Jon 5 - Nobonob Baibel

Jesus Betsaida appa danab laa babaittom

¹ Keeke amu oh ba male, amu dimppa Juda dilag Pasowanu Hobul laanu haen beum. Be amu Jesus Nug Jerusalem ukkom.

² Jerusalem aab aɗubnu od laa onig Sipsip Dilag Od, od amu guguittak amu le ameg laa dayom. Aram dilag naippa amu ag, “Betsaida,” aon atteb. Le amu agappa danab daaglagnu ag ulah lag tanig ele, geɗiak iitta heppig.

³ Lag amuppa oɗe danab kuɗumnab, ag amelag gaɗuak, baelag laih nauhak, beɗulag laih mauhak ele daappig.

⁴ ((Ag le amemɗul mettak ameg mena daadttappig. Haen laala engel nug le amuppa na, le amu amemɗul medattom. Le amemɗul mettak male amu, aria danab aun nug tatam anuqa leppa nottom, nug oɗe nuhig attemutai ele amu, haen aguppa nug ena daattom.))

⁵ Aria, danab laa appa dayom amu nug maɗ 38 diɗi aɗak ele daattom.

⁶ Jesus Nug danab amu niieye antta, Nug oɗe haen elab niiom amu Nug doya, danab amu oɗ mettom. “Na ena daakkutnu oot daattete?” awa aum.

⁷ Awa a amu oɗe danab oɗeppa awa aum. “Danab naɗi, haen le imu amemɗul medatte amu, danab laa da ehaniɗa le umuppa meiɗkkunu laa iitta. Da dakka le amu ooppa nokkulnu heiyi amu, laa nug da qe-eɗila, nug tatam anuqa notte,” awa aum.

⁸ Danab anam a amu, Jesus Nug danab amegppa aum. “Na hippaidna, qaɗaqaɗ nahip aon, maon ukke!” awa aum.

⁹ Jesus anam a amu, pahanab danab beɗu ena daye, nug qaɗaqaɗ nuhig awa, tappa ukkom. Jesus Nug amu heum amu, Nug Sabat deɗppa heum

¹⁰ amunu, Juda okkai ag danab qaɗaqaɗ mawom ele amegppa appig. “Gemu am Sabat, na qaɗaqaɗ maomnanu ɗo daatte. Na aib tippalme,” aon appig.

¹¹ Aon aeg amu danab oɗelagppa awa aum. “Danab Nug he, da ena daami ele, Nug da amelppa, ‘Na qaɗaqaɗ nahip aon, maon ukke!’ aum,” awa aum.

¹² Nug anam a, ag danab oɗ medappig. “Laa Nug na qaɗaqaɗ nahip aon, maon gokkutnu aum amu, danab amuam aun?” aon appig.

¹³ Ag anam oɗ medappig, amge danab beɗu ena dayom ele nug danab aun he, nug ena dayom ele amu, nug ii doyom. Aɗinu? Danab kuɗum appa daappig amunu, Jesus Nug ag oolagppa ukka qettoɗom.

¹⁴ Danab amu nug Jesus ii doyom, amge dimppa Jesus Nug danab amu Kayaknu mettid lakka appa antta amegppa aum. “Antte! Gemu na beɗun pahaettom. Uug naɗinab na tonidmanu, na hipunin tuɗidna aib heme,” awa aum.

¹⁵ Jesus anam a amu, danab amu nug ukka, Juda okkai amelagppa aum. “Danab Nug he, da ena daami ele, Nug am Jesus,” awa aum.

¹⁶ Nug anam a, Jesus Nug keeke amu Sabat deɗppa heum dooppig amunu, diig amunu Juda okkai ag digmena, Jesus eheɗ hedappig.

¹⁷ Ag anam heppig, amge Jesus Nug amelagppa aum. “Mama Nug hanhan uɗat heehe uɗiom, gemu ele haaha daatte, amu da ele uɗat hettem,” awa aum.

¹⁸ Amuppa Juda okkai ag Jesus qeppeg mauhkkununab oolag dayom. Aɗinu? Nug Sabat deɗnu ɗoib ii tippalom. Iitta! Nug, “Kayak Nug am da Mamelnab,” aum amunu, nai amuppa Nug Kayak ele, elele elele daattep ippuanattom.

¹⁹ Juda okkai ag amunu eheɗ dooppig amunu, Jesus Nug amelagppa inam aum. “Genabnab genab, da ag amelagppa attem. Kayak Bekka da, dahil dabmakppa keeke laa ii hettem. Iitta. Da Mamel he anidmi amu, da ele anamib hettem. Keeke oh Mama hette amu, Nug Bekka da, da ele hettem.

²⁰ Mama Nug dahilnu oo mauhtte amunu, keeke oh Nug hette ele, Nug da ippuniɗom. Nug geha uɗat kuɗum okkainab, keeke amu oh eɗittak ele, ag ottaina dabmak kuɗum aoglagnu ippuniɗkku.

²¹ Mama Nug laa mauhppig maɗatte ahaeg, bau dayak madatte, amubia Nug Bekka da, da ele aun aɗi bau dayak madakkulnu dabmaknab aottem amu, da madattem.

^22-23 Mama Nug danab laa ii epeɗitte. Iitta. Nug danab ah oh ag Nug binag metteb, amubia da binal mekkulagnu epeɗiak uɗat amu oh Nug Bekka da, da eppelppaib meum. Am danab nug Kayak Bekka da, da binal ii mette amu Mama, Nug da meiɗe uɗimi ele amu, Nug binag ele ii mette.

