Josua 14 - Nobonob Baibel

Josua aɗi ag Jodan leppanu qaban uɗitteppanu wan dayom amu otippig

¹ Nan bekka Josua, mana mettak danab Eleasar, amu Israel dilag huu okkai anen anen dilag aab igippan ikkilkad danab ag wan laala Kanan appa daappig amu panin, Israel danab ah madappig am iikku. Wan amuam ag aulag daakkunu dayom.

² Danab ag wan paninna, Israel dilag huu okkai eblaih waɗele, amu Israel dilag huu okkai mahaib laa ele ag aoppig amu, danab amu ag om ena yaan, wan, ag aulag daakkunu panippig. Yawe Nug Moses oɗeppa ag anam hekkulagnunab ippuanattom amu, ag aakku heppig.

³ Josua aɗi ag Israel dilag huu okkai eblaih waɗele, amu Israel dilag huu okkai mahaib laa aakkuib wan amu mattomnu diig am haen matu, Moses nug Israel dilag huu okkai aɗit laa, amu Israel dilag huu okkai mahaib laa ele, ag wan Jodan le laih kaɗag uɗitteppanu, ag aulag daakkunu amu mattom, amge nug Lewi buɗub amu, nug ag wan laa, ag aulag daakkunu ii mattom.

⁴ Nug wan laippu, ag oh aguppa daaglagnu ii mattom. Iitta. Nug ag aab, ag aguppa daaglagnu, amu aab amunu gikkiɗah dad okkai, ahilkad doɗ ag daanna gikkiɗah lakkulagnu ele mattom. Nug anam heumnu diig am, Israel dilag huu okkai Josepnu, huu amu obatak aɗit bepiɗ. Huu amu ag am Manase, Epraim ele ⌊amuppan Israel dilag huu okkai 12 wan aon daappig.⌋

⁵ Israel ag anam heppig amunu, ag Yawe Nug Moses amegppa haknunab ana, ⌊ag om ena yaakppa wan paniglagnu aum⌋ bia, ag hena, ⌊ag oolagppanu laa uɗat amu hekkulagnu daappig amu,⌋ ag wan panippig.

Kalep, Josua amegppa wan laa medakkunu oɗ mettom

⁶ Anam dayom, amge amu oh ii nak haenppa, Israel ag Gilgal appa daanna, haen amuppa Israel dilag huu okkai Juda danab laala ag Josua gumidna goppig. Ag gona amu, Jepune bekka Kalep, Kenis ted, nug Josua amegppa aum. “Haen ig Kades Barnea daautut amu, Yawe Nug Kayaknu danab Moses amegppa da na ele, ihinihnu Nug aɗi aum amu, na doottem.

⁷ Da dahil maɗ 40 ele daaiyi, Moses, Yawenu maɗi nid, nug Kades Barnea appanu, da Kanan wan itale anidkkulnu meiɗe gomi. Nug he, da ukken, wan amu anttoya, eɗue uɗien, Moses toppa wain, wan amunu nai ena nug amegppa mattiyi doyom. Am da nai ena amunu oolppa genab doomi, hambuppuak laa ii mattimi.

⁸ Da wan amunu anam aakku mattimi, amge da lailad, da ele oh gomut ele amu, ag ahilag naippa heeg, danab ah ag eheɗ baɗappig. Amge dahilnu amu, da Yawe, dahil Kayak, da meul ohppa Nug oɗe dim lamidmi.

⁹ Da anam hemi amunu, deɗ amu Moses nug dahilnu nai imu ɠagattag qetta aum. ‘Na Yawe, dahil Kayak, na Nug oɗe meut ohppa dim lamidme amunu, ⌊wan maha laa,⌋ na tappan oime ele amu, wan amuam nahip, na buɗunad ele, ag aulag daakkunu ahilag daakku,’ awa aum.

¹⁰ Gemu, na anidttem, Yawe Nug da ehaniɗe, da bau daattem; Nug hekkununab nai ana qakkom bia. Amu Nug nai amu Moses amegppa a nug da amelppa ana qakke uɗie, gemu maɗ 45 iikku awom. Haen amuppa ig Israel danab, ig atu taɗakppa oiyak uɗat hemut. Gemu am da dahil maɗ 85 ele daattem.

¹¹ Da haen matu ɠagattag ele daaiyi, Moses nug meiɗe gomi, amu ɠagattag amubiaib gemu ele ina daatte. Anamib da gemu ele oiyeye, ban heinna daakkulnu elele.

¹² Amunu, na da wan maha qauko qauko ele umu, Yawe Nug dahil daakkununab deɗ amuppa nai ana qakkom amu, na amu meɗakutnu oɗ medattem. Aɗinu? I lokkumakppa atu italak danab daaɗ oiyuɗuɗ, i lainti laa ag Anak danab ag aab okkai, ag am aab ɠagattag aɗ ele amuppa daaegeg, ag amunu mattiegeg, na doome, amge Yawe Nug da ele daagnih, amu Nug heeb, da geha Nug aumbia, da wan amuppan danab lamatten eɗadkkul,” awa aum.

¹³ Kalep nug anam aum amunu, Josua nug Jepune bekka Kalep ititta, Hebron nug aug daakkunu nug mettom.

¹⁴ Jepune bekka Kalep, Kenis ted, nug meu ohppa Yawe, Israel dilag Kayak, Nug dim lamittom amunu, Hebron, am nug buɗub dilag ina daatte.

¹⁵ Am Kalep nug Anak danab Hebron daappig ii lamattom haenppa uɗiak, haen imuag amuppa danab ag aab amunu Kiriat Arba appig. Onig amuam Anak danab onig, binag okkainab, laa oh eɗattak ele onig Araba, nug onig ataɗppig. Israel ag wan amu oh aɗadna malana amu, ag maɗoɗ daappig.