug keeke amu laa yab awom amunu, Kayak nug Israel dilagnu oo huana nauhom. Aakan nug Karmi bekka. Karmi nug Simri bekka. Simri nug Sera bekka. Aakan nug Israel dilag huu okkai Juda, amuppanu.

² Amu Israel ag Jeriko eɗidna malaeg, Josua nug lokkumakppa atu italak danab maatte, aab onig Ai, Betelnu laih aam bedeppanu daatte, Betawen guguittak appa, atu italkkulagnu, “Ag gona, wan atu amu italeg!” ana, nug he goppig. Josua nug anam ana heum amunu, ag gona, Ai italppig.

³ Ag gona, amu hewona, haen ag eɗun uɗina amu, ag Josua amegppa appig, “Aab amuam nagnag amunu, danab ebqak 2,000, o 3,000, keeke anam gota hepput nauhkkunu elele. Ig ohnab appa gokkunignu ii daatte,” aon appig.

⁴ Ag anam appig amunu, Josua nug ban danab 3,000 anam maatte, Ai goppig, amge Ai danab ag ahan, Israel danab eɗadna lamadppig.

⁵ Ai danab ag Israel lamadnana, ag aabnu aɗ odppanu ukka, lag keeke, haknu men awaknu abenppa batak, ag lamadnana gona, ag Israel danab 36 aqaeg mauhppig. Ai danab ag anam heeg, Israel ag oolagppa ɠagattag doyak ahilag iitta meum.

⁶ Anam be, Josua nug Israel dilag ikki danab ele ag uug nau doon, ag lamen ahilkad pattiɗna, ag gappud ikkilkadppa mena, ag ahan gona, paha Yawenu Tituanak Nainu Kunup noobppa gatelag qaun o, gomelna, ag iɗulag wanppa mena daaeg ukke, uudoum.

⁷ Ag anam daan amu, Josua nug unuqitta aum. “O Naɗi Yawe, Amo danab ag ig iqaglag dayeb amu, diig aɗinu na ig omaigna, Jodan le mataɗna laih imuppa uɗime? Ig le laih uppa daalomlob, amuam ena. Ig ippa uɗipput, ag ig eɗigkkulag am ena iitta.

⁸ O Naɗi, da aɗi akkul? Israel ban danab ag kekeɗ dilagppanu oolna goppig.

⁹ Kanan danab, amu danab laala wan imuppa daatteb ele amu, ag imu beum doon, ag oo mekkan, ig iqappeg mauhkkunig. Ag amu hekkulag, amge O Yawe, amu anam beeb amu, na onin okkai, amuppa am attem bekku?” awa unuqittom.

¹⁰ Josua nug Yawe amegppa anam unuqittom, amge Yawe nug Josua amegppa aum. “Na ahe! Diig aɗinu na inam, iɗun wanppa no niittem?

¹¹ Israel ag hipunin heppig; ag dahil nug tituana nai qakkak nai, da ag amu dim lamidkkulagnabnu ami amu, ag nai amu tippalppig. Ag keeke dahilnuib pelemppa daappig, ag keeke amu yab agappig. Ag yab aakkuib ii heppig. Iitta. Ag heppignu ele hambuppuak nai mattinna, keeke amu, ahilkad keeke ooppa lokkumadppig.

¹² Ag anam heppig amunu, Israel ag kekeɗ ahilkad, ag amu dilagnu oolna gotteb. Amunu ahilkad kekeɗ ag eɗadtteb. Aɗinu? Keeke dahilnuib dahil pelemppa daatte ag oolagppa daatte amunu, gemu Israel, ag ele ag dahilnuib dahil pelemppa daatteb. Anam amu, ag keeke nauhkkunu dahilnuib dahil pelemppa daatte, keeke amu ag oolagppa daatte amu, ag heppeg ii nauhkku dayeb, da tuɗitten ag ele ii daamta.

¹³ Ahan gona heppe, Israel danab ah ag dahilnu tituana meɗak dayeg! Na ag amelagppa inam appe doyeg! ‘Ag buttinu elele daaglagnu, ag Yawenu tituana mettak daaglagnu hena dayeg! Aɗinu? Yawe, Israel dilag Kayak, Nug inam atte. “Keeke dahilnuib pelemppa daatte amu, keeke amu ag oolagppa aakku daatte. Keeke amu ag oolagppa daatte haenppa amu, ag kekeɗ ahilkad eɗadkkulagnu elele iitta daaglag. Ag heppeg, iitta meeb amu, ag eɗun, kekeɗ eɗadkkulag.

