Josua 1 - Nobonob Baibel

Yawe Nug Josua amegppa haknunab nai laa aum

¹ Yawenu maɗi nid Moses nug mauhom dimppa amu, Yawe Nug Nan bekka Josua, Mosesnu ehanittak danab, Nug nug amegppa aum.

² “Moses, dahil maɗi nid, nug mauhom, akkunu amu, gemu na, aria Israel danab oh ele ag da wan ag madattem ele, ag wan amu aoglagnu, ag Jodan le mataɗkkulagnu babaitteg!

³ Da nai imu Moses amegppa ain qakken ami. ‘Aben oh wan amuppa ag wakkulag amu, wan amu oh ahilagib daakku,’ ami. Da anam ami amu, amubia da madakkul.

⁴ Ahilag wan am yau uɗitteppanu atu taɗak heqoppa, appanu digma ukka ukka, yawalti uɗitteppanu Lebanon wanppa batakku. Laih laa am, aam bedeppan le naɗi onig Yupretis appanu digma, ukka ukka, Hit danab daattebppa, amu oh ukka ele, aam nodeppa appa Mediterenia yuppa batakku. Wan amu oh am ag Israel danab, ahilag daakku.

⁵ Josua, da haen oh na ele daagnih. Da Moses ele daamuɗ, amubia da na ele daagnih. Na wanppa bau daappe, haen amu ohppa laa nug na eɗidkkunu elele ii daama. Da na ii uuidpa. Da na ii paɗaidpa.

⁶ Na ɠagattag daan, ootppa ele ɠagattag doye! Aɗinu? Na danab ah imu noolag aon gona, wan umu, da wan amu imun danab ah mamelkad aɗi madakkulnu ag amelagppa dahil nai ɠagattag qein ami amu, da ehanadppi, ag wan amu, ag aulag daakkunu aoglag.

⁷ Ge, na ɠagattag daan, na ootppa ɠagattagnab doye! Na aɗi aɗi hekkutnu henana, na enaib hekkutnu na ɗo oh, dahil maɗi nid Moses na mettom ele amu, na amu oh dim lamitte! Na ib apiɗidna, na naɗiap-ppa, o nanehppa aib gome.

⁸ Na haen oh Ɗo Nai Buk imu ebqena autna awe! Na keeke oh ɗo yaak imuppa tutukku elele dim lamidkkutnu elele daakkutnu, na tuqan, amun ele ippunidtte, na amunu dabmak unuqag aonna daye! Aɗinu? Na anam hekkut dayeb amu, na aɗi aɗi hekkut amu, na heppe, ena beeb, na doyak dabmak ena ele aɗan oikkut.

⁹ Doye! Daib haknunab nai imu na iite mettami? Na ɠagattag daan, ootppa ɠagattag doye! Da, Yawe, nahip Kayak, da na adeppa gokkut amu, da na ele oh gokkunih amunu, na baɗak eheɗ nau aib doome. Nahip dabmak am qe nak aib dayom.” Yawe Nug anam Josua amegppa aum.

^10-11 Yawe Nug Josua amegppa anam a, nug danab ah dilag ikki danab ag inam hekkulagnunab ag amelagppa aum. “Ag danab ah dilag haen tutu dayaknu aab kalakppa gona oinna, danab ah amelagppa inam aig! ‘Deɗ ewam keeke uueb, ag Jodan mataɗna gona, Yawe, ahilag Kayak, Nug wan umu ahilag daakkunu madatte amu, ag amuppa gona nona, wan amu aon, mameg mekkulag amunu, ag ahilag ee babaitteg!’ aon aig!” awa aum.

¹² Josua nug danab ah dilag ikki danab amelagppa anam hekkulagnu awowa, nug Ruben buɗub, Gad buɗub, Israel dilag huu okkai Manase mahaib ele, amun danab, ag Jodan le laih daaglagnu appig ele amu, nug ag amelagppa aum.

¹³ “Ag haknunab nai Moses, Yawenu maɗi nid, nug ag amelagppa aum amu, ag nai amu dabmetteg! Nug aum. ‘Yawe, ahilag Kayak, Nug ag Ruben buɗub, Gad buɗub, Israel dilag huu okkai Manase mahaib ele, ag amun danab amu, Nug ag maɗoɗ aon daaglagnu wan imu, Jodan lenu kaɗag uɗitteppanu daatte, ag iguppa daan oiglagnu madatte,’ awa aum.

¹⁴ Moses anam ag amelagppa aum amunu, ag waalkad, ahilkad nid naunau, ahilkad doɗ keeke, ag Jodan le laih ippa Moses wan mattom imuppa daaglag, amge ag ahilag ban danab, ag bappaidna, bannu keeke oh aɗan, Israel danab ah laa noolag aon, anuqna bannu ehanadkkulagnu gokkulagoitte. Ahilkad ban danab ag Israel laa ehanadppeg ukkeb,

¹⁵ ag wan ahilag, wan amuam Jodan lenu qaban uɗitteppanu daatte, Yawe, ahilag Kayak, Nug ag madatte ele amu, ag wan amu ahilag daakkunu aon malan, aguppa ena daappeg, ag eɗun uɗin, wan imuppa, wan imuam Jodan lenu kaɗag uɗitteppanu daatte, Yawenu maɗi nid Moses nug ag wan imu mattom amu, ag eɗun uɗin, wan imuppa daaglagnu elele daaglag,” awa aum.

¹⁶ Josua anam ag amelagppa a amu, ag Josua inam oɗeppa aon appig, “Ig aɗi keeke oh hekkunignunab ame amu, ig hekkunig. Na ig adeppa ele gokkunignu appe amu, ig gokkunig.

¹⁷ Ig haen oh Moses oɗe doota dim lamidmut bia, ig na oɗen doota dim lamidkkunig. Ig oonig keeke laippunu aakkuib niitte. Amuam Yawe, nahip Kayak, Nug Moses ele daapiɗ bia, Nug na ele anam daaglahnu oonig hette.

¹⁸ Ig hepput, aun laa nug nahip haknunab nai tappeb nekku amu, nug mauhkku. Amge laippuib na hekkutnu daatte amu, na ɠagattag daanna, ootppa ɠagattag doye!” aon appig.