Jon 18 - Nobonob Baibel

Judas Jesus kekeɗ eppelagppa meum

¹ Jesus anam unuqitta male, Nug nuhikkud ippunittak awak danab ele ag ahan gona, oolnu noak onig Kidron mataɗna, olip dad laa appa dayom amu, ag dad amu ooppa noppig.

² Judas, nug Jesus kekeɗ eppelagppa meum ele, nug ele dad amu appa daye doyom. Aɗinu? Haen kuɗum Jesus Nug ippunittak awak danab ele ag dad amuppa qagmedappig.

³ Amunu Judas nug Rom dilag ban danab laala, amu daup ag Kayaknu mettid lag gumappig ele, ag oolagppanu mana mettak danab okkai amu ɗo gumak danab-Parasia ele ag laala heeg goppig ele amu, Judas nug ag oh ib ippuanatte, aben amuppa uɗippig. Ag amahlak, hul amu ban haknu keeke ele aon goppig.

⁴ Jesus Nug keeke oh nuhigppa hekkulag amu oh doya malom amunu ag uɗieg, Nug guguatta wana oɗ mattom. “Ag aun maditteb?” awa aum.

⁵ Anam a amu Nug oɗeppa aon appig. “Jesus Nasaret ted,” aon appig. Aeg am Jesus ag amelagppa aum. “Da iikku,” awa aum. Judas, nug Jesus kekeɗ eppelagppa meum ele amu Nug ele oh hippaidna daappig.

⁶ Hippaidna daaegeg, Jesus amelagppa, “Da iikku,” awa a, ag bittumttum gona, wanppa nena qeppig.

⁷ Ag nena qeeg amu Jesus Nug baula oɗ mattom. “Ag aun maditteb?” awa aum. Anam a amu ag appig, “Jesus Nasaret ted,” aon appig.

⁸ Anam aeg am Jesus aum. “Da am danab amu iikkuib, da matu amelagppa ami. Ag da mattiɗna doppig dayeb amu, ag danab imu uuadppeg ukkeg!” awa aum.

⁹ Nug nai amu aum amu Nug anukka nai laa aum, nai amu meu oum. Nai Nug anukka aum am inam. “Na da meɗame amu, laippu laa ii qettoɗom.”

¹⁰ Aria, Saimon Pita nug qep elab ele amunu nug eeɗa awa, mana mettak ikki danabnu maɗi nid laa daug naɗiap hoiyom. Nid amu onig Malkus.

¹¹ Anam he amu Jesus Pita amegppa aum. “Na nahip qep elab eɗun abenppa me! Attemu? Le mua kap-ppa daatte, Mame meɗom ele amu, da iite lapa?” awa aum.

¹² Nug anam a amu, Romnu ban danab, ahilag ikki ele, amu Juda dilag daup ag Kayaknu mettid lag gumappig ele ag Jesus aɗana, muɗippa hippalppig.

¹³ Hippalona, ag aon, tatam Kaiapas tanab Anas toppa goppig. Kaiapas nug maɗ amuppa mana mettak ikki danab dayom.

¹⁴ Kaiapas amu nugib tatam Juda okkai laa amelagppa inam aum. “Danab laippu laa nug danab ah oh abenlag awa mauhkku dayeb, amuam ena,” awa aum.

Pita, “Da Jesus ii doottem,” awa aum

¹⁵ Am Saimon Pita nug ippunittak awak danab laa ele, aa Jesus dim lamidpiɗ. Mana mettak ikki danab nug ippunittak awak danab laa amu doyom amunu, nug mana mettak ikki danab amu laugnu haɗap-ppa noum,

¹⁶ amge Pita nug dimittim, od oɗeppa dayom. Anam dayeye amu ippunittak awak danab laa, mana mettak ikki danab nug doyom ele nug wana, maɗi nid ahin od gumom ele amegppa ana, Pita omala ooppa noum.

¹⁷ Ippunittak awak danab, mana mettak ikki danab nug doyom ele nug anam he, maɗi nid ahin od gumom ele amu Pita oɗ mettom. “Na ele danab imunu ippunittak awak danab laatai?” awa aum. Nid ahin nug anam a amu Pita aum, “Da iitta!” awa aum.

¹⁸ Haen amuam oug haen amunu maɗi nid, amu daup ele ag oug doona, ag aab laa ilan uɗignana daaegeg, Pita nug ele ulah qeum amunu, nug ele gakkaɗak aokkunu aab ilappig amu uɗikka dayom.

Mana mettak danab dilag ikki Jesus oɗ mettom

¹⁹ Anam dayeye amu mana mettak ikki danab nug Jesus ippunittak awak danab nuhikkudnu amu danab ah amelagppa nai mehuqom, amunu ele oɗ mettom.

²⁰ Oɗ mette amu Jesus Nug oɗeppa awa inam aum. “Da Juda danab ah qagmettebppa, ag amelagppa miag atiakppa nai mattimi. Da nai doyak lag kuɗumppa, amu mettid lag ooppa ele ippunittak maadttami. Da lokkumakppa laa ii mehuqttami.

²¹ Amunu aɗinu na da oɗ meɗattem? Na danab ag nai dahil dooppig ele, ag oɗ matte! Ag am dahil nai dooppig,” awa aum.

