Josua 18 - Nobonob Baibel

Josua, nuhig ehanittak ele, ag Israel laala ele oh wan madappig

¹ Amu dimppa, Israel danab oh ag Silo appa qagmena, ag appa mettid haknu peh lag danab ah appa qagmetteb ele, ag lag amu qabappig. Israel ag Kanan danab eɗadna, gemu ag wan amu guman daappig, ⌊amunu Kanan danab, ag Israel ele ban baula haknu dab-ii-meppig⌋,

² amge Israel dilag huu okkai eblaih aɗit ele ag Josua aɗi ag ahilag wan otiadna mattaglagnu ii anana, ag gona Kanan danab ah appa daappig ele amu ii eɗadppig. Wan amuam ag aulag daakkunu dayom.

³ Am anam dayom amunu, Josua Israel amelagppa aum. “Yawe, ag mamelkad aɗi dilag Kayak, Nug wan imu ag mattom. Ag matu danab ag wan imuppa daatteb ele eɗadna, ag eppelagppanu wan amu ahilag daakkunu aolob. Am haen gane laa ele ukkeb, ag anam hekkulag?

^4-5 Anam amu, ag Israel dilag huu okkai eblaih aɗit ele, ag ahilag wan ii aoppig, ag anen anen danab ewam ewam otiadppeg, da ag maadppi gona, ag wan laala ii awak ele amu italadkkulag. Ag wan amu oppatppeg, maha eblaih aɗit ele daappeg, ag maha anen anen attem daatteb, maha anen anenppa aɗi daatte amu pepappa yaan, yaak amu aon eɗun, da gumiɗna uɗiglag. Danab ag amu hetteb ag Juda wan aoppig daatteb, wan amu yau uɗitteppanu daatte amu, Josep buɗubnu wan aoppig daatteb, Juda wannu yawalti uɗitteppanu daatte amu, ag wan maha aɗit amuppa ii oimna; wan amunu dottog keeke ele ii hemana. Wan ag italkkulag amu, wan amuam Israel dilag huu eblaih aɗit ele dilag wan, ag aulag daakkunu daakku.

⁶ Ag anam wan maha eblaih aɗit ele dottog keeke hena, aon uɗin meɗappeg, da geha Yawe, ihinig Kayak, da Nug noobppa om ena yaak heppi, huu anen anen ag maha atten atten awaknu ippunikkeb, ig ahilag doognig.

⁷ Wan maha eblaih aɗit ele aakkuib daaglag. Aɗinu? Lewi buɗub ag geha ag oolagppa wan laa ii aomna. Aɗinu? Ag am Yawenu uɗat henana, amuppanu teppu keeke aon, amu ahilag uɗatppa keeke laala ele aoglag; amu keeke amuam ag aulag daakku. Israel dilag huu okkai laa Gad, Ruben, amu Israel dilag huu okkai Manase mahaib laa, ag matu wan, ag aulag daakkunu aoppig. Moses, Yawenu maɗi nid, nug Jodan le laih kaɗag uɗitteppanu, appa nug wan amu ag mattom,” awa aum.

⁸ Josua nug anam a, danab ag digmena, wan italnan oiglagnu daaegeg amu, Josua nug ag amu hekkulagnunab amelagppa inam aum. “Ag gona, wan amu italna tappan gona, ag italak henana yaan, ag aon uɗippeg, da geha Silo ippa, Yawe noobppa om ena yaakppa hein, wan amu anen anen huu atten atten amu madakkul,” awa aum.

⁹ Josua anam a amu, danab amu ag amelagppa anak bia, ag wan atu oh obateg, eblaih aɗit ele beebe, ag buk itoɗiakppa yaaeg noono, aab ele onilag aben aben yaaeg noum. Ag anam hena amu, ag haen tutu dayaknu aab kalakppa, Silo appa Josua gumidna goppig.

¹⁰ Silo appa amu, Josua nug Yawe noobppa, om ena yaak ha antta, nug Israel dilag huu okkai eblaih aɗit ele, nug amu dilag danab ah wan mattom.

Josua, nuhig ehanittak ele ag Israel dilag huu okkai Benyamin wan madappig

¹¹ Josua nug om ena yaak tatamnu ha antta, om ena yaak ippunittom bia nug wan maha tatamnu am Israel dilag huu okkai Benyamin baekkudppa mattom. Ahilag wan amu Josua, nuhig ehanittak ele ag Juda, Josep ele huu dilag wan gamagppa makkula mattom.

