Josua 2 - Nobonob Baibel

Josua lokkumakppa atu italak danab maatte, Jeriko goppig

¹ Israel danab ah ag aben onig Sitim appa daappig. Haen ag appa daanna, Nan bekka Josua nug lokkumakppa atu italak danab aɗit maate, Kanan wan lokkumya italkkulahnu gopiɗ. Nug aa Jeriko aab okkai italya autyanab aoglahnu aum. ⌊Jeriko am aab okkai, aɗ ele.⌋ Josua maate goya, Jeriko gopiɗ. Aa tuqan appa daaya, niiglahnu amu, aa ah laa, nug am ib baag ah onig Rahap, aa nug laugppa gopiɗ.

² ⌊Amge danab laa doyata,⌋ Jerikonu king amegppa aum. “Antte! Israel danab aɗit laa tueb imu ippa uɗipiɗ. Aa ihinig wan lokkumakppa italakkulahnu uɗipiɗ,” awa aum.

³ King Jerikonu nug anam doya, nug danab he, nai inam aon, Rahap gumidna gona, nug amegppa appig. “Danab na lautppa daattep amu, aa am wan imu oh lokkumakppa italkkulahnu uɗipiɗ amunu, na omalatppe, dimittim uɗipeɗ, aqatpput mauhkkulahnu mekke,” aon appig.

⁴ Kingnu danab ag uɗin, Rahap amegppa anam appig, amge Rahap nug matunab danab aɗit diiata lokkumatom amunu, nug aum. “Genab, danab ippa uɗipiɗ, amge da aa adeppanunab ippa uɗipiɗ amu, da ii doomi.

⁵ Tuqan aab okkai aɗnu od manak haenppa danab amu gopiɗ. Da ib attem gopiɗ amu, da ii doottem. Paha dim lamateg! Aɗinu? Ag anam hekkulag amu, ag anatna aɗalatkkulag,” awa aum.

⁶ Danab king he uɗippig amu, Rahap nug amelagppa anam aum, amge nug matu lokkumakppa atu italak danab aɗit amu diiata, lag koɗokko, uɗem ukkak amuppa lokkumatom. Nug plaks gumu lag koɗokkoppa duqak niitte, amuppa tonata lokkumatom.

⁷ Rahap nug anam a, kingnu danab ag aab okkai uun, dimittim gona, lokkumakppa atu italak danab aɗit mattialatppig. Ag gona, ib laa Jodan leppa gotte, ag ib amuppa neekkeg ukke, Jodan leppa, le baag qak daattebppa batappig. Amu haen ag aab okkai uun, dimittim ukkaeg amu, danab ag aabnu aɗ od maippig.

^8-9 Danab aab okkaippanu ag anam heppig, amge lokkumakppa atu italak danab aɗit aa ii niipiɗppa, Rahap nug lag koɗokko uɗem ukkakppa ta, amelahppa aum. “Yawe, Nug wan imu ag Israel danab ah mattom, ig ahilagnu baɗattem; ge, ig, ig wan imuppan danab ah oh, ig ahilagnu baɗak okkai doottem amu, da amu doottem.

¹⁰ Ig ahilagnu baɗak okkai doottemnu diig am, Yawe Nug ehanatta, haen ag Isip uun bena uɗieg Nug he, Le Kokoɗ qaɗaiettom. Aria, Amo dilag king aɗit, aa Jodan lenu kaɗag uɗitteppanu daapiɗ amu, ag Israel, ag attem haatppig amu, ig amu ele doomut. Ag king aɗit amu, Og, Sihon ele, ag aa, amu danab ah wan ahilti, amuppa daappig ele, ag heeg, ag oh Yawenuib nuhig pelemppa daappig.

¹¹ Haen ig ag king aɗit, ahilti danab ah ele dilagppa heppig doomut amu, ag Israel, ahilagnu amu, ig baɗak okkai doota, ooppa ɠagattag doyak ihinig iitta meum. Aɗinu? Yawe, ahilag Kayak, Nug hab aabppa Kayak daatte, ippa wanppa ele Kayak daatte.

