Jona 2 - Nobonob Baibel

Jona nug kakai ooppa dayaya, unuqittom

¹ Anam amu, Jona nug ⌊oo eɗue,⌋ kakai ooppa dayaya, nug Yawe, nuhig Kayak, nug Nug unuqitta inam aum.

² “O Yawe, da uug nauppa dayeye, na oninppa ei, na da baal doome. Ge! Da moɗppa niimi bia dayeye, aben amuppanu da na oninppa ei, na dahil unuqittak doome.

³ Am genab, na da buɗile, yu unuqag, appa nomi. Ge, da yu unuqagnab, appa nomi. Yu da toniɗa auta awe, da daami. Da le ooppanab daami. Koɗkoɗ attan qeum, amge da yu unuqag aakku daami.

⁴ Da anam daami amu, haen amuppa da inam ami. ‘Na da geɗilna, da ii neekkiɗttem. Ao, da nahip mettid lag nahipnu tituanak daatte, da lag amu baula ii anidpa,’ awe ami.

⁵ Haen amuppa amu, yu da toniɗa auta awe, da mauhkkulnu hemi. Ao, da yu ooppanab ukken daami. Appa amu yuppan gikkiɗah da ikkil itoɗia dayom.

⁶ Da ukken, yu ooppanu, qauko oh diilkadppanab daami. Aben amu da ataɗguiɗa auta awe, da aakku daami. Amge Yawe, na dahil Kayak, na da eɗun aiɗe, da bau daattem.

⁷ O Yawe, da mauhkkulnu hein dayeye, da nahipnu dabmein unuqitti, na nahip mettid lag nahipnu tituanak daatte, na amuppa daanna, na unuqittak dahil aakku doome.

⁸ Danab ag kayak hambuppuak, am kayak hamu, kayak genab iitta, ag ag noolagppa dup nona binalag metteb ele, ag nahip oo mauhaknab kobol waappa daaglagnu aakku uutteb.

⁹ Ag uutteb, amge da, ‘Ena heme,’ anaknu ahi laa edette, doɗ manen na medakkul. Ge, da keeke genabnab hekkulnu nai ain qakkami amu, da keeke amu oh hekkul. Yawe nukka ehanikke, ig padal ii mettem.” Jona nug anam awa unuqittom.

¹⁰ Jona nug anam unuqitte, aakku Yawe he, kakai nug Jona abuɗppa kele teum.