²² Jesus Nug anam a amu, daup laa hibaitta dayom ele nug eppeg oohap ta, hippeg mataɗaɗa aum. “Na mana mettak ikki danab nai amuppate nob medattemte?” awa aum.

²³ Anam a amu Jesus amegppa aum. “Da nai nau ami dayeb amu, na tutukku da amelppa appe doyei! O iitta da nai tutukku ami dayeb amu, aɗinu na da oiɗme?” awa aum.

²⁴ Jesus anam a amu Anas nug Jesus, muɗippa qakkak ele, Kaiapas, nug am mana mettak ikki danab, nug toppa me ukkom.

Pita baula, “Da Jesus ii doottem,” awa aum

²⁵ Saimon Pita nug aab uɗikka dayeye, ag nug oɗ medappig. “Na ele nuhig ippunittak awak danab laatai?” aon appig. Anam aeg amu nug aum. “Da iitta,” awa aum.

²⁶ Anam ukke amu, mana mettak ikki danabnu maɗi nid laa, nug am maɗi nid Pita daug hoiyom ele, nug amunu tiig laippu amu, nug Pita oɗ meum. “Da na olip dad appa Jesus ele daaeheh, na iite anidmi,” awa aum.

²⁷ Anam a amu Pita eɗua amegppa, “Iitta,” awa aum. Nug anam a, haen amuppanab matuk dawai gayom.

Jesus aon Pailat toppa goppig

²⁸ Matuk gaye amu buttuanab ag Jesus Kaiapas toppanu aona, gawananu lag enanagnabppa goppig, amge ag akka ag gawana laug ooppa ii noppig. Iitta. Ag Pasowanu Hobulnu ee lakkulagnu oolag he, ag oolagppa, “Gawana imu nug Juda iitta, ihinig ɗoppa ig nug laug ooppa gokkunig dayeb, ig Kayak ele ouqa dayaknu elele iitta daagnig. Ig anam daatta amu, ig Pasowanu Hobulnu ee ele lakkunignu elele iitta daagnig amunu, ig lag ooppa ii gomata,” anana, lag ooppa ii goppig.

²⁹ Anam amunu ag dimittim daaegeg, Pailat nug dimittim ag gumatta doa oɗ mattom. “Danab imunu nai attemu?” awa aum.

³⁰ A amu ag nug oɗeppa aon appig. “Nug ɗo tippalak iitta dayeb amu ig omalta, nahip-ppa ii uɗilom,” aon appig.

³¹ Aeg amu Pailat nug ag amelagppa aum. “Ag akka Nug aon gona, ahilag ɗoppa nuhig nai epeɗieg!” awa aum. Anam a amu Juda okkai ag appig. “Rom ag ig danab laa qepput mauhkkunu aib appig amunu, ig danab laa qepput mauhkkunu elele iitta. ⌊Diig amunu amu ig na Rom dilag kobolppa danab imu ad emaitakppa aihkkutnu oonig daatte,⌋” aon appig.

³² Ag nai amu appig amu Jesus Nug kobol aɗippa mauhkkunu aum ele, nuhig nai amu meu oum.

³³ Anam aeg am Pailat nug eɗua laugppa noa he, Jesus nug toppa do, nug Jesus oɗ mettom. “Na Juda dilag kingte?” awa oɗ mettom.

³⁴ Pailat anam oɗ mette amu, Jesus Nug Pailat oɗ mettom. “Na nakka nai amu attemte, o iitta laa ag na amenppa dahilnu appigte?” awa oɗ mettom.

³⁵ Anam oɗ mette amu, Pailat nug aum. “Da am Juda tedte? Nahipad danab ah amu mana mettak danab okkai ele ag na omaidna uɗin, da eppelppa meidppig. Na aɗi heme?” awa aum.

³⁶ Pailat anam a amu Jesus aum. “Dahil ɗo maɗoɗ am wan imuppan iitta. Dahil ɗo maɗoɗ wan imuppanulob amu dahilad danab ag ban heppeg, Juda okkai ag da ii aɗailob. Amge dahil ɗo maɗoɗ amu ippanu iitta,” awa aum.

³⁷ Jesus anam a amu, Pailat nug Jesus amegppa aum. “Na anam attem amunu, na aakku king daattem,” awa aum. Nug anam a amu, Jesus Nug aum. “Na dahilnu, ‘Na am king daattem,’ mattina attem amu na tutukku attem. Da anil nug da doyak diig genabib mehuqeqe oikkulnu menuiɗom. Ge, diig amunu da wanppa uɗimi. Laa oh ag doyak diig genabib dim lamidtteb amu, ag dahil nai dootteb,” awa aum.

³⁸ Nug anam a amu Pailat amegppa aum. “Doyak diig genabib am aɗi?” awa aum. Nug anam ana, nug aha, dimittim Juda gumatta ukka aum. “Da nuhigppa ɗo tippalak laa ii anidmi.

³⁹ Am ag ahilag kobol laa ele daatte, amu kobol amuppa da Pasowanu Hobul haenppa danab laippu laa uhuqe madattem amunu, ag aɗi atteb? Da Jesus, Nug Juda dilag king, da Nug uhuqkkulnu oolag daattete?” awa aum.

⁴⁰ Nug anam aum, amge ag qalan appig. “Nug iitta! Barabas uhuqna mekke!” aon appig. Barabas nug am ban haaha, keeke yab awak danab.