Jon 4 - Nobonob Baibel

Jesus Samaria ah ele nai madipiɗ

¹ Haen amuppa ɗo gumak danab-Parasia ag, “Jesus Nug ippunittak awaknu danab aokkunu Jon eɗitta, danab ah kuɗum diia layadtte,” nai anam dooppig.

² Amge Jesus ii layattom, nuhig ippunittak awak danab ag layadppig.

³ Ɗo gumak danab-Parasia ag nai amu doyeg, Jesus Nug amu doyom amunu, Nug Juda uua, eɗua Galili ukkom.

⁴ Anam amu, ib nug dim lamidkkununab Samaria oppata ukkom amunu, Nug Samaria anam oppata ugakka,

⁵ Nug Samaria aab laa onig Saika, appa teum. Aab amuam Jakop nug bekka Josep wan mettom, amu guguittak.

⁶ Anukka Jakop nug appa le moɗ nuhig buuom. Amu Jesus Nug ukka, amuppa ta, beɗu maidadaɗom amunu, Nug le moɗ amu guguittak hik awa, appa dayom. Haen amu aam ameg tutukku anam.

^7-8 Jesus Nug dayeye, nuhikkud ippunittak awak danab ag ee daden mekkulagnu aab amuppa ukkaeg, Samaria ah laa le itakkunu uɗiom. Uɗie, Jesus Nug ah amegppa aum. “Na le laa meɗappe lalom,” awa aum.

⁹ Nug anam a amu, Samaria ah nug aum. “Na amu Juda danab, da am Samaria ah. Amu attemun na, ‘Le aon doppe lai!’ aon attem? Da am Samaria ah, Juda ag Samaria ele ouqak ii oitteb,” awa aum.

¹⁰ Ah anam a amu, Jesus oɗeppa awa aum. “Na Kayak Nug ɗo medakkunu hette doolom, amu na danab aun Nug nahipnu, ‘Na le aon doppe lai!’ aum ele, na Nug ele doolom amu, na Nug amegppa appe, Nug na le bauklel ele mettalo,” awa aum.

¹¹ Jesus Nug anam a amu, ah nug aum. “Danab Naɗi, na le itakkutnu hanak iitta, am le moɗ imu ele umanab unuqagnab daatte amunu, na le bauklel ele amu adeppanu aokkut?

¹² Ig alanig Jakop, nug le moɗ imu mekkom. Nug, nug bekkod, amu nuhikkud makau sipsip ele ag anukka le imu ladappig, amu na nug eɗidttemte? Iitta!” awa aum.

¹³ Ah anam a amu, Jesus oɗeppa awa aum. “Danab oh ag le moɗ imuppanu le latteb ele, ag le lappeg, haen oh le baalag baula diikku,

¹⁴ amge laa nug le da medattem ele imu, nug amu lakku amu, nug baula le baag ii diima. Iitta. Le da medakkul ele imu am, le moɗ bia nug ooppa baaba daakku. Anam haen oh qeppuɗia baaba, nug bauklel hanhannu medakku,” awa aum.

¹⁵ Jesus anam a amu, ah nug Jesus amegppa aum. “Naɗi, le amu da meɗe! Meɗappe, da baula le baal ii diima. Ele amu, da haen oh le itaknu ippa uɗikkulnu ii daama,” awa aum.

¹⁶ Anam a amu, Jesus Nug amegppa aum. “Gona, na gamut appe doyeb, eɗuya uɗieɗ!” awa aum.

¹⁷ Anam a amu, ah nug Jesus oɗeppa awa aum. “Da danab iitta,” awa aum. Anam a amu, Jesus amegppa aum. “Na danab iitta attem am, na genab attem.

¹⁸ Aɗinu? Danab tanig ele ag tatam na gamutad daappig, amu danab laa gemu na ele daattep amu, nug am na gamut iitta. Nai na ame am genabib,” awa aum.

