Jon 19 - Nobonob Baibel

Jesus ad emaitakppa mauhkkunu anaknu nai

¹ Anam aeg amu Pailat nug a, nuhikkud daup danab ag Jesus bu qaun eleppa eheɗ mataɗppig.

² Anam amu daup ag haɗ muɗi qaun eleppa hewona, Jesus igippa aɗaeg no, lamen elab perpel aɗuitteg noum.

³ Ag anam hena, ag haen kuɗum Jesus gumidna wana, eɗun uɗinna appig. “Na am Juda dilag king! Na binan ele,” aon appig. Ag anam anana, ag eppelag oohap tena, hippeg mataɗppig.

⁴ Ag anam heeg amu, Pailat eɗua dimittim doa, amelagppa aum. “Antteg, da nug beɗuppa ɗo tippalak laa ii anidmi amunu, ag amu dooglagnu omalppi, ahilagppa dimittim dokkunu hettem,” awa aum.

⁵ Anam a, Jesus haɗ muɗi qaun eleppa hak igippa dayeye, lamen elab perpel amu ele beɗuppa dayeye, Nug dimittim doum. Do amu Pailat nug aum. “Ag danab imu antteg!” awa aum.

⁶ Anam a amu mana mettak danab okkai, ahilkad daup ele ag Jesus anidna, huanak ena appig. “Ad emaitakppa atule! Ad emaitakppa atule!” aon appig. Anam aeg amu Pailat nug aum, “Ag akka aon, ad emaitakppa atuleg! Da am nuhigppa ɗo tippalak laa ii anidmi,” awa aum.

⁷ Pailat anam a amu ag appig. “Ig ɗo ele, amu ihinig ɗoppa amu Nug mauhkkuoitte. Aɗinu? Nug, ‘Da am Kayak Bekka,’ aum,” aon appig.

⁸ Ag anam aeg, Pailat doya, nug huanak baɗa,

⁹ nug eɗua lag ooppa noa, Jesus oɗ mettom. “Na am aab adeppanu uɗime?” oɗ metta aum, amge Jesus oɗeppa nakok laa ii awom.

¹⁰ Oɗeppa ii awe amu Pailat nug aum. “Attemun? Na dahil nai imu nob iite mekkut? Da na ad emaitakppa atulidkkulnu akkul dayeb amu, ag atulidkkulag, o iitta da uhuqidkkulnu akkul dayeb amu, ag uhuqidkkulag. Na amu iite doottem?” awa aum.

¹¹ Anam a amu Jesus amegppa aum. “Attannu laa Nug na ɠagattag ii mettalo amu, na dahilppa aɗi hekkutnu elele iitta amunu, aun nug da na eppenppa meiɗom ele, nuhig hipunin am okkainab, nahip eɗittak,” awa aum.

¹² Pailat nai amu doya, Nug Jesus uhuqkkunu heum, amge Juda okkai ag enan appig. “Na danab amu uhuqppe gokku dayeb amu, na Sisar layag iitta! Danab laa nug nukka nuhig, ‘Da am king,’ atte, nug am Sisarnu kekeɗ,” aon appig.

¹³ Pailat nug nai anam doya, nug Jesus omala dimittim doa, hettoɗiak aben onig Men Duqappig, appa epeɗiaknu balalppa dayom. Men duqak amunu ag Hibru naippa, Gabata, aon adappig.

¹⁴ Deɗ amuam Pasowanu Hobul babaittaknu deɗ amu aam ameg 12 bia dayom. Anam dayeye, Pailat Juda amelagppa aum. “King ahilag iikku,” awa aum.

¹⁵ Anam a amu Juda ag eppig. “Heppe nug mauhaɗ! Heppe nug mauhaɗ! Ad emaitakppa atule!” aon eppig. Anam eeg am Pailat oɗ mattom. “Ahilag King amu da ad emaitakppa atulkkulnu oolag daattete?” awa aum. Pailat nug anam a amu, mana mettak danab okkai ag inam appig. “Ig king laa iitta; Sisar aakkuib!” aon appig.

¹⁶ Anam aeg amu Pailat Jesus ad emaitakppa atulkkulagnu ag eppelagppa meum.

Jesus ad emaitakppa atulkkulagnu aon goppig

¹⁷ Pailat Jesus ag eppelagppa me, ban danab ag aoeg, Jesus nukka ad emaitak mawewe, aben laa onig Ikki Ebehinu Aben, appa goppig. Hibru naippa ag aben amunu Golgata aon atteb.

¹⁸ Ag aben amuppa ad emaitakppa atulppig. Danab aɗit laa ele nug heqo laih laih atulatppig, ag Jesus gamagppa atulppig.

¹⁹ Pailat nug nai laa ya, ad emaitak igippa atulom. Nai am inam. Jesus Nasaret ted, Juda dilag king.

²⁰ Nug nai amu Hibru naippa, Laten naippa, Grik naippa ele yom. Aria, aben ag Jesus ad emaitakppa atulppig ele, amuam aab okkai guguittak amunu Juda danab kuɗum ag nai amu ebqeppig.

²¹ Ag ebqeppig amunu, mana mettak danab okkai ag Pailat amegppa appig. “Na, ‘Nug am Juda dilag king,’ aib yaame. Iitta na, ‘Nug nukka, “Da am Juda dilag king,” awa aum,’ anam ye!” aon appig.

²² Ag anam appig, amge Pailat nug ag amelagppa aum. “Da aɗi yaami amu, da aakku yaami,” awa aum.

