Jon 10 - Nobonob Baibel

Jesus Nug am sipsip gumak danab ena

¹ Jesus Nug nai amu mattia mala, Nug nai imu ele mattiom. “Da genabnab genab ag amelagppa attem. Danab laa nug sipsipnu aɗ odppa ii notte, nug aɗ leta notte ele, danab amu nug am yab danab, amu yab danab naunab ele.

² Am danab nug aɗnu odppa tutukku notte ele amu, nug am sipsipnu gumak danab.

³ Amunu nug uɗie, sipsipnu od gumak danab nug od matula mette, nug ooppa no, sipsip nuhikkud ag nug baag dootteb. Ag dootteb amu, nug nuhikkud sipsip onilagppa ewa diia, dimittim gotte.

⁴ Haen nug sipsip nuhikkud oh diia dimittim ukka amu, nug anuqa ugekke, sipsip ag nug baag doon dim lamidtteb.

⁵ Ag danab laa dim ii lamidmana. Iitta. Ag oolna gokkulag. Aɗinu? Ag danab laa baag ii dootteb,” awa aum.

⁶ Jesus Nug keeke danab ag dootteb ii dootteb ele ouaqatta, amu ippuanattatta mehuqom, amge ag nai amunu diig amu, ag oolag ii maittom

⁷ amunu, Jesus Nug nai laa mattiaya aum. “Da genabnab genab ag amelagppa attem. Da am ⌊hab aabppa ukkaknu⌋ od oɗe, sipsip ag aɗ ooppa nokkulagnu od oɗeppa notteb, amubia.

⁸ Laa oh anuqna uɗina, ‘Da am Kristus,’ appig ele, ag am yab danab, amu yab danab naunab ele. Amge sipsip ag danab amu baalag ii dooppig.

⁹ Da am od daattem. Laa nug dahilppa doa, aɗ ooppa nokku amu, nug Padal ii maknu ehanittak awa daakku. Nug ooppa doa, eɗua dimittim ukka, ee antta lakku.

¹⁰ Yabhok danab nug yab awak, qe mauhak, amu keeke he nauhak, nug amunuib uɗitte, amge da uɗimi ele imu amu, da ag bau dayak enanag ambaknab madakkulnu uɗimi.

¹¹ Da am sipsip gumak danab ena. Sipsip gumak danab ena nug sipsip ena daaglagnu mauhkkunu dayeb amu, nug mauhkku.

¹² Danab nug uɗat nid daatte, nug sipsip gumak danab genab iitta, nug sipsip mamelag ele iitta amunu, haen nug wulp uɗitte antta amu, nug sipsip uuatta, oola ugekke, wulp nug sipsip aqa lamatte, ag mauhnoak oolna, matatun tamtam gotteb.

¹³ Danab amu nug am uɗat nid amunu, nug ooltte. Nug sipsip pehettak dab-ii-madatte.

¹⁴ Da am sipsip gumak danab ena. Da dahilad sipsip doyadttem, sipsip ag ele da dooiɗtteb,

¹⁵ amubia Mame Nug da dooiɗeɗe, da Mame doottem. Laa ele, da dahilad sipsip, ag ena daaglagnu dabmein dayeye, dahil bau dayak heppi iitta mekku.

¹⁶ Da am sipsip laa, sipsip aɗ imuppan iitta, amu ele dahilad, da amu ele diikkuloitte. Diippi, ag da baal dooglag, amu ag oh sipsip ameg laippuib daaglag; ahilag gumak danab ele laippuib daakku ⌊amuam da⌋.

¹⁷ Da dakka bau dayak dahil eɗue aokkulnu da dahil bau dayak heppi iitta mekku amunu, Mame Nug dahilnu oo mauhtte.

¹⁸ Laa nug heeb, bau dahil iitta mekkunu am iitta; da dakka dahil bau heppi iitta mekku. Da dahil bau dayak heppi iitta mekkunu ehah ele, amu da bau dayak dahil eɗue aokkulnu, da ehah amu ele. Da haknunab anak amu Mamenu aomi,” awa aum.

¹⁹ Jesus anam a, Juda ag doona, baula oppatna, ameg aɗit daappig.

²⁰ Anam daanna, kuɗum laa ag appig. “Ouɗi nau nuhigppa daatte amunu, Nug kaaka qette. Ag aɗinu Nug oɗe dootteb?” aon appig.

²¹ Ag anam appig amge laa am appig. “Imuam danab ouɗi nau elenu nai iitta. Ouɗi nau nug danab ameg gaɗuak ele heeb, ameg oppatkkunu elelete?” aon appig.

