Jona 1 - Nobonob Baibel

Jona nug Yawenu nai tappe ne, Yawe toppanu oola ukkom

¹ Yawe Nug Amitai bekka Jona amegppa inam aum.

² “Niniwe danab ah ag hak nau huanak heegeg anadttem amunu, na ahan, aab okkainab Niniwe gona, uug naunab ahilagppa beeb anidkkulagnu mehuqppe doyeg!” awa aum.

³ Yawe Nug anam aum, amge Jona nug Yawe aum amu uua, aha oola, Tarsis aab okkaippa gokkunu ukkom. Nug aha gokkunu ukka, Jopa aabppa noa, nug uub laa Tarsis gokkunu heehe mattia antta, daden ma, uub attan ta ukkom. Nug Yawe uuitta, oola gokkunu dabmeum.

⁴ Jona anam dabmeum, amge Yawe Nug he, yuppa ulah naɗi uɗiom. Ulah huanaknab he, yu koɗkoɗ huanaknab qe, uub amu padal mekkunu heum.

⁵ Anam he, uub gumak danab ag huanak baɗana, ag oh ahan, akka akka ahilkad kayak hambuppuak unuqidppig. Amu uub uug iitta gokkunu ag ele ahan, keeke laala akkaeg, yuppa noum. Ag anam heppig, amge Jona nug matu noa, uub ooppa bet attan na qa, huana niiom.

⁶ Nug anam niieye, uubnu danab okkai nug noa, Jona amegppa aum. “Aɗinu na niittem? Ig mauhmatanu, na nahip Kayak onigppa eppe, Nug ihinignu oo doyeb ehanigkkutai,” awa aum.

⁷ Ag anam heeg ukke, uub gumak danab ag akka akka appig. “Doppeg, ig ihinig kobolppa om yaata, aun nug aɗi eheɗ heum amunu ig mauhkkunignu hettem amu, ig anidtu,” aon appig. Aakku ag om yaan gona, Jona he, yu eheɗ ahom anidppig.

⁸ Ag anam anidna amu, ag aakku Jona oɗ medappig. “Na ig uug maottem imunu diig appe dootu! Na aɗi uɗat hettem? Na adeppanu? Na am wanppan wan adeppanu? Na huu atten buɗubppanu?” aon oɗ mettan appig.

⁹ Ag anam aeg, Jona nug amelagppa aum. “Da Hibru danab. Da Yawe, Nug Kayak hab attan daatte, Nug yu, wan ele heum amu, da Nug noobppa dup noin Nug binag mettem,” awa aum

¹⁰ Jona nug anam mattia, nug ele nug Yawe uuitta, oola gokkunu heum a dooppig. Nug anam a amu, uub gumak danab ag eheɗ baɗan, ag Jona amegppa, “Na eheɗ nau heme,” aon appig.

¹¹ Ag Jona amegppa anam aeg, ulah nug tuɗitta, huanak heehe, koɗkoɗ naɗi qeeqe, uub gumak danab ag Jona oɗ mettan appig. “Ig na attem heidpput, koɗkoɗ bodoetteb, ig ena daagnig?” aon appig.

¹² Ag anam aeg, Jona nug ag amelagppa aum. “Da doottem, ulah naɗi uɗie, koɗkoɗ qak imu ahilagppa beum am da beɗulppa amunu, ag da awiɗna, buɗilppeg yuppa noppi amu, ulah nug bodoedakku,” awa aum.

¹³ Jona nug anam aum, amge uub gumak danab ag langppa eeɗkkulagnu wagai meppig. Ag anam heppig, amge ulah tuɗitta, naɗi naunab heum amunu, ag langppa eeɗkkulagnu elele iitta.

¹⁴ Ag eeɗkkulagnu elele iitta anidppig amunu, ag Yawe unuqidna appig. “O Yawe, na nakka, na oot daye, na he, yu imu aakku eheɗ ahom amunu, O Yawe, ig na unuqidttem. Ig danab imu buɗipput, yuppa noa mauheb amu, na amunu nob mena, ii iqamnanu oɗ medattem. Yo, na danab laa nug danab laa eheɗ laa ii heum ele, nug nug qe mauhtte, na nug nob medattem, na amubia ihinignu ii hemananu oɗ medattem,” aon unuqidppig.

¹⁵ Ag anam unuqittona, ag Jona aona, buɗieg yuppa no, aakku ulah, koɗkoɗ okkainab ele bodoettom.

¹⁶ Ulah, koɗkoɗ ele bodoette, ag Yawenu baɗan, ag doɗ main Yawe mettona, Yawe amegppa keeke genabnab hekkulagnu nai anan qagappig.

¹⁷ Ag anam heppig, amge Yawe Nug kakai naɗi he uɗia, Jona awa, kunum toppua ukke, Jona nug kakai ooppa noa, deɗ ewam, tuqan ewam ele anam dayom.