¹⁴ Butti buttua aunnab nug eheɗ heum epponadkkulnu amu, ag Israel dilag huu okkai anen anen, ag da gumiɗna dokkulag. Doppeg, da Yawe, da Israel dilag huu okkai laa epponadkkul. Da ag epponadppi, Israel dilag huu okkai amuppanu aab ikki anen anen ag da noolppa dokkulag. Ag doppeg, da Yawe, da aab ikki atten ag epponadkkul. Da epponadppi, aab ikki amunu baelkadppa anen anen ag da Yawe, da noolppa dokkulag. Ag doppeg, da baelkadppa aun epponadkkul. Da epponadppi, baelkad amuppanu danab ag anen anen ag da noolppa dokkulag.

¹⁵ Ag doppeg amu, da aun nug eheɗ heum amu, nug da Yawe, Nug da ele nug tituana nai qakkak amu tippalom, amuppa nug Israel ooppa kobol naunab heum amunu, ag aun nug keeke dahilnuib, dahil pelemppa daye, yab heum amu, ag nug qeppeg mauheb, ag nug gaɗa, nuhikkud oh ele manadppeg ewaɗ!” ’ ” awa aum.

Aakannu hipunin

¹⁶ Yawe Nug anam a, wagɗeb buttuanab amu, Josua nug Israel dilag huu okkai amu diia, Yawe noobppa wana me, Yawe Nug Israel dilag huu okkai Juda awom.

¹⁷ Anam amu, aab ikki, huu okkai Juda ooppan ag doeg amu, aab ikki Sera, ag Yawe noobppa uɗin daaegeg, Nug ag diiom. Ag dim lamattak am, aab ikki amuppanu danab baelkadppan he doeg, Nug Simri, nug baekkudppan ele diiom.

¹⁸ Amu Josua nug Simri baegppan danab oh laib laib diiadna waeg amu, Yawe Nug Aakan, nug eheɗ heumnu awom. Aakan nug Karmi bekka. Karmi nug Simri bekka. Simri nug Sera bekka. Aakan nug Israel dilag huu okkai Juda, amuppanu.

¹⁹ Anam beum amu, Josua nug Aakan amegppa aum, “O bekkal, na Yawe, Israel dilag Kayak, na Nug binag amahlak oppiaawak ele mette! Na hipunin nahip miag mena, na da amelppa aɗi eheɗ heme amu, na amunu a! Aib da noolppa lokkumkkut heme,” awa aum.

²⁰ Josua anam a amu, Aakan nug nob ma aum. “Am genab, da Yawe, Israel dilag Kayak, da nuhigppa hipunin hemi. Da inam hemi.

²¹ Da banppa keeke aomut ooppanu amu, da lamen elab enanag laa Babilon appa heppig antten awe, da 2.3 kilogram silwa, amu gol maha laa, uug nuhig am 600 gram, da amu ele awen uɗimi. Da keeke amu amel qe aolomnab dabmak eheɗ aomi amunu, da akke uɗimi. Da dahil peh waappa, wan ooppa lokkumadmi daatteb. Silwa amu laa oh eɗattak unuqagnab boummi daatte,” awa aum.

²² Aakan anam aum amunu, Josua nug danab, keeke amu anadkkulagnu he goppig. Ag pahanab peh amuppa gona, ag Aakan nug aum bia keeke yab awak ele amu anadppig. Silwa am wan unuqagnab, keeke laa oh eɗattak boumak dayom.

²³ Ag anidna, ag keeke pehppanu akkan, Josua, Israel oh ele dilagppa gona, ag Yawe noobppa, wanppa maadppig.

²⁴ Ag maatteg daaegeg amu, Josua, Israel laa oh ele ag Sera buɗub Aakan, silwa, lamen elab, gol maha, bekkod, aɗekkud, nuhikkud makau, donki, sipsip, peh, nuhig keeke oh ele diin, Akornu oolnu noak, ag appa goppig.

²⁵ Anam daye, Josua nug Aakan amegppa aum, “Na aɗinu ihinigppa uug aon uɗime? Yawe Nug gemu nahip-ppa uug mekku,” awa aum. Nug anam a, Israel ag Aakan, aria nuhignu ele menppa makkuɗattegeg mauheg, ag nug gaɗa, nuhignu ele manatteg eoppig.

²⁶ Ag amu hewona, ag men kuɗumnab, Aakan mauha niiom abenppa qagmeppig, amu qagmak amu daye ukke, gemu ⌊nai imu yaak haenppa⌋ ele daatte. Ag amu oh hena malaeg, Yawe Nug oo nauhak huanaknab doyom amu, Nug baula ii doyom. Amu aben amunu ag Akornu oolnu noak aon adappig.