Josua 24 - Nobonob Baibel

Yawe he, Nug Israel ele nug tituana nai qakkak heppig, Nug he, eɗun baula heppig

¹ Josua nug Israel dilag huu okkai oh onilagppa e uɗieg, Sekem appa qagmaattom. Qagmaatta, nug ikki danab, danab okkai, epeɗiak danab, amu Israel dilag ehanittak anuqak danab oh onilagppa e uɗin, ag Kayak gumidna wana daappig.

² Amu Josua nug danab ah oh amelagppa mattia aum. “Yawe, Israel dilag Kayak, Nug inam atte. ‘Anukkanab ag mamelkad aɗi, ag Yupretis le laihppa appa daanna, ag kayak laala noolagppa dup nona binalag meppig. Ag mamelag anukkanu laa am Tera. Tera nug am Abraham, Nahor ele mamelah.

³ Amge da na alan Abraham wan Yupretis appanu awe, Kanan wan ohppa omali oiyom. Da nug buɗub kuɗumnab mettami. Da nug Aisak metten,

⁴ da Jakop, Esau ele Aisak mettami. Da Seir wan, qauko qauko daattebppa Esau ag aon daaglagnu mettami, amge Jakop nug bekkod ele ag Isip noppig.

^5-6 Aria, da Moses, Aron ele ag Israel danab ah ehanadkkulahnu maati ukkaeh, amu da hei, keeke nau digdig Isip dilagppa beppig. Amu dimppa, da Israel danab ah, da ag Isipnu diien, omalatti uɗippig. Amge Isip ag ahilkad hos, bannu karis eleppa, ag mamelkad lamadna gona, Le Kokoɗ appa anadppig.

⁷ Israel ag da, Yawe, dahilnu huana gaaeg amu, da ag Isip ele gamalagppa gatatu eppami. Amu, ag Le Kokoɗ mataɗana waeg, da hei, yu nug eɗua abenppa wana, Isip oh diie, yu lana mauhadppig. Ag Israel, ag akka amelagppanab da aɗi keeke haen amuppa Isip dilagppa hemi amu, ag aakku anidppig. Amu dimppa amu, ag atu taɗakppa haen elabnab daappig.

⁸ Amu oh dimppa, da ag diie uɗii, Amo danab Jodan lenu kaɗag uɗitteppanu daappig dilag wanppa uɗieg, danab amu ag ahan, ag ele ban heppig, amge da ag ag eppelagppa mattai, ag Israel ag danab ah amu hatteg nauheg, ag wan amu aoppig.

⁹ Aria, Sipor bekka Balak, Moap dilag king, nug ahe, ag Israel, nug ag ele ban heppig. Nug Beor bekka Balam, nug ag eheɗ laa awaknu anak waappa daaglagnu akkunu oɗ mettom,

¹⁰ amge da nug anam akkunu uuen, nug amu amananu ib keldomi. Da anam heine hei, Balam nug ag haen nakok kuɗum itattom, amunu Balak nug ag aqamanu da ib oo nemi.

¹¹ Da anam hei, ag Jodan le mataɗna, Jeriko waeg, Jeriko danab ahaeg, ag ele ban heppig. Danab ameg kuɗum laala ele, ag ele ban heppig. Danab amu ag am, Amo danab, Peres danab, Kanan danab, Hit danab, Girgas danab, Hiwi danab, amu Jebus danab ele. Amge da hei, laa amu ag eɗadkkulagnu elele iitta daaeg, da ag eppelagppa maadmi.

¹² Ag Amo dilag king aɗit Jodan leppanu kaɗag uɗitteppanu eɗatppig bia, da hei, ahilag kekeɗ, ag ahilagnu baɗaegeg, ag eɗadppig. Ag ahilag qep elabte, o iitta latte, amuppa ag hena, ag ii eɗadppig. Iitta! Da hei, ag eɗadppig.

¹³ Da ag wan, amuppa ag uɗatab laa ii heppig, aab okkai ag ii kaladppig ele amu, da ag mattami. Aab okkai amu aakku, ag amuppa daatteb. Ag eppak ii heppig, amge da ag grep dad, amu olip dad ele mattai, ag amuppanu ee latteb.’ Yawe Nug anam aakku aum,” awa aum.

¹⁴ Amu Josua nug nai amu mattiowa, nug tuɗitta aum. “Gemu amu, ag Yawenu ebehilag oh bodoetta le meeb, ag Nug waappa daan, Nug oɗe dim lamidkkulagnu oo metta ii uuak kobol tutukkuppa heig! Ag mamelkad aɗi Yupretis le laih appa, Isip wanppa ele kayak hambuppuak noolagppa dup nona binalag meppig ele amu, ag kayak hambuppuak amu oh agappeg goppeg, ag Yawe, Nugib waappa daan, Nug oɗe dim lamitteg!

¹⁵ Anam, amge ag Yawe waappa daan, Nug oɗe dim lamidkkulagnu oolag ii daatte dayeb, ag gemu aun dim lamidkkulagnu amu dabmak aweg! Ag mamelkad aɗi Mesopatemia daanna, kayak laala waalagpa daan, oɗe dim lamidppig, amute, o iitta, Amo danab, wan ag amuppa gemu daatteb ele, ahilag kayak waalagppa daan binalag mekkulagtai. Ag amu hekkulagtai, amge da, da baeladppa ele amu, ig Yawe waappa daatta, Nug oɗe dim lamidkkunig,” awa aum.

¹⁶ Josua nug anam aum, amu danab ah ag nob mena appig. “Ig Yawe uuidta, kayak laa waalagppa daata, ag oɗelag iinab dim lamadmata.

