Josua 10 - Nobonob Baibel

Israel ag yawalti uɗitteppan king eɗadppig

¹ Adoni Sedek nug Jerusalemnu king dayom. Nug Josua aab okkai Jeriko eɗitte doya, Josua nug he, Jeriko am Yawenuib nuhig pelemppa daye ele doyom. Amu nug Josua, Jeriko dilag king, nug aɗi kobol nuhigppa heum, nug amu ele doyom. Laa amu, nug Josua, Ai eɗitta he, Ainu oh am Yawenuib nuhig pelemppa dayom, nug amu ele doyom. Nug Josua, Ai dilag kingnu aɗi kobol heum amu, nug amu doyom. Josua nug aab okkai Jerikonu heum, amu nug kingnu heum, amubia Ai, amu ahilag king ele, ahilagppa heum. Am Gibeon danab ag Israel ele maɗoɗppa daaglagnu nug tituanna, nai qakkan, ag gemu Israel dilag ehanittak daatteb, amu ele Adoni Sedek nug doyom.

² Anam amu, aria Adoni Sedek nug, amu nuhikkud danab ah ele ag Gibeon danab ag Israel ele maɗoɗ daan, ag ehanadkkulagnu ele nug tituanna nai qagappig doona, ag huananab baɗappig. Ag baɗappig diig amu, Gibeon am aab okkainab; am aab laala king ele, am aab amubia. Laa amu, Gibeon am Ai eɗittak; am ele amu, Gibeon danab oh ag am daup danab ɠagattagnab.

³ Ag baɗappig amunu, Jerusalem dilag king Adoni Sedek nug nai awa ukkak danab maatte, king laala dilagppa nai aon goppig. King amu ag am, Hebron dilag king Hoham, Jarmut dilag king Piram, Lakis dilag king Japia, Eklon dilag king Debir ele.

⁴ Nug nai ahilag me ukke, amuppa nug aum. “Gibeon danab ag Josua, Israel danab ele maɗoɗ daaglagnu nug tituanna nai qagappigde! Ag anam heppig amunu, dona ehaniɗppeg, ig ag banelag gokkunig!” awa aum.

⁵ Nug nai anam me ukke, Amo dilag king tanig ele amu, amuam aab Jerusalem, Hebron, Jarmut, Lakis amu Eklon ele, ahilkad king, ag nai amunu oolag laippu mena, ag laippu daaglagnu qagmena, ag oh aɗa mak gona, Gibeon ele ban hekkulagnu dabmeppig. Anam amu, amu dilag king ag heeg, ban daup ahilkad oh ag aben ban hekkulag ele, ag amuppa teeg, ag Gibeon ele ban heppig.

⁶ Ag anam heeg, Josua nug Gilgal appa dayeye, Gibeon ag nai nuhignu laippun meeg ukkom. Nai meeg ukke appig. “Amo dilag king oh ag laih qauko qauko eleppa daatteb ele, ag aɗaeg o, ig banenig uɗin daattebde! Anam amunu, na pahanab uɗin, ig ehanikke! Na ig, nahip maɗi nid maɗi ah ele, na ig aib uuigme. Ig padal mematanu uɗin ehanikke!” aon appig.

⁷ Gibeon ag nai anam aeg, Josua nug Israel ban daup oh ele ag Gilgal uun, ahan Gibeon danab ehanadkkulagnu goppig. Ban danab ena ena oh, amu ag oolagppa daappig.

⁸ ⌊Amge tatam⌋ Yawe Nug Josua amegppa aum. “Ag aib baɗadppig. Aɗinu? Da geha heppi, ag eɗadkkulag. Laippu laa ag Israel ban danab eɗadkkunu, laa iinab daama. Iittanab,” awa aum.

⁹ Yawe Nug Josua amegppa anam a, Josua nug nuhig ban daup ele ag aakku Gilgalnu ahan, tuqan amu ohppa ag oin oin, buttuanab gona, Gibeon teppig. Amo ban danab ag Israel uɗiglag amu, ag ii dabmeppig amunu, Israel ag teeg, Amo danab ag ottaippig.

¹⁰ Israel ag anam teeg, Yawe Nug Amo dilag king, ahilkad daup ele ag huan baɗaglagnu he, Israel ag Amo danab kuɗumnab Gibeon appa aqappig. Ag anam henana, Israel ag Bethoron ukkak, ibppa appa Amo lamadppig. Amu kekeɗ ag oolna ukkaegeg, Israel ag lamadna, aqaeg mauhattegeg gona, Aseka, Makeda ele batakppa appa goppig.

¹¹ Amo ag Bethoronnu oolna, ib man noegeg, Israel ag lamattegeg, Yawe Nug he, ais hab waappanu na, kekeɗ kuɗum laa aqom. Ais na aqattette, ag gona Aseka teppig. Ais amu kekeɗ kuɗumnab aqom; Israel ag qep elabppa duulag oppig, amu eɗittak ais aqom.

