Joel 2 - Nobonob Baibel

Joel nug baula Yawenu deɗ naɗinu mattiom

¹ ⌊Uug bekkun daatte amu, danab ah dooglagnu⌋ ag trampet Sion aab okkaippa appa iwaleg! Ao, ⌊danab ah ag haen nau bekkun daatte doon bappaidkkulagnu amu,⌋ ag qauko dahilnu tituanak daatteppa oqotti okkai heig! Yawenu deɗ naɗi uɗitte, uma iitta, miagnab daatte amunu, danab ah oh Israel wanppa daatteb, ag hahaɗeg!

² Deɗ amuam deɗ amahlak ele iitta; nug gatatuib daakku. Ao, deɗ amuam deɗ lombig hinqaknab atu oh tona daye, amahlak iitta daatte bia daakku. Deɗ amuppa tap-lokus uɗiglag. Ag ban danab huu okkai naɗi bia uɗin, wan tonatteb, o aamnu amahlak buttuanab ba he, qauko oh amahaltteb, tap-lokus ag amubia hetteb. Anukka keeke amubia laa ii beum, butti aɗi ele baula anambia laa ii bema.

³ Amu tap-lokus amu ag ukkaegeg, aab ewak keeke ewe, iitta mette, amubia aɗi keeke ag gokkulagppa daatte, ag keeke amu heeg, keeke aab ewak bia daatteb. Ao, ag gotteb baelagppa amu, aab ewa dittia huan attannab taata, keeke ewe iitta mette, amubia daatte. Tap-lokus ag gonana, wan ag gokkulagppa daatte, amuam wan atu enanag, dad Iden bia, amge tap amu gotteb baelagppa, keeke laa ii daatte; atu taɗaknab bia. Keeke laa ii uueg daatte; iitta.

⁴ Am danab nug tap-lokus anidtte amu, ahilag neekkak am hos bia. Ao, ag amu bannu hos nakok huana qaiedatteb, amubia tap-lokus ag oitteb.

⁵ Tap-lokus ag qauko eɗadna ukkaegeg, ahilag oqotti am bannu karis ukkaegeg, oqotti otte bia, o qahak ewewe, oqotti otte, anam bia, o daup huanaknab ban hekkulagnu qagmetteb, am amubia oqotti otte.

⁶ Am danab wanppan wan ohppa daatteb ele, ag tap-lokus amu anidna, ag eheɗ baɗaeg, beɗulag hahaɗtte; iɗulag ele hakkab ebatte.

⁷ Tap-lokus ag ban danab qaiettan, kekeɗ aqaglagnu gukkuadna gotteb, ag amubia hetteb. Ao, ag daup danab ban hekkulagnu aɗ letan gotteb, tap-lokus ag ele anam hetteb. Amu tap-lokus ag oh huuppa daanna, tappa ukkak laippuppa oitteb. Ag gona uɗina, ii gotteb. Iitta. Ag tutukku gokkulagnu gotteb, anamib gotteb.

⁸ Amu tap-lokus laa nug layag beɗu nakok ii aɗatte; iitta. Ag anen anen gotteb, anam laippu tappa ukkak tutukku gotteb; laa nug layag godeppa ii goma; iitta. Ag gotteb anamib gotteb. Aɗi keeke ag gomananu oo nak daatte amu, ag keeke amunu keeke hamu doon, ag ukkakib gotteb. Ag huuppa ukkaegeg, huu ahilag ii kabolitte; iitta.

⁹ Ag aab okkai ooppa gokkulagnu qaiettan gona, aabnu aɗ am keeke hamu doonna, ag tena letan, aab okkai ooppa nona, lagnu gililppa taadna, gililppa ulah ibuppa nona, lag ooppa yab danab hetteb bia notteb.

¹⁰ Ag oiyona ukkaegeg amu, wan hab ele uɗalttep; aam, kalam ele gatatu manaeh, hoɗoppai ele ii amahaltteb.

¹¹ Amu Yawe Nug nuhikkud daup noolagppa anuqa ugakka, Nug baag okkaippa hakkaɗ qette bia ette. Aɗinu? Nuhikkud daup dilag ebqak am huanaknab; ebqaknu elele iitta. Laa amu, laa Nug nuhig nai meu he bette ele, Nug am ɠagattag okkai ele. Laa ele amu, Yawenu deɗ naɗi am deɗ okkai ele. Deɗ amuam heeb, danab ebehi oh bodoetta le mekkunu deɗ amunu, auntai nug deɗ amu ɠagattag hibaitta daakkunu elele? Laa iitta.

