Joel 3 - Nobonob Baibel

Yawe Nug wan ohppan danab ah ag Juda dilagppa eheɗ heppig ele epeɗiadkku

¹ Yawe Nug atte. “Anam amunu, doyeg! Haen amuppa da heppi, Juda danab ah ag eɗun uɗin Jerusalem, amu Juda wanppa laih laih ele daaglag.

² Amu haen amuppa da ele heppi, wan atu ohppan danab ah oh ag uɗin, aben oolnu noak onig Jehosapat, appa qagmekkulag. Ag qagmeppeg, da ahilag eheɗ hak ag Israel dilagppa heppig, Israel am dahilad danab ah amu, eheɗ hak amunu da ag epeɗiadkkul. Amu wanppan wan laalappan danab, eheɗ hak ahilag am inam. Ag danab ah dahiladnab lamatteg gona, wanppan wan laalappa matatun gona daaegeg, wan ahilkad amu, ag oppateg ne, panin aoppig.

³ Ag amu henana, ag dahilad danab ah ag aunnu laa maɗi nid daaglagnu tituankkulagnu, ag om yaan, ag ib baag ah ele oiglagnu nid danab aon, ib baag ahnu maɗi nid daakkunu ag nid danab amu nug eppegppa mettanna, ag wain daden mena lakkulagnu nid ahin aon, danab wain me, daden metteb ele, nid ahin amu nuhig maɗi nid daakkunu nug eppegppa meppig.

⁴ Ag Tair, Saidon amu Pilistia danab ah ele, ag dahilnu aɗi nai laal elete? Ag da keeke laanu nob nau meɗaglagnu hettebte? Ag anam hekkulagnu hetteb dayeb amu, ag dabmeig! Da pahanab ahilag hak nau dahilppa heppig amu, da amunu nob nau ag madakkul.

⁵ Hak nau ahilag am inam. Ag dahil silwa, gol, am keeke enanag laala ele ag diin gona, ahilkad kayak hambuppuak dilag mettid lagppa meeg dayeye,

⁶ ag Juda, Jerusalem ele dilah danab ah, ag am dahilad danab ah, ag appalag diigppa daamnanu, ag appanu awaidna, uma gona daaglagnu, ag ag diin maatteg, Grik danab ag ahilkad maɗi nid maɗi ah ele daaglagnu daden maadppig.

⁷ Amge antteg! Ag heeg, danab adebatainu ag dahilad danab ah daden maadna, diin goppig amu, da heppi, dahilad danab ah ag ahan eɗun uɗippeg, da ag Tair, Saidon, Pilistia ele ag dahilad danab ah dilagppa heppig, amubia da ahilagppa hekkul.

⁸ Am da heppi, ahilkad nid danab, nid ahin ele ag Juda eppelagppa daappeg, ag diin gona heppeg, Sabea danab, ag uma daatteb amu, ag ag ahilkad maɗi nid daaglagnu daden maadna, diin gokkulag.” Yawe Nug anam atte amunu, am anam bekku.

Aben oolnu noak onig Jehosapat, appa danab ah oh dilag hettoɗiak okkainab daakku

⁹ Laa nai imu ag wanppan wan ohppan danab ah amelagppa inam appeg doyeg! “Ag ban hekkulagnu babaitteg! Ag appeg, ban danab aheg! Ahan, ag ban haknu aben gukkuidna gona, ag ban hekkulagnu bappaidna dayeg!

¹⁰ Ag wan buuaknu aen aon, ag hamappa qeppeg, qep elab baɗ! Ao, ag ad eppeg babaittaknu aen amu, ag aen amu aon, hamappa qeppeg, ban gudkkud baɗ! Ag keeke anam bapaidppeg, ag oolagppa danab aun nug ban hekkunu gai-iitta, nug, ‘Da am ban danab ɠagattag elede,’ a!

¹¹ Ag wanppan wan ohppan danab ag paha aben ohppanu ban hekkulagnu abenppa uɗin, appa qagmeig!” O Yawe, ag uɗin bapaidppeppeg, na nahipad daup omaladppe, oh nekkulagnu ool daatte!

¹² Amu Yawe Nug atte. “Wanppan wan ohppan danab ag ahan, ag oolnu noak onig Jehosapat appa ukkeg! Aɗinu? Da appa dayeye, da danab ah wanppan wan ohppanu epeɗiadkkul.

¹³ Wan ohppan danab ah ag dad okkaippa ee lep ma malom, ag amubia daatteb amunu, ag okkulna aweg! Ao, wan ohppan danab ah ag grep meu huanaknab tappeb, leppu awaknu babaittak daatte, amubia daatteb amunu, ag digmena, tappeg! Danab ah oh dilag nau hak am wain daalolob, hinai oh ambakib daalob. Aɗinu? Ahilag nau hak am huanak daatteb,” awa atte.

¹⁴ Danab huanaknab, ao, danab huanaknab ag aben oolnu noak onig, “Yawe Nug Danab Ah Epeɗiadkku,” ag appa ana daatteb. Aɗinu ag appa daatteb? Aben amuppa, onig am Yawe Nug Danab Ah Epeɗiadkku amu, Yawenu deɗ naɗi paha miag dotte.

¹⁵ Deɗ amuppa amu, aam, kalam ele aa gatatu maiglah, hoɗopai ele ii amahalmana; iitta.

¹⁶ Yawe Nug Sion appa dayaya, Nug laion huana gaatte, amubia Nug nai baag okkai ele madikku. Ao, Nug Jerusalem appa dayaya, Nug nai baag okkai ele, hakkaɗ oqotti otte, amubia nai madikku. Nug nai mattiebeb, hab, wan ele uɗalkkulah, amge Yawe Nug nuhikkud danab ah dilag padal mak eɗitteb ena dayaknu aben bia daakku. Ao, Nug nuhikkud danab ah dilag ban haknu aben ɠagattag bia daakku.

Kayak Nug itittak ena digdig nuhikkud danab ah madakku

¹⁷ Yawe Nug atte. “Da anam heppi, ag Israel, ag da am Yawe, ahilag Kayak, da Sion appa daattem dooglag. Sion am qauko dahilnu tituanak daatte. Da appa daappi, Jerusalem am ele dahilnu tituanak daakku. Wan laihnu danab ag baula banelag iinab uɗimna. Iitta.

¹⁸ Haen amuppa amu, grep dad meu enanag otteb ele, am qauko oh tonadkkulag. Amu ag Israel, ag ahilkad makau, meeme ele qaukoppa gikkiɗah lanan daanna, huh huanaknab mattaglag. Le nakok Juda wanppa daatteb amu, ag ii qaɗaiettamna. Laa ele, Yawenu mettid lag ooppanu amu, le laa uɗiaya, oolnu noak ad akasia betteb amu, aben amu oh le madakku.

¹⁹ Ag Israel, ahilagppa amu ena anam daakku, amge Isip wan am hele-ettak daakku. Edom wan ele atu taɗaknab daakku. Aɗinu aa anam daaglah? Ag Juda wanppan danab ah guittak nau mauhnoak mattanna, appa ag danab ah eheɗ laa ii heppig ele aqaeg mauhppig.

²⁰ Isip, Edom ele aa anam daaglah, amge Juda wanppa amu, danab ah ag hanhan appa daaglag. Ao, Jerusalem appa amu, buɗub buɗub doobob, danab ah ag appa daaglag.

²¹ Amu danab ah ag dahilad danab ah aqaeg mauhppig ele, da ag eheɗ hak amunu nob elele eɗue madakkul,” awa atte. Yawe Nug Sion daatte.