¹⁹ Jesus Nug anam a, aria ah nug Jesus amegppa aum. “Danab Naɗi, da aakku na dooidmi, na am propet amunu,

²⁰ na appe doyei! Ig mamenkad amu, ag qauko imuppa dup noa binag mak kobol heppig, amge ag Juda, ag ig danab ah oh Jerusalem appa dup noa binag mak kobol hekkunignunab daatte atteb. ⌊Anam amu ig attem hekkunig?⌋” awa aum.

²¹ Anam a amu, Jesus oɗeppa awa aum. “Ah, na dahil nai ootppa genab doye! Haen elab iitta ag baula Mame Kayak Nug noobppa dup nona binag mekkulagnu qauko imuppaib Nug noobppa dup nona binag ii memana, o Jerusalem appaib ele Mame Kayak Nug noobppa dup nona binag ii memana.

²² Ag Samaria, ag Kayak noobppa dup nona binag metteb, amge ag nuhig diig pehettak ii dootteb. Amge Kayak Nug he, eɗua diiaknu uɗat amu ig Juda ihinigppa bette amunu, Nug nuhig diig ig ippunikke, ig nuhig diig tutukku dootta, ig Nug noobppa dup nota binag mettem.

²³ Amge haen aakku uɗiom, danab ag Nug noobppa dup noa binag mak genab hekkulagnu amu, ag Kayak Ouɗi, nuhig ehanittakppa, amu doyak diig genabib eleppa Mame noobppa dup nona binag mekkulag. Dup noa binag mak anam amu, Mame Nug oo daatte.

²⁴ Kayak Nug am Ouɗi amunu, danab ag Nug noobppa dup nona binag elele mekkulagnu amu, ag Kayak Ouɗi ehanittakppa, amu doyak diig genabib eleppa Nug noobppa dup nona binag mekkulagoitte,” awa aum.

²⁵ Jesus anam a amu, ah nug Jesus amegppa aum. “Da Mesaia uɗikkunu daatte doottem; Nug am Kristus. Nug uɗia, keeke oh ig danab ah ippunigkku,” awa aum.

²⁶ Ah nug anam mattie amu, Jesus amegppa aum. “Da, na ele nai madittep imu amu, daib am Nug aakku,” awa aum.

²⁷ Jesus anam aawo, haen amuppa nuhikkud ippunittak awak danab ag eɗun uɗin, Jesus Nug ah ele nai mattieheh anatna, ag dabmak kuɗum aoppig, amge laippu laa nug ah amegppa, “Na aɗin oot hette?” awa oot ii mettom. O iitta, laa nug Jesus amegppa, “Na aɗinu nug ele nai madittep?” oɗ ii mettom.

²⁸ Anam daaegeg, ah nug le itakkunu hanak nuhig uue dayeye, eɗua aabppa ukka, danab ah amelagppa aum.

²⁹ “Dona, danab imu antteg! Nug keeke oh da anukka hemi amu, Nug amu miag da amelppa aum. Nug am Kristustai?” awa aum.

³⁰ Aria danab ag ahan, aab uuna, Jesus gumidna uɗippig.

³¹ Amge haen gamag amuppa nuhikkud ippunittak awak danab ag Jesus amegppa appig. “Ippunittak danab, na ee la!” aon appig.

³² Amge Nug aum. “Da ee laa ele, ag ee amu ii dootteb,” awa aum.

³³ Nug anam a amu ippunittak awak danab ag akka akka nug oɗ mettan appig. “Danab laa ee laa awa uɗia mettomtai,” aon appig.

³⁴ Ag anam mattieg amu, Jesus Nug aum. “Laa Nug da meiɗe uɗimi ele, da nuhig dabmaknab awak hekkulnu, da nuhig uɗat oh hein malakkulnu, amuam ee dahil.

³⁵ Ag inam aon atteb. ‘Kalam waɗele uueb ee oɗuak haen dokku,’ aon atteb, amge da ag amelagppa attem. Ag amelag humana, dad okkai oh italna antteg! Ee oh oɗun malappig.

³⁶ Am laa nug meu aotte amu, nug nuhig uɗat nob awawa, nug danab laala bauklel hanhannu aoglagnu ehanadtte. Ehanadtte amunu, ee eppak danab, amu meu awak danab ele aa oh oolah gamag ahakku.