¹² Amu Yawe Nug Israel ag ehanatte, Amo eɗadppig, deɗ amuppa Josua nug Israel danab oh noolagppa Yawe unuqittom. Nug aum. “Da na unuqidttem. Na heppe, aam nug Gibeon amahalittak dayebeb, kalam nug oolnu noak onig Aiyalon, nug amu amahalittebeb daakkunu oɗ medattem,” awa unuqittom.

¹³ Nug anam unuqitte, aam, kalam ele aa aben aɗit amuppa daayya amahleheh, Israel ag ahilag kekeɗ eɗidna malappig. Buk laa onig Jaser, buk amuppa nai amu iite yaak daatte? Aam nug hab gamagppanab deɗ laippu anam, nug anam daya, laih ii ukkom; nug deɗ oh diigppan ba ukka, batakppa notte, amubia ii heum.

¹⁴ Genab, deɗ amuppa Yawe Nug Israel dilagnu, ag ban eɗadkkunu ehanatta, kobolnab heum amunu, deɗ anam bia laa, haen laal ii beum. Deɗ amuppa Yawe Nug Josua, Nug oɗ mettom amu, Nug amu heum, amge Nug kobol heum, anam bianab, laa dilagppa ii heum.

¹⁵ Anam daye amu, Josua nug Israel daup ele ag eɗun Gilgal, haen tutu dayaknu aab kalakppa goppig.

Josua yawalti uɗitteppan, king tanig ele aqom

¹⁶ ⌊Amge Israel ag ban eɗidna malan, eɗun Gilgal ii goppig daaegeg,⌋ ban heppig haen amuppa, king tanig ele ag oolna gona, Makeda appa wan oɗeppa nona lokkumna daappig.

¹⁷ Ag appa lokkumna daaegeg, laa ag anadppignu aeg, Josua doya,

¹⁸ nug nuhikkud danab amu amelagppa haknunab inam aum. “Ag wan oɗe amu men okkai okkaippa oɗe keldowona, danab laala maadppeg, oɗe amu gumeg!

¹⁹ Aria, laa oh ag kekeɗ ag oolna gobeppeg, lamadna gona aqeg! Aib uuadppeg, eɗun ahilkad aab okkaippa goppig. Aɗinu? Yawe, ahilag Kayak, Nug ag danab amu eɗadkkulagnu, eɗittak amu mattom daatte,” awa aum.

²⁰ Amu Josua, Israel daup ele ag Amo ban danab aqanna, daup ameg tanig ele amu ohbia aqaegeg ukke, laippu laippunab ag eɗun ahilkad aab okkai ɠagattag aɗ eleppa goppig.

²¹ Israel ag anam hewona, ag oh enaib daan, ag eɗun, ahilag haen tutu dayaknu aab kalappigppa, Makeda appa, Josua ele goppig. Goppig amu, auntai laa Israel dilagnu naittuɗ nakok laa iinab mattiom.

²² Ag gona daaeg, aria Josua nug aum. “Men okkai okkai wan oɗe keldoak amu mautattona, king tanig ele amu diin, dahilppa uɗieg!” awa aum.

²³ Nug anam a, ag king tanig ele amu wan oɗeppanu diippig. King amu ag, Jerusalemnu, Hebronnu, Jarmutnu, Lakisnu, amu Eklonnu king ele.

²⁴ Ag diin uɗieg, Josua he, Israel danab oh ag uɗieg, ⌊Josua nug he, king amu ag wanppa ukkan qena niiegeg,⌋ Josua nug ban daup ikki amelagppa aum. “Ag dona, king imu baelagppa baalkad tappalatteg!” awa aum. Nug anam a, aakku ag anam hekkulagnunab anak anamnab heppig.

²⁵ Ag anam heeg, Josua nug ag amelagppa aum. “Yawe Nug ahilkad kekeɗ oh, ag ag ele ban hekkulag ele amu, Nug imu dilagppa heumbia amu, Nug amu dilagppa hekku amunu, ag aib baɗappig; dabmakppa ele qe nak aib dooppig! Ag ɠagattag daan, oolagppa ɠagattag doyeg!” awa aum.

²⁶ Aria, Josua nug king tanig ele amu aqe, ag ag gaɗalkad ad tanig ele anen anen attan aihatteg daaeg ukke, uudoum.

²⁷ Aam noowo amu, Josua nug king gaɗalag amu diin, wan oɗe ag lokkumna daappig ele, amuppa buɗiadppeg nokkulagnu haknunab aum. Nug a, ag buɗialatteg noeg, ag men diin, wan oɗe amu keldoppig. Oɗe keldoak amu, gemu ⌊nai imu yaak haenppa⌋ ele ana daatte.

²⁸ Haen amuppaib, Josua nug aab Makeda eɗittom. Nug qep elabppa aab amunu danab ah, ahilag king ele aqom. Nug he, aab amunu danab ah ohnab ag Yawenuib nuhig pelemppa daappig; laippu laa iinab tippalom. Nug Jerikonu kingppa heum bianab, Makeda dilag kingppa heum.

