Jon 9 - Nobonob Baibel

Jesus danab ameg gaɗuak ehanittom

¹ Jesus Nug ukka wana, ib man ugakka, danab ameg gaɗuak ele anttom. Nug anig ooppanu ameg gaɗuak ele anam doum.

² Anam amu Jesusnu ippunittak awak danab ag amu anidna appig. “Ippunittak danab, aun nug hipunin he, anig nug danab amu ameg gaɗuak ele menuom. Nug hipunin heumte, o iitta anig mameg eletai hipunin hepiɗ?” aon appig.

³ Anam aeg amu Jesus amelagppa aum. “Danab amu nuhig hipuninppa o anig mameg ele dilah hipuninppa ameg gaɗuak ii awom, amge kobol amu beum amunu, Kayaknu uɗat amu danab amuppa miag atia bekku.

⁴ Amahlak aakku daatte amunu ig laa, Nug da meiɗe uɗimi ele amu, ig nuhig uɗat hekkunigoitte. Gatatu nekkunu haen aakku malatte, gatatu neeb amu, aun laa nug uɗat ii hema.

⁵ Da wan imuppa dayeye, da wanppan danab ah amahlak madattem,” awa aum.

⁶ Jesus anam awowa, Nug hunue wanppa no, wan ele kabolia awa, danab amegppa qataqeum.

⁷ Qataqewowa, danab amegppa aum. “Na gona, Siloam le amegppa iɗun ihe!” awa aum. Siloam diig amu me ukkak. Amunu nug ukka, iɗu ihe, ena daya neekka, nug eɗua uɗiom.

⁸ Aria, nuhig mudippan laippu, amu laikkud aab laippu laa ag danab amu nug anukka dayaya, men doɗonu unuqttom ele, ag nug anidppig amu, ag akka akka nug oɗ medappig. “Anukka danab laa nug keekenu danab unuqadttom ele amu, amuam danab imu iittate?” aon oɗ medappig.

⁹ Aeg, laa ag appig. “Nug aakkuib,” aon appig. Aeg am laa appig. “Iitta. Neekkakppaib nug danab ameg gaɗuak ele bia,” aon appig. Amge nug nukka amu, “Danab amu am da iikkuib,” awa aum.

¹⁰ Nug anam a amu ag nug oɗ medappig. “Na amen attemnab ha, ena dayom?” aon appig.

¹¹ Aeg am nug ag amelagppa aum. “Danab laa onig Jesus atteb amu, Nug wan waɗu ele kabolia amelppa mewowa, Nug da amelppa aum. ‘Na gona, Siloam le amegppa iɗun ihe!’ awa aum. Amunu da ukke iɗul ihai, amel ena daye da aakku neegmi,” awa aum.

¹² Nug anam a amu ag nug oɗ medappig. “Danab amuam adeppa daatte?” aon appig. Aeg amu nug aum. “Da ii doottem,” awa aum.

¹³ Danab nug ameg gaɗuak ele dayom anam a amu ag nug omalna, ɗo gumak danab-Parasia, ag gumadna goppig.

¹⁴ Deɗ Jesus wan waɗu ele kabolia, danab amu ameg babaittom amu, deɗ amuam Sabat deɗ.

¹⁵ Anam amunu, ɗo gumak danab-Parasia ag eɗun oɗ medappig. “Na amen amu attemnab ha ena dayom,” aon appig. Aeg amu nug ag amelagppa aum. “Danab ehaniɗom ele, Nug wan lekkoh amelppa me, da iɗul ihen, da neegkkulnu elele daami,” awa aum.

¹⁶ Danab nug anam a amu, ɗo gumak danab-Parasia laa ag Jesusnu appig. “Danab amuam Kayak toppanu ii uɗiom. Aɗinu? Nug ihinig Sabat deɗnu ɗo ii dim lamidtte,” aon appig, amge laa ag appig. “Attemun ha, danab hipunin ele Nug Kayak dabmettaknu kobol danab haknu elele iitta amubia anam hekku?” aon appig. Ag anam anana oppatna, ameg aɗit daappig.

¹⁷ Ag anam hena amu ag eɗun, danab anukka ameg gaɗuom ele oɗ medappig. “Danab amu Nug na amen babaittom amunu, na nuhignu aɗi attem?” aon appig. Anam aeg am nug aum. “Nug am propet,” awa aum.

¹⁸ Nug anam aum, amge Juda okkai ag nug anukka ameg gaɗuom, gemu nug ameg ena daatte amu, ag amunu oolagppa genab ii doona, danab amu anig mameg ele onilahppa eeg uɗieh,

¹⁹ oɗ matan appig. “Imu aa bekkalahte? Aa nuhignu nug iikkuib anukka anig ooppanu ameg gaɗuak ele doum attepte? Amu attem ha, nug eɗua neegtte?” aon appig.

