Josua 20 - Nobonob Baibel

Ii doyaya laa qe mauhomnu ehanittak aab okkai

¹ Amu Yawe Nug Josua amegppa aum.

² “Gemu na Israel amelagppa, da Moses amegppa ag hekkulagnu ami, na amubia appe, ag ii doyaya laa qe mauhomnu ehanittak aab okkai tituanadkkulag.

³ Aun laa nug ii doyaya laa qe mauhom amu, nug aab okkai amunu laa, nug amuppa oola ukka daakku amunu, nug ukka appa dayebeb, laa nug qe mauhak danab nob ma qeeb mauhkkunu daatte, nug danab amu qeeb mauhkkunu elele ii daakku.

⁴ Laa nug laa ii doyaya qe mauhom ele, nug aab okkai amunu laappa oola ukka, nug ikki danab dilag qagmak aben aab odppa daatte, nug appa ta, nug aab amunu ikki danab amelagppa hibaitta, nug aɗi heumnu mehuqeb dooglag. Mehuqeb doona, ag danab nug laa ii doyaya qe mauhom ele amu uuidppeg, nug aab ooppa noob, ag nug aab amuppa, ag oolagppa dayaknu aben medappeg, oh daaglag.

⁵ Amu laa nug qe mauhak danab nob ma qeeb mauhkkunu daatte, nug danab amu qeeb mauhkkunu uɗieb amu, aab amunu ikki danab ag danab amu aon, nug eppegppa qeeb mauhkkunu ii memana. Aɗinu? Nug ii doyaya danab qe mauhom. Nug hekkunu dabmaama ii heum.

⁶ Amge danab nug laa qe mauhom, danab amu nug aab okkai amuppa dayebeb, danab okkai ag hettoɗin, nug genab ii doyaya heumnu epeɗin dooglagnu hekkulag. Am nug genab ii doyaya heum anidkkulag dayeb, ag heppeg, danab layag qe mauhom, amge nug ii doyaya qe mauhom, nug aab okkai amuppa dayebeb ukkeb, mana mettak danab nug haen amuppa mana mettak ikki danab dayaya, nug ii mauhtte haenppa, danab amu nug aab okkai amuppa daakku. Amge haen amuppan mana mettak ikki danab nug mauheb amu, nug eɗua aabppa gokku,” awa aum.

⁷ Yawe Nug anam aum amunu, Israel danab ag ii doyaya laa qe mauhomnu ehanattak aab daaglagnu tituanadppig. Aab ag tituanppig ele amu, laa am Galili appa aab Kedes, aab amuam Naptali wanppa, qauko qauko daattebppa dayom. Laa am Sekem. Sekem am Epraim wanppa qauko qauko daattebppa dayom. Laa am Kiriat Arba, onig laa am Hebron. Nug Juda wanppa qauko qauko daattebppa dayom.

⁸ Jodan le, laih kaɗag uɗitteppanu Jerikonu ukkakppa amu, Israel danab ag ii doyaya laa qe mauhomnu ehanittak aab okkai imu tituanadppig. Laa am Beser. Beser am Israel dilag huu okkai Ruben wanppa, atu taɗak uɗem okkai, nakok attan daatte, amuppa dayom. Laa am Ramot. Ramot am wan onig Gileat, appa dayom. Gileat amu Israel dilag huu okkai Gad wanppa dayom. Laa am aab Golan. Golan nug Basan appa dayom. Basan amu, Israel dilag huu okkai Manase wanppa dayom.

⁹ Aab okkai amuam Israel danab, amu wan laihnu danab ele, am amu oh ahilag tituanak dayom. Aun laa nug ii doyaya, laa qe mauhom dayeb amu, nug ehanittak aab amuppa ukka dayeb, ib amuppa amu, laa nug qe mauhak danab nob ma qeeb mauhkkunu daatte am, nug laa danab qe mauhom ele paha qeeb ii mauhma. Iitta. Hettoɗiak hak malak, nug genab doyaya qe mauhom dayeb amu, danab amu nug mauhkku. Doyaya ii heum dayeb amu, nug ii mauhma.