Israel ag yau uɗitteppanu aab hatteg nauhppig

²⁹ Aria, Josua, Israel ele ag Makeda appa anam hewona, ag Lipna banelag goppig.

³⁰ Appa ele, Yawe Nug Israel ehanatta, Nug aab amu, am nuhig king ele ag eppelagppa meum. Josua, nuhikkud danab ele ag qep elabppa aab amu qeppig. Nug danab laippu laa ii tippalom. Josua nug Jerikonu kingppa heum bia, Lipnanu kingppa heum.

³¹ Amu Josua nug Israel ban daup ele ag Lipnanu amu, ag Lakis gona, ag Lakis ele ban hekkulagnu babaittona, ag ahan aab amu ele ban heppig.

³² Ag ban heeg, Yawe Nug Israel ehanatta, Lakis diia, ag eppelagppa meum. Deɗ ag ban digmeppigppa amu, Nug ii heum. Iitta. Deɗ ebqak aɗitppa Nug ag eppelagppa meum. Yawe Nug ag eppelagppa me, ag qep-ppa danab ah oh aqappig. Josua nug Lipna dilag heum bia, Lakis dilagppa ele anam heum.

³³ Josua nug Israel ban daup ele ag Lakis ele ban heegeg amu, Geser dilag king Horam nug nuhikkud ban daup ele ag aab amu dabmettaglagnu teppig. Amge Josuanu danab ag nug qeeg mauhe, nuhikkud ban danab oh ele aqaeg iitta meppig.

³⁴ Amu Josua, Israel ban danab ele ag anam hewona, ag Lakisnu ahan Eklon goppig. Ag appa gona, Eklon ele ban hekkulagnu babaittona amu, ag ahaeg Eklon ele ban heppig.

³⁵ Ag aab amu deɗ laippuppaib ban hena, eɗittona aon, ag qep elabppa danab ah aqadppig. Josua nug he, aab amunu danab ah ohnab ag Yawenuib nuhig pelemppa daappig; laippu laa iinab tippalom. Nug Lakis dilagppa heum bia, nug Eklon dilagppa heum.

³⁶ Ag Eklon eɗitton amu, Josua nug Israel ban danab ele ag appanu ahan, Hebron banelag goppig

³⁷ Deɗ amu ag banelag tena, ag aab okkai aona, ag qep elabppa danab oh aqadna, king ahilag ele qeeg mauhom. Josua, Israel ban danab ele ag amu hewona, ag aab naunau aab Hebron talilittak daappig ele amu, ag amu ohnab dilagppa anamib heppig. Ag danab laippu laa tippaleg, bau ii dayom. Eklon appa ag heppig bia, Hebron appa ele ag heeg, aab amu, danab ah ohnab ele ag Yawenuib nuhig pelemppa daappig.

³⁸ Appanu amu Josua nug Israel ban danab oh ele ag eɗun, Debir banelag goppig.

³⁹ Josua, nuhikkud daup ele ag aab okkai amu eɗadna, ag aab okkai amunu king ele eɗittona, ag aab naunau talilittak daappig ele eɗadppig. Israel ag Debir aqona, aab naunau talilittak daappig ele qep elabppa aqappig. Israel ban danab ag danab ah oh Debirnu, amu aab naunau talilittak daappig, appanu oh am ag heeg, ag Yawenuib nuhig pelemppa daappig. Ag laippu laa ii uueg, hamu dayom. Ag aab Debirnu, Debirnu kingnu ele amu, ag aab Lipna, am Lipnanu king ele, aria aab Hebron am Hebronnu king dilagppa heum bia, ag Debir, am nuhig king eleppa heppig.

⁴⁰ Anam daye, Josua nug aakku wan atu amu oh nug awom. King amu, danab ah ele Israel ag eɗadppig, ag ahilag wanppa daappig, wan atu amuam Negeb, wan qauko qauko ele, qauko nakok qauko okkai diigppa daatteb, qauko nakok amuam Kanan wan ooppa qaban uɗitteppanu daatteb, amu qauko okkai heqoppan ele. Nug he, wan amuppan danab ah oh am Yawenuib nuhig pelemppa daappig. Nug laippu laa uue, ii dayom. Yawe, Israel dilag Kayak, Nug anam hekkununab aum amunu, nug heum.

⁴¹ Josua nug danab Kades Barneanu ukka, Gasa batak, amu wan atu aab Gosen talilidtte ukka, Gibeon appa batak oh eɗattom.

⁴² Yawe, Israel dilag Kayak, Nug nuhikkud danab banppa ehanattom amunu, haen tutu laippu amuppaib, Josua nug king appanu eɗattowa, nug wan amu oh awom.

⁴³ Anam daye amu, Josua nug Israel ban danab ele ag eɗun, ahilag haen tutu dayaknu aab kalappigppa, Gilgal appa goppig.