Jon 12 - Nobonob Baibel

Maria Jesus goɗenppa laaittom

¹ Aria, Pasowanu Hobul bekkunu heehe, deɗ eblaih laippu daye, Jesus Nug tatam danab mauhe maɗettom ele onig Lasarus, nug appagppa Betani ukkom.

² Ag Jesusnu lewa nakok aab amuppa heeg, Marta nug ee yeeye, Lasarus nug amu, Jesus, danab laala ele ag balalppa daanna, ee lappig.

³ Ee lanana, Maria nug leppu muttuɗig enanag, uug nuhig 350 gram, nuhig daden okkai ele amu, nug amu awa, Jesus baeg gokkaɗ qettowa, ikki uɗugppa Nug baeg oppiom. Ag leppu amu bala laa onig nad, amuppaib heppig. Anam he, leppunu muttuɗig lag amu oh tona malom.

⁴ Amge nuhikkud ippunittak awak danab laa, Judas Iskariot, nug Jesus kekeɗ eppelagppa mekku ele amu, nug aum.

⁵ “Leppu muttuɗig enanag umu, nuhig nob am silwa men doɗo 300 amunu, aɗinu nug danab laa daden mekkunu ii meum? Nug anam ha, men doɗo aololob amu nug daɗek danab mattalo,” awa aum.

⁶ Judas nug anam awa aum, amge nug daɗek danab dilag dabma ii aum. Iitta. Nug ippunittak awak dilag men doɗonu kunup gumama yab aottom.

⁷ Judas nug anam a amu Jesus Nug aum. “Uue! Ah imu nug da boumiɗkkulagnu beɗul babaittom.

⁸ Daɗek danab ag oolagppa hanhan daaglag, amge da ag ele haen oh ii daamta,” awa aum.

⁹ Ag anam henan daaegeg, Juda danab ah kuɗumnab ag Jesus aab amuppa daatte doona, ag gumidna uɗippig, amge ag Jesusib anidkkulagnu ii uɗippig. Iitta. Jesus Nug Lasarus moɗppanu maɗette ahom amunu, ag Lasarus anidkkulagnu ele uɗippig.

^10-11 Juda kuɗumnab ag Lasarus anidkkulagnu gona, ag Jesus he, Lasarus moɗppanu eɗua hibaittom amu dabmenana, ag Jesusnu oolagppa genab dooppig amunu, mana mettak danab okkai ag Lasarus ele qeppeg mauhkkunu maittak aoppig.

Jesus king bia Jerusalem ukkom

¹² Aria, danab ah huanak ag Pasowanu Hobul anidkkulagnu uɗin Jerusalem daappig. Daaegeg, deɗ naɗi ii nak haenppa, wagɗe deɗ amuppa nekkunu dayom amu, danab ah huanak amu ag Jesus Jerusalem uɗitte amu dooppig.

¹³ Ag anam doona, ag ad pam eppeg uɗug ele qiialadna, Jesus uɗa tekkulagnu gona eppig. “Ig Kayak onig humatu! Laa nug Naɗi onigppa uɗitte amu, ig Naɗi Nug itidkkunu oonig daatte. Naɗi Nug Israel dilag king itidkkunu oonig daatte!” aon appig.

¹⁴ Jesus Nug donki nag laa ⌊nakok okkai meum⌋ antta, Nug amuppa ta dayom. Nug Kayak naippa, nai laa daatte, amubia heum. Nai amuam inam.

¹⁵ “O danab ah Sion daatteb, ag aib baɗappig! Antteg! King ahilag Nug ahilagppa aakku uɗitte. Nug donki nag ⌊nakok okkai meum⌋ attan dayaya aakku uɗitte.”

¹⁶ Yaak anam niitte, amge Jesusnu ippunittak awak danab ag tatam nai amunu diig am, ag oolag ii maittom. Dimppa Jesus Nug Mame toppa ukke, haen amuppa amu Kayak naippa yaak amu dayom daulagppa do dabmena, keeke oh yaakppa dayom ele am anamib beum, amu ele daulagppa do dabmeppig.

