Jon 16 - Nobonob Baibel

¹ Ag ahilag ooppa genab doyak ii paɗamnanu da nai imu oh amelagppa ami.

² Danab ag Juda dilag nai doyak lag ooppanu lamadkkulag. Ge, dimppa haen beeb, ag ag aqappeg mauhppeppeg, ‘Ig Kayaknu uɗat ena hettem,’ aon akkulag.

³ Danab amu ag da Mama ele ii dooitppig gemu ele ii dooit-tteb amunu, ag anam hekkulag.

⁴ Da nai imu mattiminu diig am haen amu beebeb, da dabmak awaknu nai imu mattami amu, ag daulagppa dokku. Digmakppa da ag ele daamut amunu, da nai imu ag amelagppa ii ami; gemuib madittem.

Jesus Mameg toppa ukkeb, Kayak Ouɗi nekku

⁵ Gemu amu da laa, Nug meiɗe uɗimi ele, da Nug gumitte gottem. Amu ag oolagppa laippu laa nug da oɗ meɗa, ‘Na adeppa gottem,’ laa ii atte.

⁶ Da nai mattimi, diig amunu ag oolagppa oo doyak okkainab aotteb.

⁷ Da genabnab genab ag amelagppa attem. Da hab aabppa gokkul am ena. Da ii goppi am ena iitta. Aɗinu? Da ii goppi amu Kayak Ouɗi, ahilag Ehanittak, Nug ii nema, amge da tein dayeye, da meppi, Nug ag gumatta nekku.

⁸ Haen Nug uɗikku amu, Nug wan imuppan danab ah hipuninnu, genab tutukku hak kobolnu, amu epeɗiaknu ele ag ippunadkku.

⁹ Nug danab ah hipuninnu ippuanatteb, ag hipunin diignab, am danab ag dahilnu oolagppa genab ii dootteb amu, ag amu dooglag.

¹⁰ Nug genab tutukku hak kobolnu ippuanatteb, ag dooglag, ag kobol ena hekkulagnu elele daaglag. Aɗinu? Da Mame toppa gottem; danab ah ag da baula ii aniɗmana.

¹¹ Nug epeɗiaknu ele ippuanatteb, ag dooglag, wan imuppan okkai, Satan, nug aakku epeɗiak awa mala, nob nau aokkunu daatte.

¹² Da nai kuɗum laa ele ag amelagppa madikkulnu hettem, amge geha imu ag aoglagnu elele iitta.

¹³ Amge Kayak Ouɗi, doyak diig genabib diig, haen Nug na, Nug keeke oh doyak diig genabibppanu ippunadkku. Nug nukka nuhig dabmakppa ii mattima. Iitta. Nug aɗi doyom aakkuib madikku. Aɗi aɗi dimppa bekku, amu ele ippunadkku.

¹⁴ Nug dahilppanu aɗi awom amu, Nug ag amelagppa madikku amunu, amuppa Nug da binal amahlak oppiaawak meɗakku.

¹⁵ Mamenu keeke oh amu dahil amunu da ami. ‘Kayak Ouɗi Nug dahilppanu aɗi awom amu, Nug ag amelagppa madikku.’

¹⁶ Nakok laa ele ag da ii aniɗmana. Nakok laa ele dimppa amu ag da baula aniɗkkulag,” awa aum.

¹⁷ Jesus anam a amu ippunittak awak danab nuhikkud laala ag akka akka nug oɗ mettan appig. “Nai nuhig imuam diig attemu? ‘Nakok laa ele ag da ii aniɗmana, amu nakok laa ele dimppa amu ag da eɗun aniɗkkulag.’ Nug inam ele aum, ‘Da Mama toppa gokkul.’

¹⁸ ‘Nakok laa ele,’ nai amuam diig attemu? Nug aɗitainu nai amu aum amu ig diig ii doottem,” aon appig. Ag anam anana, akka akka nug oɗ mettaegeg,

¹⁹ amu Jesus Nug doyom, ag Nug ele oɗ mettaglagnu heppig amunu, Nug ag amelagppa aum. “Da nai ami amunute ag akka akka nug oɗ medatteb? Da inam ami. ‘Nakok laa ele ag da ii aniɗmana amu nakok laa ele dimppa amu ag da eɗun aniɗkkulag!’ awe ami.

