Josua 23 - Nobonob Baibel

Bagqak nai Josua Israel danab ah dilag ikki danab amelagppa mattiom

¹ Amu Yawe Nug he, Israel ag kekeɗ laa ii baɗadna, ag ena daappig. Maɗ kuɗum ukke, Josua nug aakku kainonab meum.

² Nug kainonab ma, nug Israel dilag ikki danab, danab okkai, epeɗiak danab, amu Israel dilag ehanittak anuqak danab ele onilagppa e ukkaeg, qagmaatta, nug ag amelagppa aum. “Da gemu kainonab mein, ⌊haen elab iitta da ag uuadkkul amunu, da nai imu madikkulnu hettem⌋.

³ Yawe, ahilag Kayak, Nug ahilagnu dabmak anuqak awa, Nug diig amunu aɗi aɗi wanppan wan laalappan danab ah dilagppa heum amu, ag amu oh anidppig. Amu beum anidppignu diig am, Yawe, ahilag Kayak, Nugnab, Nug ag ehanadkkunu, Nug ahilkad kekeɗ dilagppa ban heum.

⁴ Antteg! Kanan wan imuppa amu, danab ig ii eɗadmut daatteb, amu laa ig eɗadmut ele amu, da danab amu oh dilag wan da otien, ag Israel, ag ahilkad huu okkai anen anen dilagnu, ag aulag daakkunu ag mattami. Wan amuam Jodan lenu qaban uɗitteppanu ukka Mediterenia yuppa noak, wan amu oh amu, da ag mattami.

⁵ Danab ig ii eɗadmut, ag gemu wan imuppa daatteb amu, Yawe, ahilag Kayak, Nug heeb, ag Israel, ag danab amu oh lamadkkulag. Yawe, ahilag Kayak, Nug nai ana qakkom bia, Nug heeb, ag ag lamatteb goppeg, ag amu dilag wan ahilag daakkunu aon, ag appa daaglag; danab amu ag ii daamna.

⁶ Amunu ag ɠagattag dayeg! Nai dim lamittaknu amu, ag Ɗo Nai Buk Kayak Nug Moses amegppa a, Moses nug bukppa yom amu, ag buk amuppa yaak oh daatte amu dabmettan autna aon, dim lamitteg! Ag ɗo nai amu uun, laih naɗiap-ppa, o laih nanehppa aibnab goppig.

⁷ Ag aib Kanan danab, wan imuppa daatteb ele layam daappig. Ahilkad kayak aib onilag diippig. Ag aib kayak amu onilagppa ahilag nai ɠagattag qedappig; ag aib ahilagnu dup nona binalag meppig, o ag waalagppa daan, ag oɗelag dim lamidppig.

⁸ Ag amu aib heppig. Iitta! Ag Yawe, ahilag Kayak, ag nuhignu oo metta ii uuak kobol heegeg uɗie, gemu ele hetteb, ag amuib heig!

⁹ Amu Yawe Nug ahilagnu he, wanppan wan laala, ag ahilkad daup am ɠagattagnab ele, danab amu ag Israel ag lamadppig; wan imu oolagppanu amu, huu auntai laa, anukka, gemu ⌊nai imu yaak haenppa⌋ ele, ag ag lamadkkulagnu elele iitta laa ii dayom.

¹⁰ Yawe, ahilag Kayak, Nug ag ehanadtte. Nug ahilagnu anam hekkunu nai ana qakkom amunu, ag anen anen kekeɗ 1,000 lamadtteb.

¹¹ Ag Yawe, ahilag Kayak, ag nuhignu oolag mauhkkunu, ag dabmettan autna aweg!

¹² Aɗinu? Ag nuhignu oolag ii mauheb, ag Nug dimettana, ag Kanan wan imuppan huu laala ag ii lamadppig daatteb, ag ag ele layam batan, ag ele oo akkak daan, ag ele ewau dayaknu matulak hekkulag amu,

¹³ ag imu tutukkunab doyeg! Yawe, ahilag Kayak, Nug baula heeb, ag Israel, ag Kanan danab ii lamadmana. Iitta. Ag anamib daanna, eheɗ hekkulagnu eeɗadnana, ag am uhui, o pelem bia, ag Israel, ag amuppa tekkulagnu daaglag. Ag heppeg, ag Israel, ag am danab nug qaietta ugakka, qettippa guittak dootte, ag amubia doonna daaglag. Ag qaun laa amegppa ya daatte, ag ahilagppa anam bia daaglag. Wan imuam enanag, Yawe, ahilag Kayak, Nug ag madatte, amge ag Kanan danab ele laippu daaglag dayeb amu, Yawe Nug heeb, ag Israel ag ippa ii daamna. Ag wan imuppanu iitta mekkulag.

¹⁴ Nakok laa ele amu, danab kaino ag mauhtteb bia, da mauhkkul. Ag oolag unuqagppanab amu, ag nai Kayak Nug genab heeb bekkunu ana qakkom, nai amunu amu, Yawe, ahilag Kayak, Nug he, amu genab meu beum dootteb. Laippu laa iinab ii tippalom!

¹⁵ Amge Yawe, ahilag Kayak, Nug keeke ena ag madakkunu nai ana qakkom ele, Nug amu ag genab mattom, genab amubia ag nug oɗe ii dim lamidkkulag dayeb, Nug geha ahilagppa haen nau ele heeb bekku. Nug geha wan ena Nug ag mattom, Nug imuppanu ag ohnab heeb, nauhna iitta mekkulag.

¹⁶ Ag nug tituana nai qakkak Yawe, ahilag Kayak, Nug ag mattom amu, ag nai amu tippalna, kayak laa dilagppa dup nona binalag mena, ag waalagppa daan, ag oɗelag dim lamidkkulag amu, Kayak Nug ahilagnu oo nauhak okkai doyeb, ag geha laippun wan ena, Nug ag mattom ele, ag amuppanu nauhna, iitta men malaglag,” awa aum.