Josua 21 - Nobonob Baibel

Israel ag Israel dilag huu okkai Lewi aab madappig

¹ Aria, Israel dilag huu okkai Lewi, ag baelkadppan ikki danab ag mana mettak danab Eleasar, Nan bekka Josua, Israelnu baelkadppan danab okkai laala ele ⌊mattiak hekkulagnu⌋ gumadna uɗippig.

² Ag Silo, Kanan wanppa appa ⌊mattiak hekkulagnu⌋ uɗippig. Ag uɗin appig. “Yawe Nug Moses oɗeppa, ag aab laala, ig aguppa daagnignu, amu aab amunu gikkiɗah dad okkai ele, ihinkad doɗ ag amuppa daanna, gikkiɗah lakkulagnu mekkaglagnunab ippuanattom, ⌊amunu ag mekkaglagnu oɗ madattem,⌋” aon appig.

³ Yawe Nug Israel danab ag anam hekkulagnunab aum amunu, Israel ag aab laala epeɗin, Lewi danab madappig. Ag aab amu, amu aab amunu gikkiɗah dad okkai ele ag wan aulagppanu madappig.

⁴ Kohat danab ag amu, ag Lewi buɗubppan danab huu laa. Aria, Kohat buɗubppa amu, Aron, nug mana mettak danab daye, nug buɗub daaegeg, Josua nug laikkud ele ag om ena yaaeg, om ena yaak tattamnu am Aron buɗub amu, ag baelkadppan ag aab atten atten aoglagnu ippuanattom. Ag aab 13 matteg aoppig. Aab amuam tatam Israel dilag huu okkai Juda, Simeon amu Benyamin ele, ahilag daappig.

⁵ Ag Kohat buɗub amu baelkadppan aab 10 laa om ena yaakppa madappig. Aab amuam Israel dilag huu okkai Epraim, Dan, amu Manase mahaib ele, amuppan madappig.

⁶ Ag aab 13 Gerson buɗub om ena yaakppa madappig. Aab amuam, huu okkai Isakar, Aser, Naptali, amu Israel dilag huu okkai Manase mahaib, Basan daappig amu, am amu dilag baelkadppanu aon madappig.

⁷ Ag aab 12 Merari buɗubnu baelkadppa madappig. Aab amuam, Israel dilag huu okkai Ruben, Gad, amu Seblon ele, am amu dilagppanu aon madappig.

⁸ Ag anam heppig amunu, Israel ag Yawe Nug Moses oɗeppa, ag anam hekkulagnunab ippuanattom amu, ag amu aakku dim lamidna, ag aab amu, amu aab amunu gikkiɗah dad okkai ele, Lewi buɗub danab madappig. Ag om ena yaakppa anam heppig.

^9-10 Aron buɗub ag Lewi buɗub Kohat, nug buɗubppan amu, Josua aɗi ag om ena yaappig, amu om ena yaak tatam heppig am Aron buɗub amu epponattom amunu, Israel danab ag Israel dilag huu okkai Juda, Simeon ele dilah wanppanu aab imu madappig.

¹¹ Ag aab Kiriat Arba, onig laa Hebron, Juda wanppa qauko qauko daattebppa dayom amu, ag aab amu, amu aab amunu gikkiɗah dad okkai ele madappig. Arba amu Anak mameg.

¹² Israel danab ag aab okkai Kiriat Araba, amu aab okkai amunu gikkiɗah dad okkai Lewi danab madappig, amge ag dad okkai laa, amu aab naunau aab amu taliliak ele ag Kalep, Jepune bekka, nuhig daakkunu matu medappig amunu, amuam Lewi danab dilag iitta.

¹³ Israel ag aab amu aakku mana mettak danab Aron buɗub madappig; ag aab amu, aria aab amunu gikkiɗah dad okkai ele madappig. Hebron aab am ii doyaya laa qe mauhomnu ehanittak aab okkai laa. Ag Lipna,

¹⁴ Jatir, Estemoa,

¹⁵ Holon, Debir,

¹⁶ Ain, Juta amu Betsemes ele, aab amunu gikkiɗah dad okkai ele madappig. Aab Israel dilag huu okkai Juda, Israel dilag huu okkai Simeon ele wanelahppanu, ag Aron buɗub madappig amu, ahilag ebqak amu oh am eblaih waɗele.

¹⁷ Israel dilag huu okkai laa Benyamin ooppan amu, Israel ag mana mettak danab Aron buɗub aab imu ele madappig. Aab amuam, Gibeon, Geba,

¹⁸ Anatot, amu Almon, amu aab amunu gikkiɗah dad okkai ele madappig. Aab amu ahilag ebqak amu waɗele.

¹⁹ Israel danab ag mana mettak danab Aron buɗub, aab amu madappig, amu aab amu ohnu ebqak am 13. Ag aab amunu gikkiɗah dad okkai ele ag madappig.

²⁰ Amu Lewi buɗub laa, ag Kohat buɗupud laa amu, amuppan danab baelkadppanu amu, Israel ag Israel dilag huu okkai Epraim, ag aab amunu gikkiɗah dad okkai ele ag om ena yaakppa madappig.

²¹ Ag Sekem madappig. Sekem amu Epraim wanppa, qauko qauko daattebppa dayom. Aab okkai amuam danab nug ii doyaya laa qe mauhomnu ehanittak aab okkai dayom. Ag amu mattona, ag Geser,

²² Kibsaim, amu Bethoron ele, aab amunu gikkiɗah dad okkai ele madappig. Aab amu oh ebqak am waɗele.

