Jona 4 - Nobonob Baibel

Jona nug Yawe Niniwe danab dilagnu oo doyomnu oo nauhom

^1-5 Yawe Nug he, Niniwe ag ii nauhppig, amge ⌊deɗ 40 ukkeb, heeb nauhkkulagnu haen ii malak, haen amuppa amu,⌋ Jona nug aab okkai amu uua, nug aab dimittim kaɗag uɗitteppanu ukka, ulah lag laa ha dayaya, aab okkai amu attem heeb anidkkunu dayom. ⌊Aria, deɗ 40 amu ukke, Yawe Nug aab okkai amu ii he nauhom antta amu, Jona⌋ nug ena ii doya, oo nauhe, Yawe unuqitta aum. “O Yawe, da aab dahil uue ii uɗieye amu, da na inamib hekkutnu doye, da oole, Tarsis gokkulnu gomi. Aɗinu? Da doottem, na am kayak laa bia iitta. Iitta. Na, Kayak, na oo bodoette enanag maɗoɗ ele hak kobol dim lamidna, na oo bodoetta le mak kobol ele dim lamidttem. Na paha oot ii nauhtte. Nahip oo mauhak kobol am amba, leta nette. Na danab ag hipunin heppeg, na uug madakkutnu dabmenana, ⌊ag oolag eɗueb, na deɗ laala⌋ ii madattem. Yawe, na heppe, da mauhkkulnu oɗ medattem. Aɗinu? Na amu hekkut am ena. Ge, da ii mauhkkul am ena iitta,” awa aum. Jona nug anam a, Yawe Nug eɗua, nug amegppa aum. “Na oot nauhtte amu, amuam enate?” awa aum.

⁶ Aria, Jona nug anam dayeye, Yawe Kayak Nug he, aam Jona qemanu, Jona ena daakkunu, atuppan muɗi laa beum. Be amu, Jona nug muɗi amunu gamagnab ahom.

⁷ Amge wagɗe deɗ amuppa Kayak he, wan gawat laa muɗi amu diig ekkule mauɗa neum.

⁸ Dimppa aam be, Kayak he, ulah gakkaɗak ele, kaɗag uɗitteppanu amu, ulah amu uɗie, aam Jona ikki qe, ameg qittine, Yawe heeb, nug mauhkkunu unuqitta, “Da mauhkkul am ena. Ge, da ii mauhkkul amu eheɗ,” awa aum.

⁹ Nug anam aum, amge Kayak Nug Jona amegppa inam aum. “Na muɗi bunaɗom, na amunu oot nauhtte am enate?” A amu Jona nug aum. “Da ool nauhtte am ena. Da ool nauhe, guittak bia doottem amunu, da mauhkkul am ena,” awa aum.

¹⁰ Jona nug anam a amu, Yawe Nug Jona amegppa aum. “Muɗi amu tuqan laippuppa ba, okkai ma, tuqan laa bunaɗom. Na nuhignu uɗat ii heme; na nug okkai mekkunu ele ii heme, amge na keeke nakok amunu oot dootte.

¹¹ Anam amge, da ele Niniwe dilagnu dabmein, ool dootte. Aab okkai amuppa nid naunau eheɗ laa ii heppig ele kuɗum daatteb; ahilag ebqak 120,000 eɗittak. Doɗ kuɗum ele daatteb,” awa aum.