²⁴ Da genabnab genab ag amelagppa attem. Laa nug nai dahil doya, Laa Nug da meiɗe uɗimi, nuhignu ele ooppa genab dootte amu, nug bauklel hanhannu ele; nug padal maknu epeɗiak ii anidma. Iitta. Nug aakku mauhaknu ib uua, gemu nug bauklel hanhannu ibppa daatte.

²⁵ Da genabnab genab ag amelagppa attem. Haen laa uɗikkunu hette, gemu iikku uɗiom amu, mauhak aɗi ag Kayak Bekka da, da baal dooglag. Am danab amu oolagppanu aun aɗi ag amu doona amu, ag bau daaglag.

²⁶ Mama Nug nukka nuhig bauklel ele, amubia Nug Bekka da, da ele da dakka dahil bauklel ele daakkulnu meɗom.

²⁷ Amu ele, da am Danab Bekkalag amunu, Nug da danab epeɗiadkkulnu ɠagattag ele meɗom.

^28-29 Anam amunu, ag dabmak kuɗum aib aoppig. Aɗinu? Haen laa uɗieb, danab oh mauhppig, moɗppa niitteb ele, ag da baal doona, ag mauhak aben uuna, eɗun hippaidkkulag. Am danab ag kobol ena heppig ele ag eɗun hippaidna, bauklel daaglag. Danab ag kobol eheɗ heppig ele, ag eɗun hippaidna, ag hettoɗiakppa daaglag.

Laa ag Jesusnu madippig

³⁰ Am da dakka dahil dabmakppa keeke laa hekkulnu elele iitta. Iitta. Da Mama toppanu nai aomi, amuppa da danab epeɗiadttem amunu, dahil epeɗiak am tutukku. Aɗinu? Da dakka dahil dabmak ii dim lamidttem. Iitta. Laa Nug da meiɗe uɗimi ele, Nug oo niitte amuib da dim lamidttem.

³¹ Am da dakkanab dahilnu nai imu mattilom amu, dahil nai mattiak imuam elele iitta daalo,

³² amge laa daatte, amu Kayak, Nug dahilnu maditte. Amu da doottem, Nug nai tutukkuib maditte.

³³ Am anukka ag danab laala maatteg, Layattak Jon toppa ukkaeg, nug dahilnu genab mattie dooppig,

³⁴ amge danab ag dahilnu maditteb, da amunu dabmak okkai ii aottem. Iitta. Amge ag Jonnu nai dabmena, dahilnu oolagppa genab dooppeg, Kayak Nug ag eɗua diikkunu amu, da amunu Jonnu nai amu mattimi.

³⁵ Jon nug amu lam amahaltte bia, nug amahlak ag mattom. Matte, ag haen tutu amunu oolag ena daye, gamag ahak dooglagnu ena dooppig.

³⁶ Amge keeke laa ele, Mame Nug da meiɗe uɗimi amu ippunadtte. Keeke amuam Jonnu nai eɗidtte. Keeke amuam uɗat da hettem imu. Da Mamel Nug da amu hein malakkulnu meiɗe uɗien hettem.

³⁷ Aria Mama Nug da meiɗe uɗimi ele amu, Nug dahilnu mattiom, amge ag Nug baag ii dooppig, gemu ele ii dootteb, ag Nug iɗu ele ii anidppig, gemu ele ii anidtteb.

³⁸ Ele amu, nuhig nai ag oolagppa ii daatte. Aɗinu? Ag laa Nug me uɗiom ele, ag nuhignu oolagppa genab ii dootteb.

³⁹ Ag Kayak nai yaak niitte, nai amu ebqena autna aona, ‘Nai amu bauklel hanhannu megatte,’ atteb, amge nai amuam dahilnu aakku atte

⁴⁰ amunu, aɗinu ag da gumiɗna uɗina, bauklel aoglagnu ii hetteb?

⁴¹ Da danab ag da binal mekkulagnu ii dabmettem,

⁴² amge da ag tutukku doyadttem. Ag Kayaknu oolag ii mauhtte ⌊amunu, ag akka binalag aoglagnu dabmak okkai aotteb⌋.

⁴³ Da Mama onigppa uɗimi, amu ag dahilnu oolagppa genab ii dootteb. Amge danab laa nug nukka nug onigppa uɗia, nai mattieb amu, ag nuhignu oolagppa genab dooglag.

⁴⁴ Ag am lailkad dilagppa binalag okkai aoglagnu hetteb, amge binalag laa, Kayak toppanu uɗitte ele, ag amu aoglagnu ii hetteb amunu, ag attem hena, oolagppa genab dooglag?

⁴⁵ Da ag Mame noobppa naippa yaaladkkulnu aib dabmeppig. Danab nug ag naippa yaaladkku ele am Moses. Danab amunu amu ag, ‘Nug ig ehanigkku,’ aon atteb.

⁴⁶ Ag Mosesnu nai oolagppa genab doolob amu, ag dahilnu ele oolagppa genab doolob. Aɗinu? Nug am dahilnu nai yom.

⁴⁷ Amge ag nuhig nai yaak amu oolagppa genab ii doonna, ag attem hena ag dahil nainu oolagppa genab dooglag?” awa aum.