Joel 1 - Nobonob Baibel

Tap-Lokus digdig ag Israel wan oh tonappig

¹ Nai imuam Yawe Nug Petuel bekka Joel, nug Israel danab ah amelagppa ab dooglagnu ippunittom.

² Ag ikki danab, ag nai imu doyeg! Yo, ag danab ah Juda wanppa daatteb, ag daulag human doyeg! Ag gemu daatteb ele amu, ahilag haenppa uug imu bia laa beumte? Ao, ag mamelkad aɗi daappig haenppa ele keeke imubia laa beumte? Iitta.

³ Ag uug imunu ag bekkalkad, aɗelkad ele amelagppa appeg doon, ag ele, ag dimulagppa bekkulag amelagppa appeg doon, ag ele anamib appeg, ag dimulagppa bekkulag amu, ag ele doyeg!

⁴ Am inam. Tap-lokus huanaknab ag ameg naɗinab daan uɗin, keeke laeg ukke, keeke laa uun ii lappig amu, tap-lokus okkai okkai, ag lappig. Tap-lokus okkai okkai ag keeke lanan uun, ii lappig amu, tap-lokus bau makkulak, ag lappig. Am tap-lokus bau makkulak ag keeke lanan uun, ii lappig amu, tap-lokus diig laala ag lappig.

⁵ ⌊Uug naunab amunu amu,⌋ ag danab, ag wain lanan, kaaka aqatte ele, ag gayeg! Ao, ag wain lanak danab, ag mahieg! Aɗinu? Tap-lokus ag uɗin, ag oɗelagppanu wain bau aɗadppig amunu, ag wain laa ii lamana.

⁶ Amu bekkunu diig am tap-lokus huanaknab, ban danab huu ameg okkai okkai amubia, ag ihinig wanppa beppig. Ag am ɠagattag, ebqaknu elele iitta. Ag aelag am laion aeg bia. Ao, ag aelag am laion anig aeg aɗit elab, amubia.

⁷ Amu tap-lokus ag heeg, muɗi grep ihinig oh nauhakib daaeg, ad fig ele bunaɗppig. Tap-lokus ag amu gaɗa tolaeg, iitta me, ag eppelkad oh hakkab daatteb.

⁸ Ag Juda danab ah ag am danab nug ah awa, gamu daakkunu dayaya, danab ah ele amu aa ewau matulak ii aopiɗ haenppa danab nug mauhe, ah bau amu nug lamen heɗiag ele takka, huan gaatte, amubia ag gayeg!

⁹ Tap-lokus ag heeg, ee aegnu ofa laa ii daatte. Wain gokkaɗaknu ofa ele ii daatte. Anam daatte amunu, mana mettak danab ag uug doon mahitteb. Ao, danab ag Yawe noobppa nuhig ɗo maɗoɗnu uɗat hetteb ele amu, ag mahitteb.

¹⁰ Dad okkai oh am nauhppig, wan qaɗaiettom; danab daalo am mahilo. Aɗinu? Keeke ee aeg otteb am padal meeg, muɗi grep ele qaɗaiettom. Olip ad, nuhig goɗen iitta meum.

¹¹ Amu ag ee eppak danab, ag dabmak kuɗum aon, ag, “Ig eɗut ena daagnig,” aib dabmeppig! Ao, muɗi grep gumak danab, ag gayeg! Dad okkainu ee oh nauhppig amunu, ag wit, bali ele nauhpiɗnu gayeg!

¹² Muɗi grep bunaɗppig. Ao, ad fig am mauɗna malappig. Ad pomigranet, ad pam, ad apel ele oh bunaɗppig. Ao, ad oh meu lanaknu daatteb amu, ag oh bunaɗppig. Keeke amu oh nauhna malappig amunu, uug amuppa danab dilag gamag ahak oh am iitta ma malom; ad digma bunaɗkkunu mauɗa malatte, amubia.

Israel danab ah ag oolag eɗukkunu ewak

¹³ Ag mana mettak danab, ag lamen heɗiag ele takkanna mahieg! Ao, ag danab Kayaknu qaɗabppa nuhig ɗo maɗoɗnu uɗat hetteb ele, ag qaneg! ⌊Wit, bali, muɗi grep ele oh bunaɗna, iitta meppig amunu, danab ag ee aegnu ofa, wain gokkaɗaknu ofa ele aon gona, Kayak, ahilag Kayak, Nug laugppa mekkulagnu laa iitta.⌋ Ee amu iitta, mana mettak laa ii daatte amunu, ag danab, ag dahil Kayak noobppa nuhig ɗo maɗoɗnu uɗat henan daatteb ele, ag lamen heɗiag ele takkan, Kayak laug ooppa nona, tuqan appa daan, ⌊oolag eɗueg⌋!

¹⁴ Ag danab ah oh ag Yawe noobppa ee ohnu kud mena daaglagnu appeg doyeg! Ao, ag oh Yawe noobppa qagmena dup nona Nug binag mekkulagnu deɗ metteg! Ag ikki danab uɗiglagnu eig! Ao, ag wan imuppan danab ah laa oh ele onilagppa eig! Ag Yawe, ahilag Kayak, ag Nug laugppa uɗippeg, ag oh Nug unuqitteg!

¹⁵ Yawenu deɗ naɗinu am gadonnab gadon. Aɗinu? Deɗ am miag uɗiom daatte. Deɗ amuam Laa Nukka Ɠagattag Oh Ele Nug he, nauhak okkai naunab daatte, am deɗ amubia.

¹⁶ Ig anittutut, amenigppa ee ihinig nauhom. Ig Kayaknu mettid lag, amuppa gota, oo gamag ahak doognignu ib iitta meum.

¹⁷ Wan leppu iitta amunu, ee eppaknu haɗag am wan ooppa nauhna, ii betteb. Keeke oh awa lanaknu am bunaɗna malappig. Anam amunu, ee iittanu ee maknu lag mamelag lag amu ii bappalatteg, nauhak daatteb. Ao, ee maknu lag oh am, diig amunu loppaɗak daatteb.

¹⁸ ⌊Gadon,⌋ makau ag gaanna daatteb. Ag ee iitta amunu, ag aben laippu ii daatteb; qinonob oiyakib oitteb. ⌊Gadonnab,⌋ sipsip ag ⌊gikkiɗah tutunab lanaknu elele, amge gikkiɗah anam ele ii daatte amunu,⌋ ag ele eenu guittak dootteb.

¹⁹ O Yawe, aab naɗi gikkiɗah ewe nauhtte, amubia aam nug ihinig gikkiɗahnu dad okkai he nauhom. Ao, aab ewak okkai atu eotte, amubia aam ɠagattag ha, atuppan ad oh aqe bunaɗppig, amunu da na unuqidttem.

²⁰ Doɗ manan agib uug ii dootteb. Iitta. Doɗ dakkuɗ ele ag uug doon, nahip ehanittaknu gaatteb. Aɗinu? Le oh qaɗaiettom, gikkiɗahnu dad okkai ooppa, gikkiɗah amu ele aam he bunaɗom.