Josua 13 - Nobonob Baibel

Kanan wan laala eɗatta awaknu

¹ Haen Josua nug danab kaino meum amge nug ɠagattag ele amu, Yawe Nug amegppa aum, “Na danab kaino mettem, me Kanan wan kuɗum, Israel ag Kanan danab appa daatteb ele, ag ag eɗadna, wan amu ag eppelagppanu aoglagnu daatteb.

² Wan Israel danab ag aoglagnu daatte am inam. Pilistia danab, Gesur danab ele, amu dilag wan atu oh.

^3-4 Wan amuam Kanan danab dilag wan maha laa aakku. Wan amunu tom am, le Siho, appanu yawalti uɗitteppanu ukka, Ekron wana batak. Le Siho amu, Isipnu tom, Isipnu laih kaɗag uɗitteppanu daatte. Amu Pilistia dilag aab anuqak tanig ele, Gasa, Asdot, Askelon, Gat, Ekron ele amu, aab amu oh wan amuppa daaegeg, ahilkad danab okkai aakku guman daatteb. Ele amu, laih yau uɗitteppanu, Awim danab dilag wan, amu ele ag eɗadna aoglagnu daatte. Aria, laih yawalti uɗitteppanu Kanan danab dilag wan, Meara ukka Apek batak, wan amu oh am ag eɗadna aoglagnu daatte. Meara am Saidon dilag aab laa, amu Apek am Amo dilag tomppa daatte.

⁵ Wan, Kanan danab eppelagppa daatte maha laa amu, amuam wan laa Gebal danab, ag aguppa daatteb. Amu maha laa amu Lebanon wan ooppa, laih kaɗag uɗitteppanu, atu amu oh. Wan amuam Balgat, appa digma ukka, Lebo Hamat batak waum daatte. Balgat am qauko Hermon guguittak, yau uɗitteppanu daatte.

⁶ Aria, wan atu laa Kanan danab eppelagppa daatte, tom laa am Lebanon dilag tom, appanu ukka, Misrepot Maim tomppa batom. Wan amuppa qauko qauko daatteb. Amuam Saidon danab dilag wan. Da dakka, da geha heppi, ag Israel ag danab amu lamadkkulag. Da anam ehanadkkul amunu, da haknunab ami, anamnab na hena, ag aulag daakkunu, na wan amu oh Israel madakkut.

⁷ Aulag wan amu oh amu, na Israel ag ahilagnab daakkunu, na panin, Israel dilag huu okkai eblaih waɗele ele, amu Israel dilag huu okkai Manase mahaib ele, na amu oh madakkut.” Yawe Nug anam aum.

Jodan laih kaɗag uɗitteppanu wan paniak

⁸ Aria, Israel dilag huu okkai Manase mahaib, amu Israel dilag huu okkai Ruben, Gad ele, ag ahilag wan, Jodan laih kaɗag uɗitteppanu, ag aulag daakkunu amu, wan amu otia mattak, wan amu Yawenu maɗi nid Moses nug matu obata otia mattom.

⁹ Wan ahilag amu, amunu tom am Arnon oolnu noak, aab Aroer am oolnu noak amu daugppa daatte, amu wan amu, nuhig tom am appa digma, oolnu noak amu, amu oolnu noak amu gamagppa aab laa appan daatte, am amu oh awa ukka, Medeba uɗemppa wana ukka, Dibon appa batom.

¹⁰ Ahilag wan amuam anam aakku daye ukke, Amonnu tomppa batom. Am Amo danab dilag king, Sihon, nug Hesbon appa daya ⌊wan amu gumom amu⌋, wan nuhig amuppa aab oh daatteb amu, Israel dilag huu amu ag aon, ahilag daappig.

¹¹ Amu Israel dilag huu okkai Manase mahaib, amu Israel dilag huu okkai Ruben, Gad ele, ag ahilag wan laih laa, amunu ukkak am, Gileat wan ⌊maha⌋, Gesur danab, Maka danab ele wanelag awa, qauko Hermon oh, amu Basan wan oh ele ukka Saleka batak.

¹² Wan amu ohnu amu, amuam Basan dilag king Og, nuhig dayom. Og nug Astarot, Edrei ele dayaya, king dayom. Moses nug appan danab eɗatta aqa, ahilag wan awom. King Og nug am Repaimnu buɗub dimnunab aakku.

¹³ Amge Israel ag Gesur danab, Maka danab ele ii lamadppig amunu, danab amu ag gemu, ⌊nai imu yaak haenppa⌋ ele, ag Israel oolagppa daatteb.

Israel dilag huu okkai Lewi, ag aulag

¹⁴ Israel dilag huu okkai laa oh ag wan awak ele, amge Moses nug Israel dilag huu okkai Lewi, nug ag wan laa, ag aulag daakkunu, ii mattom. Aɗinu? Ag ahilag uɗat am, ag qaɗabppa, aab aɗunu ofa henana, doɗ manadna, Yawe, Israel dilag Kayak, ag Nug mettaglag amunu, mana mettak amu kuɗumppanu ag maha aoglag. Ag aoglag, amu amunu teppu keeke, amuppanu awak, Yawe Nug ag amu aoglagnu nai ana qakkom, aakku keeke amu oh am ag aulag.

