Jon 7 - Nobonob Baibel

Nug amakkud ag Jesusnu oolagppa genab ii dooppig

¹ Keeke amu oh dimppa Jesus Nug laih Galili appa ukka oiyom. Juda wanppanu Juda okkai ag Nug qeppeg mauhkkunu heppig amunu, Nug wan amuppa oiyaknu uua aha ukka, Galili appa oiyom.

² Aria Juda dilag Pehppa Dayaknu Hobulnu haen miag do,

³ Jesus amakkud ag Nug amegppa appig. “Na aben imu uuna, Juda wanppa ukke! Gona, nahipad ippunittak awak danab ag nahip uɗat, danab haknu elele iitta, na hettem ele, ag amu anidkkulagnu, na appa heppe anidkkulag.

⁴ Danab laa nug danab laa oh nuhig uɗat anidkkulagnu oo daatte ele, nug lokkuma ii hette, amunu na epponak keeke danab hekkunu elele iitta hettem amu, na wanppan danab ah noolagppa miag atiak daanna he!” aon appig.

⁵ Aɗinu? Jesus amakkud ag ele nuhignu oolagppa genab ii dooppig.

⁶ Jesus amakkud ag anam mattieg, Jesus Nug ag amelagppa aum. “Gemu am dahil haennab iitta, haen imu oh am ahilagib.

⁷ Wanppan danab ah wannu kobol dim lamadtteb amu, ag oolagppa ahilagnu nau ninig ele dooglagnu elele iitta, amge dahilnu ag anam dootteb. Aɗinu? Da haen oh kobol eheɗ ag hetteb ele, da amunu madittem.

⁸ Ag hobulppa ukkeg! Da geha imu ii gopa. Aɗinu? Am dahil haennab iitta,” awa aum.

⁹ Jesus Nug amakkud amelagppa anam ana, Galili appa dayom.

Jesus nug Pehppa Dayaknu Hobulppa ukkom

¹⁰ Aria, Jesus amakkud ag Juda dilag hobul amu anidkkulagnu ukkaeg, dimppa Jesus Nug ele ukkom, amge Nug miag atiak ii ukkom. Lokkuma ukkom.

¹¹ Amu Juda ag hobulppa teppig amu, ag Nug mattina, ii anidna appig. “Danab amuam adeppa daatte?” aon appig.

¹² Danab ah kuɗumnab ag appa goppig ele, ag akka akka Jesusnu nai kuɗum madippig. Laa ag appig. “Nug am danab ena,” amge laa appig. “Nug am danab nau, nug danab ah kuɗum hambuppualadtte,” aon appig.

¹³ Anam akka akka madippig amge, ag Juda okkai dilag baɗappig amunu, laippu laa nug ag noolagppa nai miag atiak laa ii mattiom.

¹⁴ Ag anam mattiegeg, Jesus Nug hobul gamagppanab Kayaknu mettid lakka noa, danab ah amelagppa digma nai ippuanattom.

¹⁵ Nug anam nai mattieye amu, Juda ag dabmak kuɗum aonna, akka akka nug oɗ mettan appig. “Danab imuam Nug sul laa ii heum, amu Nug attem ha doyak okkainab awom?” aon appig.

¹⁶ Ag anam mattieg amu, Jesus Nug ag amelagppa aum. “Da nai ag amelagppa madittem ele imuam dahil iitta. Kayak, Nug da meiɗe uɗimi ele, da nuhig nai madittem.

¹⁷ Am danab laippu laa nug Kayaknu dabmak awaknab dim lamidkku amu, nug nai, da madittem imu, nai amuam Kayak toppanu beum o iitta da dahil dabmakppatai madittem amu nug dookku.

¹⁸ Am danab laa nug nukka nuhig dabmakppa nai maditte amu, nug nukka binag okkai aokkun hette. Amge danab laa, nug laa me uɗiom ele, nug binag mette amu, danab amu nug doyak diig genabib dim lamidtte; nug nuhigppa eheɗ laa ii daatte.

