Jon 21 - Nobonob Baibel

Ippunittak awak danab eblaih aɗit ele ag Jesus anidppig

¹ Amu dimppa amu, Jesus Nug nuhikkud ippunittak awak danab, ag Taiberias le ihippa daaegeg, Nug appa ag gumatta tula beum. Keeke amuam inam beum.

² Saimon Pita, Tomas, nuhignu ag Didimus ele atteb, aria Nataniel, nug am Galilinu aab Kana, appa dayom, nug appan danab, Sebedi Bekoɗ aɗit, amu Jesusnu ippunittak awak danab aɗit laa ele, ag oh qagmen daappig.

³ Anam daanna amu Saimon Pita nug amelagppa aum. “Da kakainu gokkul,” awa aum. Nug anam a amu, ag appig. “Ig na ele oh gokkunig,” aon appig. Anam ana amu ag oh ahan gona, uub laappa teppig, amge tuqan amuppa ag kakai laippu laa ii aoppig.

⁴ Buttua wakkaɗeɗe amu Jesus ukka, le ihippa hibaitta dayom, amge ippunittak awak danab ag danab amu, Nug am Jesus, ag amu ii dooppig.

⁵ Am Jesus Nug ag oɗ mattom. “O nid, ag kakai laa aoppigte?” awa aum. Anam a amu ag, “Iitta,” aon appig.

⁶ Ag anam aeg amu Jesus aum. “Ag uhui uub heqo laih naɗiap-ppa eig! Ag anam hena amu, ag kakai aoglag,” awa aum. Jesus anam a, haen ag uhui naɗiap-ppa ena amu, ag kakai huanak aoppig. Awona, uhui eeɗppeg bekkunu elele iitta.

⁷ Anam daye amu ippunittak awak danab laa, Jesus nuhignu oo huanak mauhttom ele amu, nug Saimon Pita amegppa aum. “Umu am Naɗi,” awa aum. Anam a, Saimon Pita nug uɗat haaha, ulahnu lamen uɗa dayom ele amu, haen nug, “Umu am Naɗi,” nai amu doya, nug ulah lamen awa ma, oola leppa noum.

⁸ Nug oola leppa no, ippunittak awak danab laa oh ag uubppa daanna elqena, uhui kakai ele eeɗppig. Ag umanab ii daappig, yu ihi guguittak, 100 mita keeke daappig.

⁹ Haen ag uub el qena uɗin, le ihippa dona amu, aab laa ilak ewawa dayeye anidppig. Kakai aab ottagppa daaegeg anadna, amu bret ele dayeye anidppig.

¹⁰ Ag keeke anam antteg amu Jesus amelagppa aum. “Kakai ag geha aakku diippig ele amu, laa akkan doig!” awa aum.

¹¹ Jesus anam a amu Saimon Pita nug uubppa ta, uhui kakai ele amu eeɗe, uɗuaman be, kakai okkai okkai amu ebqena, 153 anidppig. Am huanaknab amge uhui nakok laa ii pakkuom.

¹² Anam daye amu Jesus amelagppa aum. “Dona ee laig!” awa aum. Ippunittak awak danab laippu laa nug Jesus ena ii doomanu oɗ metta, “Na aun?” anam laa ii aum. Ag dooppig, Nug am Naɗi.

¹³ Ag anam dooppig amu Jesus Nug doa, bret awa, pania mattom. Kakai ele awa, pania mattom.

¹⁴ Jesus Nug eɗua hibaittom dimppa amu, imuam haen ewam Nug aakku nuhikkud ippunittak awak danab gumatta tula beum.

Jesus Pita nuhignu oo mauhaknu haen ewam oɗ mettom

¹⁵ Ag ee lana malona daaegeg, Jesus Nug Pita oɗ mettom. “Saimon, Jon bekka, na imu eɗattak dahilnu oot mauhttete?” awa aum. Anam a amu Pita aum. “Naɗi na doottem. Da nahipnu ool mauhtte,” awa aum. Pita anam a amu Jesus aum. “Na dahil sipsip nakkud bekkadna meɗe!” awa aum.

¹⁶ Jesus anam ana amu, Nug baula oɗ mettom. “Saimon, Jon bekka, na dahilnu oot mauhttete?” awa aum. Anam a amu Pita aum. “Ao, Naɗi na doottem, da nahipnu ool mauhtte,” awa aum. Anam a amu Jesus baula aum. “Na dahilad sipsip atognoadna meɗe!” awa aum.

¹⁷ Jesus baula ewam batak Pita oɗ mettom. “Saimon, Jon bekka, na dahilnu oot mauhttete?” awa aum. Pita Jesus haen ewam batak, “Na dahilnu oot mauhttete?” aum amunu ooppa guittak doyaya, nug Jesus amegppa aum. “Naɗi, na keeke oh doon malame, amu na da nahipnu ool mauhtte ele doottem,” awa aum. Pita anam a amu Jesus amegppa aum. “Dahil sipsip bekkadna meɗe!” awa aum.

¹⁸ Jesus Nug anam ana, Nug nai tuɗitta aum. “Da genabnab genab na amenppa attem. Haen na nid bau daanna, na nakka matagiɗ imuanppa takkana, aben na nakka gokkutnu oot dayom amu na amuppa gottame. Amge dimppa haen na kaino mena amu, na eppen humappe, laa nug na matagiɗ imuanppa tagitta, aben na gokkutnu oot ii daatte, amuppa omaitteb gokkut,” awa aum.

¹⁹ Jesus nai amu mattiom, amuppa Nug dimppa Pita nug ib attemunppa mauha, nug Kayak binag amahlak oppiaawak ele amuppa mekku, Nug amunu aum. Nai amu oh dimppa Jesus Nug, “Pita na da dim lamiɗe!” awa aum.

²⁰ Pita Jesus ele goyaya amu, Pita nug eɗua neekka, ippunittak awak danab laa, Jesus nuhignu oo huanak mauhttom ele, nug anukka Pasowa ee lanak haenppa Jesus oguitta wana, “Naɗi, aun nug na kekeɗ eppelagppa meidkku?” oɗ mettom ele, nug dim lamatete anttom.

²¹ Pita nug antta amu Jesus oɗ mettom. “Naɗi, danab imunu amu, attemun?” awa aum.

²² Anam a amu Jesus Nug Pita amegppa aum. “Da nug bau anam dayebeb, da eɗue uɗikkulnu ool daatte dayeb amu, amuam nahip keekete? Na daib dim lamiɗe!” awa aum.

²³ Jesus anam a amu nug laikkud oolagppa ippunittak awak danab amuam ii mauhmanu nai anam naɗi meum, amge Jesus Nug, “Danab amu nug ii mauhma,” ii aum. Iitta! Nug, “Da nug bau anam dayebeb, da eɗue uɗikkulnu ool daatte dayeb amu, amuam nahip keekete?” aakkuib aum.

²⁴ Am ippunittak awak danab amuib nug keeke imu oh amegppa antta, nai amu maditte, nai imu ele iikku yom amunu, ig doottem, nai imu am genab.

²⁵ Amu keeke kuɗum laa ele Jesus Nug heum amu, keeke amu oh danab nug bukppa yaalo amu, buk huanaknab daalob, buk amu wan imu ohppa ambena, laa ele daalob.