Wan Moses nug Israel dilag huu okkai Ruben mattom

¹⁵ Moses nug Israel dilag huu okkai Ruben, nug baegppan wan imu mattom.

¹⁶ Wan ahilag amu, amunu tom am Arnon oolnu noak, aab Aroer am oolnu noak amu daugppa daatte, amu wan amu, nuhig tom am appa digma, oolnu noak amu, amu oolnu noak amu gamagppa aab laa appan daatte, am amu oh awa ukka, Medeba uɗem okkai daug uma ukkakppa dayom.

¹⁷ Hesbon aab amu Rubennu wanppa dayom, amu aab laa ele ag appa daappig. Aab amuam, Dibon, Bamotbal, Bet Balmeon,

¹⁸ Jahas, Kedemot, Mepat,

¹⁹ Kiriataim, Sibma, Seretsahar ele. Seretsahar amu qauko nakok, oolnu noak daugppa, qauko nakok amuppa dayom.

²⁰ Moses nug Israel dilag huu okkai Ruben aab Betpeor, wan qauko Pisga igippa tak daatte, wan laih laih oh ele, amu aab Bet Jesimot ele mattom.

²¹ Matta, nug aab naunau uɗem okkai nakok attan dayom, amuppanu, amu King Sihonnu wan oh ⌊amuppa dayom ele⌋, nug amu ele mattom. Sihon nug am Amo dilag king, Hesbon appa dayom. Moses nug, nug eɗitta, nug Midian dilag okkai ele eɗattom. Ag onilag amu Ewi, Rekem, Sur, Hur, Reba ele. Danab amu ag King Sihon ele aben laippu daanna, ag nug ehanittak danab daanna, ag Sihon ehanidppig.

²² Ban amuppa amu, Israel ag danab amu, laa ele aqan, ag eman hak danab Balam, nug am Beor bekka, ag nug ele qeeg mauhom.

²³ Le Jodan am Israel dilag huu okkai Rubennu wan tom qaban uɗitteppanu dayom. Moses nug wan amu, appan aab, aab naunau aab amu taliliadppig ele Israel dilag huu okkai Ruben baegppan, ag aulag daakkunu mattom.

Moses nug Israel dilag huu okkai Gad wan mattom

²⁴ Moses nug wan imu Israel dilag huu okkai Gad baegppan ag mattom.

²⁵ Nug wan onig Jaser, amu Gileat ⌊maha yau uɗitteppanu daatte, am amunu⌋ aab oh, amu wan maha laih Amon dilag ele mattom. Aab onig Aroer am aakku Amon dilag wan tom dayom. Aroer amu Raba guguittak.

²⁶ Wan tom Gadnu laa am Hesbon appa digma ukka, Ramatmispe wana ukka, Betonim wana ukka, Mahanaim wana, Lodebar tomppa waum.

²⁷ Aria, aab Jodan oolnu noakppan daappig ele, Moses nug Gad mettom ele, amu onilag am, Betharam, Betnimra, Sukot amu Sapon ele. Amu nug Amo dilag king Sihon, nug Hesbon dayom, nug nuhig wan maha laa ele mattom. Wan amunu amu, Jodan le am qaban uɗitteppanu tom dayom. Tom wan amunu yawalti uɗitteppanu am Galili le amegppa le nodeppa, aakku.

²⁸ Wan amuppan aab, ahilkad aab naunau ele amu, Moses nug Israel dilag huu okkai Gad, amu baekkudppa, ag aulag daakkunu mattom.

Wan laa Moses nug wan Israel dilag huu okkai Manase mahaib mattom

²⁹ Moses nug wan imu Israel dilag huu okkai Manase mahaib, huu amu baekkudppa mattom. Amuam Israel dilag huu okkai Manase buɗuppud, ag obatak aɗitppa daappig, amu obatak laa Jodan leppanu kaɗag uɗitteppanu daappig, imuam ag baelkadppan wan mattak aakku.

³⁰ Moses nug wan ahilag Mahanaim appa digmekkunu ukka, Basan wan oh, amu King Ognu wan oh ele, nug amu oh ag mattom. Basan wanppa Jair wan banppa awom, amuppa aab 60 daappig, amu nug aab amu oh ag mattom.

³¹ Moses nug ag Gileat maha laih, amu Basannu King Ognu king dayaknu aab okkai, Astarot, Edrei ele ag mattom. Moses nug Gileat wan amu oh am Makir buɗubppan, ag baelkadppan danab mattom. Makir nug am Manase bekka.

³² Wan imu amu Moses nug Israel dilag huu okkai Ruben, Gad, amu Israel dilag huu okkai Manase mahaib, ag aulag daakkunu nug ag mattom. Haen amu nug Israel ele ag Moap uɗemppa, Jodan le guguittak, ag haen tutu dayaknu aab kalakppa daanna, nug wan pania ag mattom. Appanu Jeriko am qaban uɗitteppanu dayom.

³³ Nug wan amu Israel dilag huu okkai laala, ag aulag daakkunu ag mattom, amge nug Israel dilag huu okkai Lewi wan laa, ag aulag daakkunu ii mattom. Nug ag wan laa ii mattomnu diig am, Yawe, Israel dilag Kayak, Nug ag nuhig uɗat hekkulagnu, amuppa ag ee keeke, ag aulag aakku, ag amu aoglagnu nai ana qakkom.