¹⁷ Aɗinu? Am kayak auntai laa iitta, Yawe, ihinig Kayak, Nugnab ig mamenkad, amu ig ele begbeg maɗi nid daautut, Isipnu awikkom. Amu Nug nuhignu dabmettaknu kobol danab haknu elele iitta okkainab hatte, ig anidmut. Nug ig aben ohppa gomut amu dabmekka auta awewe, wan laala ig nakok gamag oppatadtata uɗimut.

¹⁸ Ig wan imu aognignu oitut amu, Yawe Nug Amo danab, ippan danab laala ele ippa daappig, amu lamattom amunu, ig ele Yawe waappa daata, Nug oɗe dim lamidkkunig. Aɗinu? Nug am ihinig Kayak.” Israel danab ah ag anam Josua amegppa appig.

¹⁹ Ag anam appig amu, Josua nug danab ah amelagppa aum. “Yawe Nug am oppiaawak daatte, Nug ahilagnu dahil doya laa aomanu doyak aɗa daatte amunu, ag Yawe, kayak laala ele waappa daan, ag oh oɗelag dim lamidkkulagnu elele iitta. Am ag tuɗid ele hipunin hekkulag dayeb, Nug ahilag nai tappe nak, ahilag hipunin elenu bu aqadkku; bu qak iittappa ii uhuqa mattama.

²⁰ Aɗinu? Ag Yawe uuidna, laa dilag kayak hambuppuak waalagppa daan, ag oɗelag dim lamidkkulag dayeb amu, Nug geha ag diia, huma aqadkku. Nug ahilagnu ena heum, amge eɗua awa, hatteb nauhkkulag,” awa aum.

²¹ Josua nug anam aum, amge danab ah ag Josuanu nai nob mena appig. “Iitta! Ig Yawe waappa daat, Nug oɗe dim lamidkkunig!” aon appig.

²² Ag anam aeg amu, Josua ag amelagppa aum. “Ag Yawe waappa daan, Nug oɗe dim lamidkkulagnu appig amunu, ag anam ii hena, ag amunu aab ele daan, uug naunab dooglag,” awa aum. Nug anam a amu, ag Josuanu nai nob mena appig. “Yo, ig amu ii heta amu, ig beɗunigppa aab ele, uug naunab doognig,” aon appig.

²³ Aakku Josua aum. “Aria, laa dilag kayak hambuppuak ag oolagppa daatteb amu, ag loppaɗna, ag oolag oh kunum ele, Yawe, Israelnu Kayak, metteg!” awa aum.

²⁴ Josua anam a amu, danab ah ag Josua amegppa appig. “Ig Yawe, ihinig Kayak, ig Nug waappa daata, Nug oɗe dim lamidkkunig. Ig Nug aakkuib oɗe dim lamidkkunig,” aon appig.

²⁵ Ag anam aeg amu, deɗ amuppa Josua nug ag ehanatte, danab ah ag Yawe ele nug tituana nai qakkak tatam heppig bia baula, Sekem appa heppig. Nug ɗo iɗu iɗu ag dim lamidkkulagnu ele ag amelagppa aum.

²⁶ Josua nug keeke imu ohnu Kayaknu Ɗo Nai Bukppa yom. Ahilag nai laippu qakkak ag daulagppa daakkunu amu, nug men naɗi laa awa, ad ok waappa Yawenu mettid haknu peh lag guguittak meum.

²⁷ Nug anam ha, Josua nug danab ah oh amelagppa aum. “Men imuam danab nug nai oh Yawe Nug ig amenigppa mattie doyom bia daatteb. Men imuam nai oh Yawe ig amenigppa aum aakku dooppig. Anam amunu, men imuam danab laa nug laa aɗi heehe anttomnu mattiak danab daatte bia dayaya, ag eheɗ hena, Kayak pehettak ii dim lamidkkulag dayeb amu, am anam ippunadkku,” awa aum.

²⁸ Anam daye, Josua nug danab ah ahilkad wan anen anenppa maatte goppig. Wan amu ahilagnab; ag aulag.

Josua, ikki danab laala ele ag mauhadppig

²⁹ Amu heum dimppa, haen elab iitta amu, Josua, Nan Bekka, Yawenu maɗi nid, nug maɗ 110 ele dayaya mauhom.

³⁰ Nug mauhe amu, ag nug wan nuhigppa, amuam nug augppa aab Timnat Sera, appa boumppig. Aab amuam Epraim wanppa, laih Gas qaukoppanu yawalti uɗitteppanu, qauko qauko daattebppa appa dayom.

³¹ Josua nug bau dayeye, Israel ag Yawe waappa daan, Nug oɗe dim lamidppig. Amu haen nug mauhe, ag anamib hedappig. Heegeg ukke, Yawe Nug ahilagppa aɗi keeke oh heum amu, ikki danab ag aakku anidna malan mauhadppig dimppa, laa ag Kayak uuidppig.

³² Amu Israel ag Isip uun beppig, haen amuppa ag Josep ebehi ele maon uɗippig. Ag maon uɗin, Kanan wanppa Sekem guguittak, appa boumppig. Ag memetalag anukkanu Jakop, nug wan amu aokkunu, nug Hamor bekkod silwa men doɗo 100 matta awom. Nug wan amu awom amu, ag aguppa Josep ebehi boumppig. Anam amu, wan amuam Josep buɗubnu wan, ag aulag aakku dayom. Hamor am Sekem mameg.

³³ Amu dimppa amu Aron bekka Eleasar nug mauhe, ag nug Gibea appa boumppig. Aben amuam Epraim wanppa, qauko qauko daattebppa dayom. Ag nug bekka Pinias wan amu matu mettaeg, ag Eleasar appa boumppig.