¹⁷ Aria, Lasarus nug mauha moɗppa niiom, haen amuppa danab ah kuɗum ag ele daanna, Jesus Nug Lasarus onigppa ewa maɗette, aha dimittim do anidppig amu, ag amunu tuɗidna mattiegeg,

¹⁸ danab ah laala ag Jesus Nug Kayak dabmettaknu kobol danab haknu elele iitta amu heum, ag nai amu dooppig amunu, ag Jesus uɗa tekkulagnu goppig.

¹⁹ Ag goppig amunu ɗo gumak danab-Parasia ag akka akka nai mattin appig. “Ig nuhig ib oo nekkunignu elele iitta. Antteg! Danab ah oh Nug dim lamidtteb,” aon appig.

Grik laala ag ele Jesus anidkkulagnu goppig

²⁰ Amu haen amuppa Grik laala ag ele Jerusalem appa Juda danab ah ag hobul amu anidkkulagnu ukkaegeg, ag ele oh Kayak noobppa dup nona binag mekkulagnu goppig.

²¹ Grik danab amu ag Galilinu aab Betsaida ted Pilip gumidna gona amegppa appig. “Danab naɗi, ig Jesus anidkkunignu oonig daatte,” aon appig. Betsaida am Galili appa dayom.

²² Aeg am Pilip ukka, Andru amegppa aum. A amu Andru nug Pilip ele oh goya Jesus amegppa apiɗ.

²³ Aeh amu Jesus Nug amelahppa aum. “Danab Bekkalag da, da binal amahlak oppiaawak ele aokkulnu haen aakku uɗiom.

²⁴ Genabnab genab da ag amelagppa attem. Wit aeg nug qaɗu bekkunu wanppa ii na qekku, aeg nug ele ii nauhkku amu, aeg nug aakkuib daatte, amge nug wanppa na qa nauhkku dayeb amu, nug bau ba, meu huanak otte.

²⁵ Anam amunu, aun nug wanppanu bau daakkunu dabmak anuqak aotte amu, dimppa nug bauklel hanhannu ii aoma. Amge aun laa nug wan imuppan beɗu bau dayaknu oo ii qette, amunu dabmak okkai ii aotte amu, nug bauklel hanhannu Kayak eppegppa aokku.

²⁶ Amu laa nug da waalppa dayaya da oɗel dim lamidkku dayeb amu, nug da dim lamiɗkkuoitte. Am da adeppa daattem amu, dahil maɗi nid nug ele appa daakku. Am laa nug da waalppa dayaya da oɗel dim lamidkku amu, Mame Nug nug binag humakku,” awa aum.

Jesus Nug ag nug ad emaitakppa atulkkulagnu aum

²⁷ Jesus Nug nai amu awona, Nug nai tuɗitta aum. “Da oolppa dabmak kuɗumnab aottem. Da, ‘Mame, na haen imunu mua nau imu heppe da ii anidpa,’ akkulte? Iitta! Da uɗat imu hekkulnu uɗimi,” awa aum.

²⁸ Jesus Nug anam anana amu, Nug nai tuɗitta aum. “Mame, na heppe, na onin nug binag amahlak oppiaawak ele miag atikkunu oɗ medattem,” awa aum. Anam a amu, baag laa hab attannu na aum. “Da tatam anam hemi, amu da baula anam hekkul,” awa aum.

²⁹ A amu, danab ah laala appa daappig amu, ag, “Hakkaɗ qeum,” aon appig. Laa anam aeg, amu laa ag appig, “Engel laa Nug amegppa nai mattiom,” aon appig.

³⁰ Ag anam aeg amu, Jesus ag amelagppa aum. “Baag imuam da ehaniɗkkunu ii neum. Iitta! Ag ehanadkkunu neum.

³¹ Gemu amu, wan imuppan danab oh dilag epeɗiak haen. Gemu haen imu amu, Kayak Nug heeb, wan imunu gumak danab nug gumak aben nuhigppa ii daama.

³² Amge haen ag da ad emaitakppa aihiɗkkulag, haen amuppa amu da danab ah oh eeɗadppi, ag dagattolppa dokkulag,” awa aum.

³³ Jesus Nug nuhig mauhaknu ib amu miag atikkunu, Nug nai anam mattiom.