¹⁹ Anukka Moses nug ag ɗo mattom, amge ag oolagppa laippu laa nug ɗo amu tutukkunab dim ii lamidtte amunu, aɗinu da iuppeg mauhkkulnu hetteb?” awa aum.

²⁰ Nug anam a amu, danab ah ag Nug amegppa appig. “Ouɗi nau laa na beɗunppa daatte. Aun nug na nitteb mauhkkutnu hette?” aon appig.

²¹ Aeg am Jesus Nug aum. “Da Sabat deɗppa danab babaittak uɗat hemi amunu, ag ottaina dabmak kuɗum aotteb.

²² Ag alalkad ag digmena Kayak oɗe dim lamidna, gaɗa otaɗak heegeg uɗie, Moses nug ɗo naippa meum daatte, amunu ag ele Sabat deɗppa uɗat henana, nid naunau gaɗalkad otaɗtteb.

²³ Ag Mosesnu ɗo amu tippalmananu, ag Sabat deɗppa uɗat hemananu ɗo, ag ɗo amu tippalna, Sabat deɗppa uɗat henan, nid naunau gaɗalag otaɗtteb. Aria, ag anam hetteb amunu, da danab laa Sabat deɗppa beɗu babaitti, amu ag amunu aɗinu dahilnu oolag nauhtte?

²⁴ Ag amelagppaib keeke aib epeɗippig. Dabmak tutukku aona, kobol tutukkuppa, dahil uɗat imu epeɗin antteg!” awa aum.

Laa ag, “Danab imuam Kristustai,” appig

²⁵ Jesus Nug anam a, Jerusalem danab laala, ag Juda okkai ag Jesus qeppeg mauhkkunu dabmeppig amu, ag amu doona, ag appig. “Danab imuam ag qeppeg mauhkkunu appig,

²⁶ amge Nug geha iikku nai oh miag atiakib mattieye, ag nuhignu nai laa ii maditteb. Laa ag gumaknu ehah ele ag Nug am Kristus oolagppa genab dooppigtai?

²⁷ Amge ig Nug appag diig am doot malamut. Haen Kristus uɗikku am danab laippu laa nug Kristus appag diig ii dooma,” aon appig.

²⁸ Danab ah ag anam mattiegeg, Jesus Nug Kayaknu mettid lakka danab ah noolagppa hibaitta dayaya, baag okkaippa nai mattiaya aum. “Ag da dooiɗtteb, da appal diig ele dootteb, amge da dakka dahil dabmakppa ii uɗimi. Mame Nug da meiɗe uɗimi. Nuhig diig am genabib, amge ag Nug ii dootteb.

²⁹ Da Nug doottem. Da Nug ele daaɗa, Nug da meiɗe uɗimi,” awa aum.

³⁰ Jesus Nug anam a, ag Nug aɗaglagnu heppig, amge nuhig haen ii malom amunu, laippu laa nug Jesus ii aɗom.

³¹ Laala ag aɗaglagnu heppig, amge danab ah kuɗum nuhignu oolagppa genab doona, ag appig. “Danab imu Nug Kayak dabmettaknu kobol danab haknu elele iitta kuɗum hette, amu haen Kristus Nug uɗikku amu, Nug Kayak dabmettaknu kobol danab haknu elele iitta kuɗumnab, danab imu eɗittak hekkute? Iitta,” aon appig.

³² Danab ah kuɗum ag Jesusnu anam mattiegeg, mana mettak danab okkai amu ɗo gumak danab-Parasia ele ag danab ah nai kuɗum mattiegeg doona, ag ahilag daup laa Jesus aɗaglagnu maatteg uɗippig.

³³ Uɗieg am Jesus Nug aum. “Da haen tutuib ag ele dayota, da eɗuen, laa Nug da meiɗe uɗimi ele amu, nuhigppa gokkul.

³⁴ Goppi, ag da mattiɗkkulag, amge da ii aniɗmana. Amu ele aben da gottem ele, amuppa ag gokkulagnu elele iitta,” awa aum.