²³ Aria, haen daup danab ag Jesus ad emaitakppa atulppig, haen amuppa ag nuhig lamen aoglagnu otina, ameg waɗele mewona, anen anen ameg laippu aoppig, amge lamen elab nuhig dayom. Lamen amuam koitak ele iitta; baagppa noa batakppa kunum anam heppig

²⁴ amunu, daup danab ag appig. “Ig lamen imu iitai pattiɗmata. Ig om yaakppa heta, ig oonigppanu aun ig laa oh eɗikka amu, nug aokku” aon appig. Ag anam heeg amu Kayak naippa, nai laa daatte amu elele mettom. Nai amuam inam. “Ag lamen dahil otin, akka akka aotteb. Yo, ag om yaan, lamen dahil aotteb.” Daup danab ag anam heppig.

²⁵ Aria, ag anam heeg amu, Jesus anig, amu laa nug Jesus anig ele aa emakkeg, nug, aria Klopas wau Maria, amu Maria Makdala ted ele, ah amu oh ag Jesusnu ad emaitak guguittak daappig.

²⁶ Ag anam daaegeg, haen Jesus Nug anig amu ippunittak awak danab laa, Jesus Nug nuhignu oo huanak mauhttom ele, nug ele anata amu, Nug anig amegppa aum. “Anai, nid imuam na bekkat,” awa aum.

²⁷ Nug anam awowa amu, Nug ippunittak awak danab amegppa ele aum. “Imuam na anin,” awa aum. Jesus anam a amu, ippunittak awak danab nug ah amu omala, nug laugppa ukka, haen amuppa nug digma gumeme, oh daadttapiɗ.

Jesus mauhom

²⁸ Keeke amu oh ba male amu Jesus doyom, uɗat nuhig oh aakku ha malak dayom amunu, Kayak naippa yaak laa daatte, amu elele medakkunu, Jesus aum. “Da le baal diitte,” awa aum.

²⁹ Nai amu a, wain ena iitta appa dayom amunu, ag yuppanu keeke laa, nug le huanak eeɗtte ele onig span, ag keeke amu wainppa mewona aon, uud laa onig hisop, amu gumuppa itana meeg te, Jesus oti yaappig.

³⁰ Ag Jesus wain ena iitta anam mettaeg lawowa, Nug aum. “Dahil uɗat aakku hein malami,” awa aum. Nug anam ana mala, Nug duug guɗa ne mauhom.

³¹ Nug mauhom, deɗ amuam Juda ag ahilag Pasowanu Hobul bappaidkkulagnu deɗ aakku oqiom. Wagɗe deɗ amuppa Sabat deɗ okkai bekkunu dayom amunu, danab gaɗa Sabat amuppa ad emaitakppa aihattak ii niimnanu, Juda okkai ag Pailat nug heeb, daup ag gona, danab aihadppig ele baelag qiippeg mauhppeg, gaɗalag diiaknu Pailat oɗ medappig.

³² Oɗ medappig amunu, daup danab ag gona, danab aɗit Jesus ele atulatppig ele amu baelti qiippig.

³³ Ag anam qiiatppig, amge haen ag Jesus gumidna wana amu, Nug mauhom anidppig. Nug mauhom anidna, baeg ii qiippig,

³⁴ amge daup danab laippu nug Jesus ban hawaɗppa qetti atule, am pahanab tiig le ele neum.

³⁵ Ag ele oolagppa genab dooglagnu laa nug keeke imu oh amegppa anttom ele nug amunu mattiom. Nai nug mattiom am genab, amu nug dootte, nai amunu nug maditte am genab.

³⁶ Keeke amu oh am Kayak naippa, nai daatte amu genab elele mekkunu beum. Nai amunu laa am inam. “Ag Nug ebehi laippu laa ii qiimna.”

³⁷ Am Kayak naippa nai amunu laa ele daatte am inam. “Laa ag qetti banppa atulppig ele amu, ag Nug anidkkulag.”

Jesus moɗppa meppig

³⁸ Keeke imu oh dimppa amu Josep, Arimatea ted, nug Juda okkai dilag baɗa, lokkumakppaib Jesusnu ippunittak awak danab oittom ele amu nug ukka, Jesus gaɗa aokkunu Pailat oɗ mettom. Oɗ mette, Pailat nug, “Ena,” awa a amu, Josep ukka Jesus gaɗa awom.

³⁹ Nikodemus, danab amu nug anukka digmakppa Jesus tuqan gumitta ukkom ele amu, nug ele uɗiom. Nug spais aɗit, muttuɗilah ena ele kaboliateg, keeke amunu uug am 30 kilogram amu, nug amu awa uɗiom. Spais laa onig am Mir, laa onig am Alo.

⁴⁰ Uɗie amu aa Jesus gaɗa aoya, Mir Alo ele meya, Jesus gaɗa ele linen lamen qatti elab elabppa itapiɗ. Juda ag danab gaɗa boumkkulagnu hedappig, amubia hepiɗ.

⁴¹ Amu dad laa, ag Jesus ad emaitakppa atulppig ele, aben amu guguittak, appa dayom. Dad amuppa men oɗe bau, anukka danab gaɗa amuppa laa ii meppig ele, amuppa dayom.

⁴² Juda dilag Pasowa Hobulnu bappaidkkulagnu deɗ aakku dayeye, ⌊deɗ amu uue, wagɗe buttua, deɗ amuam Sabat, amu Sabat deɗppa uɗat hemananu,⌋ amu men oɗe amu miag dayom amunu, aa appa Jesus gaɗa mepiɗ.