Josua 17 - Nobonob Baibel

Josua, nuhig ehanittak ele ag Israel dilag huu okkai Manase mahaib wan madappig

¹ Josua nuhig ehanittak ele ag om ena yaakppa Israel dilag huu okkai Manase mahaib wan madappig. Aɗinu? Danab ag Israel dilag huu okkai amunu amu, ag am Josep bekka naanaeg, Manase, nug buɗub. Moses nug Gileat, Basan ele matu Jodan le laih kaɗag uɗitteppanu Makir buɗub mattom. Aɗinu? Nug ⌊bia, nug buɗub ag⌋ am ban danab ɠagattag. Makir nug am Manase bekka naanaeg, nug am Gileat mameg. ⌊Amu Makir buɗub ag am Israel dilag huu okkai Manase mahaib laa aakku.⌋

² Josua nuhig ehanittak ele ag Jodan le laih qaban uɗitteppanu Manase buɗub laa, nug buɗub amunu baelkadppa wan madappig. Baelkadppa amunu ikki danab am, Abieser, Helek, Asriel, Sekem, Heper, Semida ele. Danab amu ag am Manase, Josep bekka, nug buɗub, amu ag am nug baelkadppan ikki danab.

³ Aria, Selopehad mameg am Heper. Heper mameg am Gileat. Gileat mameg am Makir. Makir mameg am Manase. Amu Selopehad nug bekka iitta, nug aɗekkud ele aakkuib. Amu nug aɗekkud ag onilag am Malah, Noa, Hoglah, Milkah, amu Tirsah ele.

⁴ Am anam daye amu, ah amu ag mana mettak danab Eleasar, Josua Nan bekka, amu Israel dilag ikki danab ele gumadna uɗin appig. “Yawe Nug Moses amegppa, ig wan laa ig mamenkad nakok bekkalkad ele oh, ig aunig daakkunu ig alankad amelagppa mekkaglagnunab aum,” aon appig. Ag anam appig amunu, Josua nug wan laa ag aulag daakkunu, Yawe anam haknunab aum bia, ag mamelkad nakok bekkalkad ele oh wan madappig.

⁵ Josua aɗi ag wan madappig amunu, Israel dilag huu okkai Manase, ag am wan maha 10 Jodan leppanu, laih qaban uɗitteppanu aona, amu Jodan le heqo laih Gileat, Basan ele amu aoppig, ⌊amunu ahilkad wan maha ebqak oh amu 12.

⁶ Amu beumnu diig am, Josua aɗi ag Selopehad aɗekkud, Manase buɗubppanu amu, nug ag wan ag aulag daakkunu ag mamelkad nakok bekkalkad ele oh madappig. Moses nug matu Gileat wan Manase buɗub maha laa ag mattom.

⁷ Israel dilag huu okkai Manase mahaib, Jodan le heqo laih qaban uɗitteppanu daatte amu, ahilag wan tom am, Aser appa digma ukka, Mikmetat waum. Mikmetat amu Sekemnu laih kaɗag uɗitteppanu daatte. Mikmetatnu amu, tom nug laih yau uɗitteppanu ukka, Entapua guguittak, le qeppuɗia betteppa, danab ah laa ag appa daatteb, appa batom.

⁸ Wan Tapua talilitte amu, Israel dilag huu okkai Manase mahaib, am ahilag, amge aab Tapua, am Israel dilag huu okkai laa Epraim dilag dayom. Tapua am Manase, Epraim ele dilah tomppa dayom.

⁹ Tapua le qeppuɗia betteppanu amu, Manase tom nug Kana oolnu noakppa, laih yau uɗitteppanu ukkom. Appanu amu tom amuam oolnu noak amu daug yawalti uɗitteppanu aiɗa ugakka ukka Mediterenia yuppa noum. Aab laala Manase dilag wanppa daappig amu, am Israel dilag huu okkai laa Epraim dilag daappig.

¹⁰ Wan laih Kana oolnu noakppanu yau uɗitteppanu amu Epraim dilag dayom, oolnu noak wan laih yawalti uɗitteppanu amu Israel dilag huu okkai Manase dilag dayom. Mediterenia yu amu Manase dilag tom laih qaban uɗitteppanu dayom. Aser dilag wan am Manase dilag wanppanu laih yawalti uɗitteppanu, appa dayom. Israel dilag huu okkai Isakar, ahilag wan amu Manase wanppanu laih kaɗag uɗitteppanu, appa dayom.

¹¹ Josua, nuhig ehanittak ele ag aab laala, am aab naunau aab amu taliliattak daappig ele, ag Israel dilag huu okkai Isakar, Aser ele dilah wanppa daappig amu, ag aab amu Israel dilag huu okkai Manase ele madappig. Aab amu onilkad amu, Betsan, Ibleam, Dor, onig laa am Napot Dor, Endor, Tanak, Megido ele. Aab naunau laala ele aab amu taliliattak daappig amu, ag aab amu ele ag madappig.

¹² Ag aab amu Manase buɗub madappig, amge Kanan danab ag wan atu amuppa daaglagnu dabmak aoeg ɠagattag eppe heppig amunu, Manase ag Kanan danab amu eɗadppeg goppeg, aab amuppa daaglagnu elele iitta.

¹³ Amge dimppa, haen Israel ag ɠagattag ele bena daanna amu, ag Kanan danab duttunadna heeg, ahilkad maɗi nid daappig. Amge ag danab amu, ag ag ii lamadppig.

¹⁴ Aria, Josep buɗub ag Josua gumidna gona appig. “Yawe Nug itikke, ig apattata, kuɗumnab daattem, amu na aɗinu om ena yaakppa wan maha laippuib, ig aunig daakkunu mekkame?” aon amegppa appig.

¹⁵ Ag anam amegppa aeg amu, Josua nug ag amelagppa aum. “Ag genab kuɗumnab amubia daatteb dayeb amu, ag Epraim wanppa, qauko qauko daattebppa, wan maha amu ahilagnu elele iitta daatte amunu, ag wan ad kuɗum daattebppa, wan amuam Peres danab, Repaim danab ele dilag amu, ag wan amu oppeg, amahalebeb, elele dayeb, ag ele aguppa dayeg!” awa amelagppa aum.

¹⁶ Josua nug anam aum, amge Josep buɗub ag appig, “Wan maha qauko qauko ele am ihinignu elele iitta. Amge Kanan danab ag qauko diigppa, uɗem okkaippa daatteb, ag atu amu mameg daatteb amu, ag bannu karis aenppa hak ele. Ag danab ɠagattag, ig eɗigkkulag elele. Ag Betsan, aab amu taliliattak aab naunau ele, amu oolnu noak onig Jesril ele, amuppa daatteb,” aon appig.

¹⁷ Ag anam Josua amegppa appig, amge nug Israel dilag huu okkai Epraim, Manase ele, Josep buɗub, nug ag amelagppa aum. “Ag am genab kuɗumnab daatteb, ag am ɠagattagnab ele amunu, ig om ena yaakppa wan maha laippuib ii mattamta,

¹⁸ Iitta. Wan laa ele mattagnig. Ig wan maha qauko qauko ele mattamut; geha ig wan maha qauko qauko ele, amge ad kuɗum ele, ig gemu wan maha amu ele, ahilag daakkunu madattem. Aɗinu? Ag oppeg, amahalebeb, elele dayeb, wan amu ohnab ahilag daakku. Ele amu, laih laa, Kanan danab ag genab ɠagattag daatteb, ag bannu karis aenppa hak ele, amge ag ag lamadkkulag,” awa aum.