³⁴ Nug anam mattie amu danab ah kuɗum nug oɗeppa aon appig. “Ig ɗoppa nai inam doomut. ‘Kristus Nug hanhan daakku!’ Am attemun na Danab Bekkalag ad emaitakppa aihkkulagnu attem? Danab Bekkalag, na nuhignu madittem amu, Nug am aun?” aon appig.

³⁵ Anam aeg am Jesus Nug aum. “Ag haen nakoknab laa ele amahlak ele daaglag. Haen imuppa ag amahlak ele amunu, gatatu ag tonadmanu ag amahlak ele oiyeg! Laa nug gatatuppa oitte amu nuhig ib ii anidtte.

³⁶ Ag amahlak ele daanna, ag amahlaknu oolagppa genab doyeg! Ag oolagppa genab dooglag amu, ag amahlak bekkod daaglag,” awa aum. Jesus nai amu awowa uuatta, ag amelagnu lokkumom.

Juda kuɗum ag Jesusnu oolagppa genab ii dooppig

³⁷ Jesus Nug danab ah kuɗum amelagppa Kayak dabmettaknu kobol danab haknu elele iitta kuɗum heum, amge ag nuhignu oolagppa genab ii dooppig.

³⁸ Ag oolagppa genab ii dooppig amunu, ag heeg propet Aisaianu nai aakku elele mettom. Propet nug nai inam aum. “Naɗi, aun nug ihinig nainu ooppa genab doyom? Aun nug Naɗi Nug nuhig ɠagattag ippunitte, danab amu nug amunu tutukku dabmaama anttom.”

³⁹ Ag nai ii dooppig, Kayaknu uɗat okkainu diig ele ii dooppig, diig amunu, ag Jesusnu oolagppa genab dooglagnu elele iitta. Aɗinu? Keeke amunu Aisaia nug nai laa inam ele yom.

⁴⁰ “Nug danab amu ag amelag he gaɗuom, ag oolag ele he, ɠagattag eppom amunu, ag amelagppa keeke laa anidna, oolag eɗueb, oolag tutukku dabmedappeg, da ag bappaladkkulnu elele iitta.”

⁴¹ Aisaia Jesusnu binag amahlak oppiaawak ele anttom amunu, nug Jesusnu aum.

⁴² Aisaia anam antta yom amubia ikki danab kuɗumnab ag oolagppa genab ii dooppig, amge laala kuɗum, ag oolagppa genab dooppig. Ag oolagppa genab dooppig, amge ag ɗo gumak danab-Parasia, amu dilag baɗappig. Ag ag lamadppeg, nai doyak lag dimittim daamnanu baɗana, oolagppa genab doyak amu miag ii atippig.

⁴³ Ag danab ag binalag mekkulagnu oolag mauhttom. Kayak Nug ag binalag mekkunu amu, ag amunu oolag ii mauhom.

⁴⁴ Amu Jesus huanak ewa nai mattiaya aum. “Laa nug dahilnu ooppa genab dootte amu, nug dahilib ooppa genab ii dootte. Iitta. Aun nug da meiɗe uɗimi ele, nug nuhignu ele ooppa genab dootte.

⁴⁵ Am laa nug da aniɗtte amu, nug aun da meiɗe uɗimi ele amu Nug ele anidtte.

⁴⁶ Amu laa nug dahilnu ooppa genab dootte, nug gatatuppa daamanu da amahlak awen, wan imuppa uɗimi.

⁴⁷ Am laa nug dahil nai doya dim ii lamidtte amu, da nug ii epeɗipa. Da wanppan danab ah epeɗiadkkulnu ii uɗimi. Iitta. Da ag eɗuen diikkulnu uɗimi.

⁴⁸ Laa nug da dimeɗa, dahil nai ii aokku amu, nuhig epeɗiak nug aokkunu appa ana daatte. Nai da nug dookkunu mattimi ele amu, nai amu geha gog tak haenppa nug hettoɗiakppa epeɗikku.

⁴⁹ Da dakka dahil dabmakppa nai ii madittem. Iitta. Mame, Nug da meiɗe uɗimi, Nug da uɗat meɗom ele, Nug da aɗi nai akkulnunab, attem hein madikkulnunab ele meɗom.

⁵⁰ Am da doottem, Mamenu haknunab anak am bauklel hanhannu nai amunu, da nai amu madittem ele, Mame Nug da amelppa aum, amuib da madittem,” awa aum.