¹² Benyamin dilag tom laih yawalti uɗitteppanu am Jodan le baegppa digmeum. Appanu amu, Jeriko guguittak waum; Jeriko am Benyamin dilag wan ooppa dayom. Tom appanu amu, qaban uɗitteppanu ukka, wan qauko qauko eleppa ukka ukka, atu taɗak Betawen, appa ukkom.

¹³ Appanu amu, tom eɗua yau uɗitteppanu ukka, Lus waum; Lus onig laa am Betel. Amu appanu ukka Atarot Adar waum. Aria, tom nug Atarot Adarnu ukka, qauko nakok Bethoron Honapnu, yau uɗitteppanu, qauko amu igippa ta ukkom.

¹⁴ Appanu amu, tom am laih yau uɗitteppanu ukka, qauko nakok amu heqo laih qaban uɗitteppanu, appa ukka, Kiriat Bal appa batom. Kiriat Bal, onig laa am Kiriat Jearim, amuam aab laa Israel dilag huu okkai Juda dilag. Amuam Israel dilag huu okkai Benyamin dilag qaban uɗitteppanu tom aakku.

¹⁵ Aria, yau uɗitteppanu tom am Kiriat Jearim aab gigin qaban uɗitteppanu digma ukka, Neptoa guguittak, le qeppuɗia betteppa waum.

¹⁶ Appanu amu, tom nug ukka, oolnu noak onig Hinom Bekkanu Oolnu Noak, amu daugppa, qauko daatte, amu diigppa waum. Oolnu noak onig Hinom Bekkanu Oolnu Noak am oolnu noak onig Repaim, appanu yawalti uɗitteppanu, laih amu guguittak daatte. Tom amu appanu amu, am oolnu noak onig Hinom Bekkanu Oolnu Noak matta ukka, wan maha laa taata, Jebus danab daatteb guguittakppa ta, wan amu oppata ukka, Enrogel waum.

¹⁷ Enrogelnu amu, tom nug laih yawalti uɗitteppanu ukka, Ensemes wana ukka, Gelilot waum. Gelilot am qauko ikki oppoɗu noak onig Adumim guguittak. Appanu amu, tom am ukka, Bohannu men appa waum. Bohan am Ruben bekka laa.

¹⁸ Appanu amu, tom amu ukka, qauko nakok, Betarabanu yawalti uɗitteppanu daatte, amu heqoppa ukka, ele atu onig Araba waum.

¹⁹ Anam atu taɗak matta ukka, qauko nakok Bethoklanu yawalti uɗitteppanu daatte, appa ukka amu, Mauhak Lenu, yawalti uɗitteppanu, yu noa batatte amuppa waum. Jodan le oɗe amuppa daatte. Amuam yau uɗitteppanu tom aakku.

²⁰ Jodan le amu, laih kaɗag uɗitteppanu, Israel dilag huu okkai Benyamin dilag wannu tom dayom. Amuam wan Josua aɗi ag Israel dilag huu okkai Benyamin baekkudppa madappig. Wan amuam ag aulag daakkunu mattak.

Aab, Josua aɗi ag Benyamin madappig

²¹ Josua, nuhig ehanittak ele ag Israel dilag huu okkai Benyamin baelkadppa aab madappig. Aab okkai amuam, Jeriko, Bethokla, Emek Kesis,

²² Betaraba, Semaraim, Betel,

²³ Awa, Para, Opra,

²⁴ Kepar Amoni, Opni, Geba ele. Aab amu oh ebqak amu 12. Aab naunau laala ele aab amu talilittak daappig amu, ag aab amu ele ag madappig.

²⁵ Josua aɗi ag aab laala ele ag madappig. Amuam Gibeon, Rama, Berot,

²⁶ Mispa, Kepira, Mosa,

²⁷ Rekem, Irpel, Tarala,

²⁸ Sela, Haelep, Jebus, onig laa am Jerusalem, Gibea, Kiriat Jearim ele madappig. Aab amu oh ebqak amu 14. Aab naunau laala aab amu taliliattak daappig amu, ag amu ele ag madappig. Wan imu aakku, ag aulag daakkunu, Josua, nuhig ehanittak ele, ag Israel dilag huu okkai Benyamin baelkadppa madappig.