Israel ag oolag eɗueb, Kayak dim lamidkkulagnu ewak

¹² Amu Yawe Nug atte. “Ag matu helob, amge ag gemu, yo, ag gemu haen imuppanab ag meulag ohppa, oolag ohppa, ɠagattag ohppa ele eɗun, da waalppa daaglagnu uɗieg! Ag ee ohnu kud mena, gaanna mahina, ag eɗun dahilppa uɗieg!

¹³ Amu ag lamen dimittimnu pattiɗna meɗaglagnu aib heppig. Iitta. Ag oolag unuqagppa, ‘Ig eheɗ nau hemut,’ doon, diig amunu ag oolag unuqag guittak doyeg!” Yawe Nug anam atte. Yawe Nug anam atte amunu, ag Yawe, ahilag Kayak, ag eɗun, Nug waappa daaglagnu waig! Aɗinu ag anam hekkulag? Yawe Nug oo bodoette enanag maɗoɗ ele hak kobol, Nug oo bodoetta le mak kobol ele dim lamidtte. Nug oo paha ii nauhtte, nuhig oo mauhaknab kobol am amba, leta nette. Amu ⌊danab ah ag oolag genab eɗutteb dayeb,⌋ deɗ kuɗum ag hipunin heppignu Nug uug naunab madakkunu daatte amu, Nug ii madatte; iitta.

¹⁴ Amu haen imuppa ele Nug eɗua, oo gai-iitta doya oo matta ehanadkkutai. Nug eɗua itittak ena matteb, wanppa keeke ena ba, meu ob, ag ee aegnu ofa, am wain gokkaɗaknu ofa ele Yawe, ahilag Kayak, ag Nug mettaglagnu elele daan mettaglag.

¹⁵ Ag trampet Sion aab okkaippa appa iwaleg! Ao, ag danab ah oh ag Yawe noobppa ee ohnu kud mena daaglagnu appeg doyeg! Ag oh Yawe noobppa qagmena dup nona Nug binag mekkulagnu deɗ metteg!

¹⁶ Ge, heppeg, danab ah ag qagmena, Yawenu tituana mettak dayeg! Ag heppeg, ikki danab ag uɗieg! Ge, heppeg, nid naunau, nid yuɗ ele oh uɗin dayeg! Danab nug ah aokkun daatte amu, nug laug oo nuhig uua, qagmakppa uɗiaɗ! Ao, ah nug danab aokkun daatte amu, nug dayak aben nuhig uua, nug ele qagmakppa uɗiaɗ!

¹⁷ Ag oh anam uɗippeg, mana mettak danab, ag na Yawe, ag nahip ɗo maɗoɗnu uɗat hetteb ele, ag na laut ooppa ukkaknu oo nakok odppa daatte, appa amu qaɗab ele gamagppa daanna gayeg! Gaanna ag inam aig! “O Yawe, na nahipad danab ah ig ehanigppe, ig padal ii mematanu oɗ medattem. Ao, na heppe, laa ag ig am nau bekkunu at daattem ii dabmemananu unuqidttem. O Yawe, na heppe, danab ah laa ag ihinignu ig keeke hamunab dooglag dayeb, danab ah amu ag, ‘Ahilag Kayak adeppa daatte,’ akkulag, amu aɗinu ag anam akkulag? Amu ena iitta.” Ag anam aig!

Yawenu nai noob mak

¹⁸ Ag anam heppeg, Yawe Nug wan nuhignu, dahil doya laa aomanu doyak aɗa daya, Nug nuhikkud danab ah dilagnu oo gai-iitta doya oo matta ehanadkku.

¹⁹ Yawe Nug anam dookku amunu, Nug nuhikkud danab ah amelagppa inam akku. “Da heppi, ee, wain bau, olip goɗen ele elelenab daappeg, ag ee elelenab lakkulag. Haen laala da hei, danab ah wanppan wan laalappanu ag, ag Israel ahilagnu, ‘Keeke hamunab,’ dooppig amu, da baula anam ii hepa; iitta.