²⁰ Ag anam oɗ mataeg amu aa apiɗ. “Imuam nid ihinih amu i doottep, amu i ele nug anig ooppanu ameg gaɗuak ele doum doottep.

²¹ Amge attem ha, nug aakku neegtte, o aun nug ameg he, ena dayom amu i ii doottep. Ag nug oɗ metteg! Nug okkai meum. Nug nukka nuhig nai mattieb doyeg!” aoya apiɗ.

²² Anig mameg ele aa Juda okkai dilag baɗapiɗ amunu aa anam apiɗ. Juda okkai ag tatam nai inam qagappig. “Danab laippu laa nug Jesus am Kristus akku amu, ig nug lamidpput, Juda dilag nai doyak lag uua, Kayak binag maknu elele iitta dimittim daakku,” appig amunu, aa baɗapiɗ.

²³ Ag anam appig amunu, danab anig mameg ele aa apiɗ. “Nug okkai meum, ag nug oɗ metteg!” aoya apiɗ.

²⁴ Juda okkai ag ahilah nai doon, danab amu genab ameg gaɗuak dayom, gemu ena daatte oolagppa genab dooppig amunu, ag baula ameg gaɗuak ena dayom ele onigppa eeg uɗie, ag nug amegppa appig. “Na Kayakib binag amahlak oppiaawak ele me! Ig doottem, danab amuam hipunin danab,” aon appig.

²⁵ Ag anam aeg amu nug aum. “Nug hipunin danabtai o iittatai amu da ii doottem, amge keeke laippuib da doottem. Da anukka amel gaɗuak daami am Nug he, da neegttem. Aakkuib da doottem,” awa aum.

²⁶ Nug anam a amu ag nug oɗ medappig. “Nug attemnab heum? Nug amenppa attemnab he, na neegttem?” aon oɗ medappig.

²⁷ Ag anam aeg amu nug aum. “Da matu ag amelagppa ai, ag iite dooppig? Aɗinu ag baula dooglagnu hetteb? Ag ele nuhig ippunittak awak danab daaglagnu hettebte?” awa aum.

²⁸ Nug anam a amu ag guhuɗidnana appig. “Na aakku nuhig ippunittak awak danab. Ig am Mosesnu ippunittak awak danab.

²⁹ Ig doottem, Kayak Nug Moses nai mettom, amge danab imu am adebtagnu uɗiom amu, ig ii doottem,” aon appig.

³⁰ Ag anam aeg, danab ameg ena dayom ele nug aum. “Imuam laanab, ag Nug adeppanu uɗiom ii dootteb amge Nug he, da amel obatom.

³¹ Ig doottem, Kayak Nug hipunin danab oɗelag ii dootte, amge danab aun nug genab tutukku hak danab daatte, nug Kayak oo attem niitte amu hette ele amu, Kayak Nug nug oɗe dootte.

³² Anukka digmakppanu uɗiak gemu batak amu danab laa nug anig ameg gaɗuak ele menue, danab laa ameg babaitte, ameg ena dayomnu laa ii doottem.

³³ Kayak Nug danab imu ii meeb uɗilo amu, Nug keeke inam laa ii helo,” awa aum.

³⁴ Nug anam a amu, ag amegppa appig. “Na anin nug menuittette, na hipunin danab daan autna aome amunu, aɗinu na ig ippunigkkutnu hettem?” aon appig. Ag anam ana, lamitteg dimittim ukkom.

³⁵ Jesus ag danab amu lamidppignu nai doya, Nug danab amu mattia antta, amegppa aum. “Na Danab Bekkalagnu ootppa genab doottemte o iitta?” awa aum.

³⁶ Jesus anam a amu nug aum. “Naɗi, Danab Bekkalag am aun? Da nuhignu oolppa genab dookkulnu, na Nug am aun appe, da doyei!” awa aum.

³⁷ Nug anam a amu Jesus aum. “Na Nug aakku anidme. Ge, danab Nug geha iikku na ele nai madittep, am Nug aakkuib,” awa aum.

³⁸ Jesus Nug anam a amu, danab nug aum. “Naɗi, da oolppa genab doottem,” awa aum. Nug anam ana, nug dup noa, Jesus binag meum.

³⁹ Danab nug anam he, Jesus aum. “Da amelag gaɗuak ag eɗun neegkkulagnu, amelag ena ele ag eɗun amelag gaɗuak daaglagnu, da wan imuppa epeɗiak hekkulnu uɗimi,” awa aum.

⁴⁰ Ɗo gumak danab-Parasia laa appa Nug gukkuidna daappig ele amu, ag amunu appig. “Ig elete danab amenig gaɗuak?” aon appig.

⁴¹ Anam aeg am Jesus Nug ag amelagppa aum. “Ag amelag gaɗuak daalo amu, ag hipunin iitta daalob. Amge ag, ‘Ig amenig ii gaɗuom,’ atteb amunu, am ahilag hipunin ana daatte,” awa aum.