^12-13 Anam amunu, da inam hekkulahnu aa oɗ matattem. Da ahilahnu oo bodoettak doyen, ena hatami amunu, aa Yawe onig aoya, Nug onigppa ahilah nai ɠagattag qeya mattiya, da mamel baekkudppan dilagnu oo bodoettak dooya, ena heigkkulahnu oɗ matattem. Aa da amelppa nai amu ɠagattag qeya madipeɗ, nai amuam aa hepeɗ, da, da mamel, anil, awalad, lailad, apalad, makkelad, o aun laa oh ahilagnu amu, ag Israel ag uɗin, wan imu aonna, ag ig ii iqamna, ag heppeg ig ii mauhmatanu at ɠagattag daakkunu oɗ matattem,” awa aum.

¹⁴ Nug anam a amu, lokkumakppa atu italak danab aa apiɗ. “Aakku! Ig Israel, ig wan imu aopput, na, nahipad ele ag mauhkkulag dayeb amu, Yawe Nug i niteb mauhkkunihnu oonig daatte! Na auntai laa i aɗi aɗi hettepnu, na nug amegppa ii akkut dayeb amu, haen Yawe Nug wan imu ig mekkebeb, ig nahipnu oo bodoettak doota, ena hetata, oo metta ii uuak kobol ele nahipnu dim lamidkkunig,” aoya apiɗ.

¹⁵ Amu Rahap laugnu gilil laa am, aab okkai amunu aɗ laih laa dayom amunu, lokkumakppa atu italak danab aɗit aa anam aeh, Rahap nug aa gililppa ulah ibuppanu muɗi aɗeɗe, wanppa aab dimittim nopiɗ.

¹⁶ Haen aa ii nopiɗppa nug aa amelahppa aum. “Laa ag aɗalatkkulagnu oitteb ele amu, ag aa ii anatmananu, aa qauko nakokppa goya, lokkumya daapeɗ, deɗ ewam uueb, ag eɗun aab okkaippa uɗippeg amu, aa danab ah ahilti eɗuya gumadya ukkeɗ!” awa aum.

¹⁷ Haen nug anam a amu, lokkumakppa atu italaknu danab nug amegppa apiɗ. “Na hee, i Yawe onig aoɗ, ihinih nai Nug onigppa ɠagattag qettaɗ amuɗ, amuam nai ɠagattag, amge na imuppa ii hekkut dayeb amu, nai amuam ɠagattag ii daama.

¹⁸ Haen ig wan imu aɗagnignu uɗipput, na muɗi kokoɗnab imu aon, gililppa ulah ippu imuppa paɗaite nottep ele amu, na amuppa qagakkutoitte. Aria, ele amu, na mamen, anin, awanad, laipad, na nahipad amu oh diiaɗppe, laut ooppa nona dayeg! Na anam hekkut amu, nai qemut am ɠagattag dayeb, ig dim lamidkkunig. Na anam ii hekkut amu, nai ig qemut am ɠagattag ii daama.

¹⁹ Haen ig uɗignig, haen amuppa, nahipadppa aun laa nug laut uua, dimittim ba, ibppa oiyebeb, nid laa duug okku amu, amunu aab am nug nukka, nug beɗuppa daakku, i beɗunihppa iitta. Amge laa ag na ele na laut ooppa daaglag amu, laa nug guittak attem laa metteb amu, amunu aab am i beɗunihppa daakku.

²⁰ Amge na i aɗi hemuɗnu madippe amu, i nai na hee, i ɠagattag qettaɗ amuɗ am ii aɗaitma.” Lokkumakppa atu italak danab aɗit amu aa anam Rahap amegppa apiɗ.

²¹ Aa anam aeh amu, Rahap oɗelahppa awa aum, “Ahilah nai am ena, anamib dayaɗ!” awa aum. Nug anam awowa, nug he, aa gopiɗ. Aa ukkaeh, aria nug muɗi kokoɗnab gililppa ulah ibuppa qakkom.

²² Danab aɗit aa goya, qauko nakokppa deɗ ewam daapiɗ. Kingnu danab ag ib mattan gonan neegppig, amge ii anatppig amunu, deɗ ewam uue, ag eɗun, aab okkaippa uɗippig.

²³ Dimppa, deɗ ewam am male, lokkumakppa atu italak danab aɗit aa ahaya, Israel danab ah daattebppa gopiɗ. Aa qauko nakok uuadya, le mataɗya, Nan bekka Josua toppa uɗiya, aɗi ahilahppa beum amu, aa amu oh mattieh, nug doyom.

²⁴ Aa ele apiɗ, “Yawe Nug genabnab wan imu oh ig mekkom amunu, danab ah wan amuppa daatteb, ag oh ihinignu baɗak okkai dootteb,” aoya apiɗ.