Juda ag Jesusnu kekeɗ daappig

²² Am Jerusalem appa hobul laa, ag anukka Kayaknu mettid lag od eɗun matulppig ele, hobul amu daakkunu haen be, danab ah oh appa qagmeppig. Haen amuam oug haen.

²³ Jesus Nug haen amuppa Kayaknu mettid lag nuhig tomppan keeke oh ele ooppa noa, Solomonnu Aben atteb ele amuppa noa, aben amuppa oiyom.

²⁴ Nug anam noa oiyeye, Juda ag dona hippaidna, Jesus oo mettan daanna appig. “Na haen ganebnab heppe, ig dabmak aɗit ele daattem amu iitta mekku? Na genab Kristus daattem dayeb amu, na pehettana tutukku miag atiak appe dootu!” aon appig.

²⁵ Anam aeg amu Jesus Nug ag amelagppa inam aum. “Da ag amelagppa anam ami, amge ag oolagppa genab ii dooppig. Uɗat oh da Mame onigppa hettem amu, amuam da am Kristus, ippunadtte.

²⁶ Amge ag am dahil aɗppanu sipsip iitta amunu, ag oolagppa genab ii dootteb.

²⁷ Sipsip dahilad amu, ag da baal dootteb. Da ag doyadttem, amu ag da dim lamiɗtteb.

²⁸ Anam amu, da ag bauklel hanhannu madattem. Ag padal ii memana. Iittanab. Laa nug da eppelppanu ii oqaiatta diima.

²⁹ Da Mamel Nug ag da meɗom amu, Nug am keeke oh eɗattak. Laa nug Nug eppegppanu ii oqaiatta diima.

³⁰ Da Mamel ele amu i am laippu,” awa aum.

³¹ Jesus anam a amu Juda ag baula men aon, makkuɗppeg mauhkkunu heppig.

³² Makkuɗkkulagnu heeg amu, Nug ag amelagppa aum. “Da Mamenu ɠagattagppa uɗat ena ena kuɗumnabppa danab ah ehanadmi amu, aɗi uɗat amu ena iitta anidna, da menppa oiɗppeg mauhkkulnu hetteb?” awa aum.

³³ Jesus anam a amu Juda ag appig. “Ig uɗat ena laa dabmeta, na menppa oidpput mauhkkutnu ii hettem. Iitta. Na Kayaknu dabittak nai madittem. Na danab hamu amge na, ‘Da am Kayak,’ aon ame amunu, ig hettem,” aon appig.

³⁴ Aeg amu Jesus aum. “Ahilag ɗoppa Kayak oɗe inam yaak niitte. ‘Da ami, ag am Kayak ganiappud.’

³⁵ Anukka Kayak nai wan imuppan danab, amu dilagppa ukkom amu, amuppa Nug ahilagnu, ‘Ag am Kayak ganiappud,’ aum. Aria ig doottem, Kayaknu nai keeke laa hambuppuak ii ippunigtte. Iitta! Tutukkuib ippunigtte

³⁶ amunu aɗinu ag dahilnu, ‘Nug Kayaknu dabittak nai maditte,’ atteb? Kayak Nug da tituaniɗa, meiɗe wanppa uɗimi. Nug anam heum, amu anukka Nug wan imuppan danab laa dilag, ‘Ag am Kayak ganiappud,’ aum amunu, ‘Da am Kayak Bekka,’ haen da ami am, aɗinu ag amunu, ‘Nug Kayak aben aokkunu hette,’ aon appig.

³⁷ Da Mamenu uɗat ii hettem dayeb amu, ag dahil nainu oolagppa genab aib dooppig.

³⁸ Amge da Mamenu uɗat hettem dayeb, ag amuppa dahil nainu oolagppa genab dooglagnu elele iitta dabmak aotteb dayeb, da uɗat laala, danab haknu elele iitta hettem amu, ag amu anidna, oolagppa genab doyeg! Amuppa ag doyak aona, Mame Nug dahilppa dayeye, da nuhigppa daattem amu tutukku dooglag,” awa aum.

³⁹ Jesus Nug anam a, ag nug aɗaglagnu heppig, amge Nug ag qe-aɗattatta ukkom.

⁴⁰ Anam daye amu, Jesus Nug eɗua Jodan le mataɗa, anukka Jon nug danab ah digma layattak mattomppa, appa ukka dayom.

⁴¹ Nug appa dayeye, danab ah kuɗum Nug gumidna uɗippig. Uɗin amu ag appig. “Genab, Jon nug Kayak dabmettaknu kobol danab haknu elele iitta laa ii heum, amge nug nai oh danab imunu mattiom ele, nai amu oh am genabib,” aon appig.

⁴² Ag gumidna uɗin daan, ag oolagppanu danab ah kuɗum ag Jesusnu oolagppa genab dooppig.