²³ Ag amu mattona amu, Israel danab ag aab laala Israel dilag huu okkai Dan wanppanu Kohat buɗub amu ele madappig. Ag Elteke, Gibeton,

²⁴ Aiyalon, amu Gatrimon ele, amu aab amunu gikkiɗah dad okkai ele ag madappig. Aab amu ahilag ebqak oh am waɗele.

²⁵ Ag amu mattona amu, Israel danab ag Israel dilag huu okkai Manase mahaib, ag appanu aab aɗit ag madappig. Ag Tanak, amu Gatrimon ele, amu aab amunu gikkiɗah dad okkai ele madappig. Aab amu, ahilah ebqak am aɗit.

²⁶ Israel ag Kohat buɗub laa, ag ag baelkadppa aab amu, ahilkad gikkiɗah dad okkai ele madappig. Aab amu oh ebqak amu 10.

²⁷ Israel ag Kohat buɗub anam mattona amu, ag Lewi buɗub Gerson, nug buɗubnu baelkadppa, Israel dilag huu okkai Manase mahaib dilag wanppanu aab madappig. Ag Golan, Basan wanppanu, Bestera ele, amu aab amunu gikkiɗah dad okkai ele madappig. Golan am danab nug ii doyaya laa qe mauhomnu ehanittak aab okkai laa.

²⁸ Ag amu mattona, ag aab laala Israel dilag huu okkai Isakar wanppanu ele madappig. Ag Kison, Daberat,

²⁹ Jarmut amu Enganim ele, amu aab amunu gikkiɗah dad okkai ele madappig. Aab amu oh ebqak amu waɗele.

³⁰ Mattona amu, Israel ag aab laala Israel dilag huu okkai Aser wanppanu ele madappig. Ag Misal, Abdon,

³¹ Helkat, amu Rehop ele, aab amunu gikkiɗah dad okkai ele madappig. Aab amu oh ebqak amu waɗele.

³² Ag amu mattona amu, Israel ag aab laala Israel dilag huu okkai Naptali wanppanu ele madappig; amuam Galili appa aab Kades, Hamotdor, amu Kartan ele. Ag aab amu, amu aab amunu gikkiɗah dad okkai ele madappig. Galilinu aab Kedes am danab nug ii doyaya laa qe mauhomnu ehanittak aab okkai laa. Aab amu oh ebqak amu ewam.

³³ Amunu amu, Israel danab ag aab Gerson buɗubnu baelkadppa madappig amu, ahilag ebqak oh amu 13. Ag aab amu, amu aab amunu gikkiɗah dad okkai ahilag ele madappig.

³⁴ Israel ag Gerson buɗub aab anam mattona, ag ag Lewi buɗub laa Merari, nug buɗubnu baelkadppa ele aab madappig. Ag Israel dilag huu okkai Seblonnu aab laala madappig. Amuam ag Jokneam, Karta,

³⁵ Dimna amu Nahalal ele, amu aab amunu gikkiɗah dad okkai ele madappig. Aab amu oh, ahilag ebqak am waɗele.

³⁶ Ag amu mattona, Israel ag aab laala Israel dilag huu okkai Ruben wanppanu ele madappig. Ag Beser, Jahas,

³⁷ Kedemot amu Mepat ele, amu aab amunu gikkiɗah dad okkai ele madappig. Aab amu oh ebqak am waɗele.

³⁸ Mattona amu, Israel ag aab laala Israel dilag huu okkai Gad wanppanu ele madappig. Ag Ramot, Gileat wanppa dayom madappig. Ramot am, danab nug ii doyaya laa qe mauhomnu ehanittak aab okkai laa. Ag aab amu mattan, ag Mahanaim,

³⁹ Hesbon amu Jaser ele, amu aab amunu gikkiɗah dad okkai ele madappig. Aab amu oh ebqak am waɗele.

⁴⁰ Amunu aab oh, amu aab amunu gikkiɗah dad okkai ele ag Merari buɗub, Lewi buɗub laa aakku, ag baelkadppa om ena yaakppa madappig am 12.

⁴¹ Aakku Israel ag wan gumappig ele, amu ooppan aab oh Lewi buɗub madappig, amu oh ebqak am 48. Ag aab amu, amu aab amunu gikkiɗah dad okkai ele madappig.

⁴² Aab amu ohnab am gikkiɗah dad okkai taliliattak eleib; laippu laa anam iitta am iitta.

⁴³ Amunu Yawe Nug Israel mamelkad aɗi amelagppa wan amu madakkunu nai ɠagattag qetta aum amu, Nug aakku wan amu oh Israel eppelagppa me, ag aon, aguppa daappig.

⁴⁴ Amu Yawe Nug he, Israel dilag kekeɗ ag nakok laa heeg, Israel ag ii baɗadna, ag maɗoɗ, ena daappig. Yawe Nug ag mamelkad aɗi amelagppa Nug anamnab hekkunu nuhig nai ɠagattag qetta aum amu, Nug amu bianab heum. Yawe Nug Israel ehanattom amunu, ahilkad kekeɗ laa ag Israel ele ban hena, eɗadkkulagnu elele iitta daappig.

⁴⁵ Yawe Nug Israel dilagppa aɗi keeke ena hekkunu nai ana qakkom amu, Nug aakku he, meu beum. Laippu laa meu ii oum am iitta.