²⁰ Tap-lokus, ag ban danab huu naɗi bia, ag yawalti uɗitteppanu uɗippig amu, da ag lamadppi, ag wan laa, gu appa ii neene, keeke ii bette ele, amuppa lamadppi, ag wan amuppa gokkulag. Ameg laa anuqtteb amu, ag le onig, ‘Mauhak Le,’ amuppa goppeg, ameg laa dim gotteb amu, ag Mediterenia yuppa gokkulag. Ag anam gona, oh mauhna malappeg, beɗulkad beɗebeb, uɗig nau ahakku.” Yawe Nug anam akku. Amu bekkunu diig am, Yawe Nug uɗat ɠagattag hekku.

²¹ Yawe Nug uɗat ɠagattag ag Israel danab ah, ahilagnu ha malom amunu, ag aib baɗappig. Ag baɗak uun, ena doon, ag gamalag ahaɗ!

²² Doɗ dakkuɗ, ag ele aib baɗappig. Aɗinu? Gikkiɗahnu dadppa gikkiɗah bau digma bette. Laa amu, ad meu otteb ele amu, aakku meu otteb; ad fig, am muɗi grep aa meu ottep.

²³ Yawe Nug hanhan genab tutukku hak kobol dim lamidtte amunu, Nug he, oug haen digmetteppa gu neum. Ao, Nug he, gu elelenab, oug haen digmetteppa, gakkaɗak haen digmetteppa ele, anukka neum bia, nette. Anam amunu, Sion danab ah ag gamalag ahaɗ! Ao, ag Yawe, ahilag Kayak, ag nuhignu gamag ahak okkai doyeg!

²⁴ Nug anam gu he neum amunu, ee aeg mumuɗaknu abenppa ee aelkad qagmak okkainab daaglag. Am grep leppu, olip goɗen ele danab meu titiegeg, hinaippa notte amu, leppu amu ambeeb, hanak am ambaknab daaglag.

²⁵ Am Yawe Nug atte. “Tap-lokus huanaknab ag ameg naɗinab daan uɗippig, tap-lokus okkai okkai, tap-lokus makkulak bau, am tap-lokus diig laala ele, tap-lokus oh amu da hei uɗippig, ag huanak uɗin, keeke lappig amu, da heppi, Israel danab ah, ag ee tap-lokus lappig amu, ee amubia ag ee elele eɗun aoglag.

²⁶ Ag ee amu aon, ag elele labeppeg, oolag didikku. Oolag dittieb, ag da, Yawe, ahilag Kayak, da ag ehanadkkulnu uɗat ɠagattagnab ele hemi amu, ag uɗat amunu da onil humaglag. Ag am dahilad danab ah. Ag baula uɗa nak ii doomna; iitta.

²⁷ Amu beeb, ag Israel, ag da ag oolagppa daattem doon, da am Yawe, da ahilag Kayak daattem doon, amu kayak laa ii daatte, ag amu dooglag. Amu danab ah dahilad ag, ag baula uɗa nak ii doomna.” Yawe Nug anam atte.

Yawenu deɗ naɗi

²⁸ Yawe Nug atte. “Amu dimppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

²⁹ Da anam hekkul, amge amuib iitta. Haen amuppa amu, da dahil Ouɗi Nug dahilad maɗi nid, dahilad maɗi ah ele madakkul.

³⁰ Am da heppi, habppa, am wanppa ele dahil uɗat ɠagattagnab bekkulag. Kobol amuam inam; tiig, aab ewak, amu aab kah huanaknab tak ele daaglag.

³¹ Aam nug gatatu maneb, kalam nug kokoɗnab tiig bia daakku. Keeke amu oh bekkulag, amge da Yawe, dahilnu deɗ naɗi, danab deɗ okkai amu antta nug ebehi oh bodoetta le mekku amu, haen deɗ amu ii nak, nekkunu daakku, haen amuppa keeke amu oh bekkulag,” awa atte.

³² Anam amge aun laa nug Yawe onigppa eeb amu, Yawe Nug ehanitteb, nug padal ii mema. Am aɗinu anam bekku? Yawe aumbia, qauko Sion, am Jerusalem appa ele, oɗo yaak danab daaglag. Ao, oɗo yaak danab oolagppa laa, Yawe onilagppa eum ele, ag daaglag.