Josua 4 - Nobonob Baibel

Israel danab ah ag men anidna, Jodan le mataɗppig dabmekkulagnu qabappig

¹ Israel danab ah oh ag anam Jodan mataɗna wana malappig. ⌊Amge amu ii nak haenppa⌋ Yawe Nug Josua amegppa inam aum.

² “Na danab ah oolagppanu danab ebqak 12, danab amu ag Israel dilag huu okkai anen anennu, laippu laippu anam tituanatte!

³ Na tituanattona, na ag amelagppa appe, danab amu ag men ebqak 12 Jodan le gamagppanu human mawatteg! Ag men aoglagnu amu, ag mana mettak danab hippaidna daattebppanunab aon mawadppeg, na danab ah oh ele ag gona, aben ag tuqan daaglagppa meig!” Yawe Nug matu anam Josua amegppa aum.

⁴ Yawe Nug Josua amegppa anam a, Josua nug Israel danab 12, Israel dilag huu okkai anen anennu laippu laippu anam onilagppa ewa qagmattom.

⁵ Ag qagmeeg, aria nug ag amelagppa aum. “Ag Yawe, ahilag Kayak, ag nuhig Tituanak Nainu Kunup le gamagppa daatte amu, ag appa gona, kunup amu noobppa, Jodan le gamagppa, appanu ag anen anen, ag men laippu laippu aon, gukkalkadppa maweg! Men laippu laippu, amu dilag ebqak am Israel dilag huu okkai anen anen, ebqak anamib daaglag.

⁶ Men amuam ag oolagppa at daaglagnu daaglag. Aɗinu? Dimppa, nid naunau ahilkad ag oɗ mattaglag. ‘Men amuam aɗi diignu?’ ana oɗ mattaglag.

⁷ Oɗ madappeg amu, ag inam appeg dooglag. ‘Yawenu Tituanak Nainu Kunup kontrak inak ele amu, kunup amu ukka, le daugppa dayeye, Yawe Nug he, Jodan leppa tak imuagppa, attan amuppanu le nekkunu ii heehe, kunup dayomppanu le ippu imuagppa, uppa qagmeum. Haen kunup amu Jodan le mataɗom amu, Yawe he, Jodan le amu otaɗe, nak iittanu eɗua le ibuppa nakok attan titiɗom. Anam beum amu, men amu Israel danab ah ag haen oh amunu dabmekkulagnu at daatte.’ Ag anam aon akkulag.” Josua nug ag amegppa anam aum.

⁸ Yawe Nug Josua amegppa anam hekkunu a, nug Israel danab ah ag anam haknunab amelagppa aum amunu, Israel ag anamib, Josua aum bia heppig. Ag Jodan le gamagppanu men 12 aoppig. Amuam Israel dilag huu okkainu ebqak Israel ooppa daatte bia aoppig. Ag Yawe, Nug Josua amegppa aum bianab heppig. Aria, ag men 12 amu mawadna, ahilag haen tutu dayaknu aab kalappig, ag amuppa gona maadppig.

⁹ Ag men amu maon gona maatteg, Josua nug qappalattom. Men amuam Jodan le gamagppanu, aben mana mettak danab ag Tituanak Nainu Kunup kontrak inak ele amu, ag kunup amu maon hippaidppigppanu awak. Amu men amu ag daaeg uɗie, gemu ⌊nai imu yaak haenppa⌋ ele daatteb.

¹⁰ Mana mettak danab ag Tituanak Nainu Kunup maoppig ele amu, ag anam Jodan le gamagppa hippaidna daaegeg, danab ah ag keeke oh Yawe Nug Moses oɗeppa ag hekkulagnu Josua amegppa haknunab aum, ag amu hena malappig. Amu Israel danab ah ag paha Jodan le mataɗppig.

¹¹ Aria, haen ag oh le mataɗna malaeg, mana mettak danab ag Yawenu Tituanak Nainu Kunup amu maon, le gamagppanu uɗiegeg, danab ah laihppa daanna, neekkadna daaegeg wappig.

¹² Israel dilag huu okkai Ruben, Gad, amu Israel dilag huu okkai Manase mahaib ele, amu dilag ban danab, ag Israel danab ah laa noolagppa, Moses amelagppa aum bia, ag hena, Jodan le mataɗna goppig. Ag bannu bappaidna goppig.

¹³ Ebqak 40,000 anam, ag Israel dilag huu okkai Rubennu, Gadnu, aria Manase mahaib ele, ag bannu bapaidna goppig. Ag ban hekkulagnu Yawe noobppa Jodan le mataɗna, uɗem aab okkai Jeriko guguittak dayom, amuppa teppig.

¹⁴ Deɗ amuppa ag Jodan le mataɗeg amu, Yawe Nug he, Israel laa oh ag Josua nug onig, binag okkai ele dooppig. Nug bau dayom, haen amu oh ag nuhignu, “Nug am danab okkai, binag ele,” doon oidppig. Ag Mosesnu, nug onig okkai, binag ele doon oidppig, amubia ag Josuanu doodppig.

¹⁵ Amu Yawe Nug ⌊danab ah ag le mataɗna malaeg, le gamagppan uɗat oh ele malak daye, haen amuppa Nug⌋ Josua amegppa aum.

¹⁶ “Na mana mettak danab ag Tituanak Nainu Kunup kontrak inak ele, ag kunup amu maotteb ele, ag Jodan le uun audam bekkulagnu appenab doyeg!” awa aum.

¹⁷ Yawe Nug Josua anam amegppa a amu, Josua nug mana mettak danab amelagppa haknunab nai, “Ag Jodan le uun, audam beig!” awa aum.

¹⁸ Josua anam hekkulagnu mana mettak danab amelagppa a amu, ag Yawenu Tituanak Nainu Kunup kontrak inak ele, ag kunup amu maonna, le uun, laih teppig. Ag uɗinna, ag baelkad wan qaɗaiettakppa meeg, haen amuppanab Jodan le tatam ugakka gottom bia eɗua, ui ele ukkom.

¹⁹ Kalam digmaknu deɗ eblaih tanig eleppa, Israel danab ah ag aben Jodan le daugppa daappigppa amu uun, ahan gonana, aben laa onig Gilgal, appa ag haen tutu dayaknu aab kalan daappig. Aben onig Gilgal am wan laa, aab okkai Jerikonu tomnu kaɗag uɗitteppanu daatte, am wan amuppa, tom guguittak daatte.

²⁰ Amu men ebqak 12 ag Jodan le ooppanu aoppig amu, Josua nug men amu Gilgal appa qappalattom.

²¹ Qappalatta amu, nug Israel danab ah amelagppa aum. “Butti aɗi, haen ag buɗulkad ag, ag mamelkad, ‘Men imuam aɗi ippunigtte?’ oɗ madappeg amu,

²² ag ag amelagppa inam aig! ‘Ig Israel danab ah Jodan le mataɗmut, amge le iitta, wan qaɗaiettakppa mataɗmut.’

²³ Aɗinu? Yawe, ihinig Kayak, Nug he, Jodan le qaɗaietta, anamib dayeye, ig mataɗta, laih wamut. Yawe, ihinig Kayak, Nug anukka Le Kokoɗppa he, le qaɗaietta, anamib dayeye, ig mataɗta, laih wamut, amubia Nug Jodan leppa heum.

²⁴ Yawe Nug wan ohppan danab ah oh ag Nug ɠagattag okkai ele dooglagnu amu, ag Israel, ag hanhan Yawe, ahilag Kayak, ag nuhignu ebehilag oh bodoetta le mekkuoitte dooglagnu, Nug anam heum,” awa aum.