³⁷ Anam daatte amunu, nai imuam genab. ‘Danab laa nug ee ebatte, amu laa nug meu aotte’.

³⁸ Da danab laa uɗat heppigppa ag dahilad, ag dad amuppa meu aoglagnu maatti goppig. Laa ag tatam ahilag wagai makppa dad ooppa ee ewak uɗat heppig, amu gemu ag ooppa nona meu aotteb,” awa aum.

³⁹ Aria Samaria kuɗum ag ahnu nai doona, ag Jesusnu oolagppa genab dooppig. Aɗinu? Ah nug, “Da anukka keeke oh hemi amu, Nug amu miag da amelppa aum,” awa aum.

⁴⁰ Amunu Samaria danab ag Jesus gumidna dona, Nug ag ele daaglagnu unuqppig. Unuqeg amu, Jesus Nug deɗ aɗit ag ele aab amuppa daappig.

⁴¹ Anam daanna, danab kuɗumnab ag nuhig nai doona, oolagppa genab dooppig.

⁴² Oolagppa genab doona amu, ag ah amu amegppa appig. “Ig na ame amuppa oonigppa genab ii doomut. Iitta. Ig ikka ele Nug oɗeppa a doomut, amuppa ig aakku doottem, Nug am genab ig wanppan danab ah oh eɗua awikkak danab,” aon appig.

Jesus gabmannu ikki danabnu nid babaittom

⁴³ Deɗ aɗit amu uue, Jesus aha, Galili ukkom, amge appag diigppanab ii ukkom. Aɗinu?

⁴⁴ Jesus Nug nukka anukka, “Propet nug appag diigppa am binag iitta,” awa aum.

⁴⁵ Amu haen Nug ukka, Galili teum amu, Galili danab ag ele Pasowanu Hobulppa gona, ag Jesus Jerusalem appa hobul amuppa uɗat heehe anidppig, diig amunu ag Nug ele laippu dayaknu oolagppa eleleib dooppig.

⁴⁶ Aria Jesus Nug Galili appa oiyaya, aab Kana appa ukkom. Aab amuppa Nug anukka le he, eɗua wain beum. Appa dayeye, Kaperneam aabppa gabmannu ikki danab laa amu nug bekka oɗe ele dayom.

⁴⁷ Haen amu danab amu nug Jesus Judanu aha, Galili teum doya, nug ab, Jesus Kaperneam ukka heeb, bekka ena daakkunu unuqkkunu ukkom. Aɗinu? Nug bekka oɗe ele amu nug mauhkkunu miag dayom. Danab amu ukka, Jesus gumitta ta, nug bekkanu Jesus unuqitte,

⁴⁸ Jesus Nug nug amegppa inam aum. “Da heppi, ag Kayak dabmettaknu kobol danab haknu elele iitta digdig ii anidkkulag amu, ag oolagppa genab iinab dooglag,” awa aum.

⁴⁹ Nug anam a amu gabmannu ikki danab nug aum. “Naɗi, nid dahil mauhmanu paha ne!” awa aum.

⁵⁰ Nug anam a, Jesus Nug amegppa aum. “Na oot uug aib dayom. Na ukke! Na bekkat nug bau ena daakku,” awa aum. Danab amu nug Jesusnu nai doya, ooppa genab doya, nug ukkom.

⁵¹ Nug ugekke amu maɗi nid nuhikkud ag uɗin, ibppa anidna amegppa appig. “Na bekkat nug bau meum daatte,” aon appig.

⁵² Anam aeg amu nug oɗ mattom. “Aam ameg attenppa nug ena daakkunu digmeum?” awa oɗ mattom. Oɗ matte amu, ag appig. “Tumai belo bek, wan kilok amu beɗu gakkaɗak oug meum,” aon appig.

⁵³ Aeg amu nug aam ameg amuppanab Jesus Nug, nug bekkanu amegppa aum doyom amunu, nug nuhikkudppa ele ag oh oolagppa genab dooppig.

⁵⁴ Jesus Nug Judanu Galili uɗia, Nug Kayak dabmettaknu kobol danab haknu elele iitta ebqak aɗit aakku heum.