³⁵ Anam a amu Juda ag akka akka nai mattinna appig. “Nug adeppa ukkeb, ig Nug ii anidmata? Nug Juda laala Grik wanppa daatteb, ahilagppa ukka Grik danab ippunadkkutai.

³⁶ Nug, ‘Ag da mattiɗkkulag, amge da ii aniɗmana,’ ana, ‘Aben da gottem ele, amuppa ag gokkulagnu elele iitta,’ awa aum amunu, Nug adeppanab gokkunu aum? Nai amuam diig adekkunab?” aon appig.

Le bauklel ele

³⁷ Hobul amu malaknu deɗ beum, deɗ amuam hobul amunu naɗinab amu, haen amuppa Jesus Nug hibaitta, baag okkaippa ewa aum. “Danab laa nug le baag diieb amu, nug da gumiɗa uɗia, le lanaɗ!

³⁸ Laa nug dahilnu ooppa genab dootte amu, Kayak naippa yaak laa daatte amubia, ‘Nug ooppanu le bauklel ele kuɗum am bena gonana daaglag. Iitta ii mema,’ ” awa aum.

³⁹ Jesus Nug nai amuam Kayak Ouɗinu aum. Danab ag oolagppa genab dooglag ele, ag aoglag. Amge haen amuppa Jesus Nug Mame toppa ii ukkom amunu, Kayak Ouɗi, Nug danab oolagppa ii dayom.

Danab ah oppatna, dabmak laippu ele ii daappig

⁴⁰ Danab ah laala ag nai amu doona, “Genabnab danab imuam propet laa uɗikkunu, ig nug ameg mettem ele,” aon appig.

⁴¹ Laala ag appig. “Nug am Kristus,” amge laala ag appig. “Kristus Nug Galili appanu ii bema.

⁴² Kayak naippa yaak laa daatte. Nai amuam inam. ‘Kristus nug Dawit buɗubppa Betlehem, anukka amuam Dawit appag diig amu, Nug appa bekku,’ ” aon appig.

⁴³ Danab ah ag anam mattinna, ag otin, ameg aɗit daappig.

⁴⁴ Daana, laala ag Jesus aɗaglagnu heppig, amge laippu laa nug eppeg bahia, Jesus ii aɗom.

Ikki danab ag Jesusnu oolagppa genab ii dooppig

⁴⁵ Anam heeg am daup ag eɗun, mana mettak danab okkai am ɗo gumak danab-Parasia ele gumadna ukkaeg, ag appig. “Attem hena, ag Nug ii aɗan aon uɗippig?” aon appig.

⁴⁶ Anam aeg am daup amu ag appig. “Danab laa nug danab imu nai maditte bia laa mattie ii anidmut,” aon appig.

⁴⁷ Daup ag anam aeg amu ɗo gumak danab-Parasia ag appig. “Jesus Nug ag elete hambuppualattom?

⁴⁸ Ig ikki danab, ig oonigppanu o iitta ɗo gumak danab-Parasia ag oolagppanu laippu laa Jesusnu ooppa genab doottete? Iittanab!

⁴⁹ Amge danab ah amu ag ɗo ii dootteb amu, ag eheɗ laa awaknu anak waappa daatteb, ag nuhignu oolagppa genab dootteb,” aon appig.

⁵⁰ Anam mattieg amu, ag oolagppanu laippu laa, nug onig Nikodemus, nug haen tatam laa Jesus gumitta ukkom ele amu, nug oɗ mattom.

⁵¹ “Ig ihinig ɗoppa danab laa hettoɗiakppa ii dayom haenppa, nug eheɗ heumnu akkunignu am elelete? Iitta. Nug keeke heum amu ig tatam doota, ig nug epeɗignig,” awa aum.

⁵² Nug anam a amu, ag nuhig nai inam nob meppig. “Na ele am Galili ted amunu na doyak iittatai? Na nai atognona ebqena am tutukku anidna dookkut. Propet laippu laa nug Galili appanu iinab bema,” aon appig.

⁵³ ((Anam daye amu danab oh aben aben ukkadppig.