²⁰ Da genabnab genab ag amelagppa attem. Wanppan danab ah wannu kobol dim lamadtteb ele ag oolag gamag ahakku, amge geha ag dahilad daatteb amu, ag naɗi gaaglag; ag oo doyak ele gaaglag. Ag geha oolagppa oo doyak okkai aon daaglag, amge ahilag oo doyak am eɗueb, ag maɗoɗppan gamag ahak dooglag.

²¹ Ah nug nid menukkunu haen male, nug guittak dootte, amge nug nid menuowa, nug baula guittak ii dabmette. Aɗinu? Nug nid menue doum amunu, nug maɗoɗppan gamag ahak dootte.

²² Anamnab aakku. Gemu amu ag oolagppa oo doyak ele daatteb, amge da geha ag eɗue anadkkul, amu haen amuppa ag maɗoɗppan gamag ahak okkai dooglag. Amu laa nug ahilag maɗoɗppan gamag ahak amu qeeb nekkunu elele iitta,” awa aum.

²³ Jesus Nug anam ana, Nug nai tuɗitta aum. “Geha deɗ amuppa ag keeke laanu da iinab oɗ meɗamna. Da genabnab genab ag amelagppa attem. Mama Nug aɗi keeke ag da onilppa Nug oɗ medappeg amu, Nug ag madakku.

²⁴ Uɗie uɗie, gemu batak ag keeke laanu da onilppa Nug oɗ ii medappig. Ag maɗoɗppan gamag ahak doonna daappeg, oolag mekkunu amu, ag Kayak keeke enanu unuqidppeg, Nug ag madakku.

²⁵ Da keeke danab ag dootteb ii dootteb ele ouaqate ippuanattette, keeke imu ohnu ag amelagppa mattimi, amge geha haen uɗieb, da baula ag amelagppa anam bia ii madipa. Iitta! Da nai miag matule, Mamenu madikkul.

²⁶ Haen amu uɗieb, ag geha Nug da onilppa oɗ mettaglagnu amu da ag oulag dayeye Nug unuqidkkulnu ii attem.

²⁷ Iitta! Mame Nug nukka ahilagnu oo mauhtte. Aɗinu? Ag dahilnu oolag mauhtte, amu ag ele da am Kayak toppanu uɗimi oolagppa genab dootteb.

²⁸ Genab, da Mama toppanu uɗie, wanppa nemi daattem. Gemu am da wan imuppan ahe, eɗue Mama toppa gokkul,” awa aum.

²⁹ Nug anam a amu nuhikkud ippunittak awak danab ag Nug amegppa appig. “Gemu na nai miagib matulna madittem, na keeke danab ag dootteb ii dootteb ele ouaqatna ippunittak nai ii attem.

³⁰ Gemu amu ig doottem, na keeke oh doottem amunu, danab laa nug tatam na oɗ metteb, na dimppa nug nob medakkutnu iitta. Iitta. Na oɗmak amu matu doon malan, nob mekkutnu elele. Amuppa na Kayak toppanu uɗime amu, ig oonigppa genab doottem,” aon appig.

³¹ Anam aeg amu Jesus amelagppa aum, “Genab ag gemu oolagppa genab doottebte?

³² Antteg! Haen aakku miag uɗiom. Ao, haen aakku doum. Laa ag ag lamadppeg, da uuiɗna, matatun appalagppa ukkadkkulag. Amge da dakka ii daapa. Iitta. Da Mamel Nug da ele daagnih.

³³ Da nai imu ag dahilppa maɗoɗ aon daaglagnu elele daaglagnu amelagppa ami. Wan imuppa amu ag uug anidkkulag, amge ag uug aib aqom! Aɗinu? Da wan imuppanu ɠagattag eɗidmi,” awa aum.