Job 9 - Nobonob Baibel

Job nug Bildad oɗeppa awa, nai nuhig nob ma aum

¹ Bildad nug anam mattia male, Job nug oɗeppa awa aum.

² “Kayak Nug genab tutukku hak danab daatte ehanidtte amu, da doottem, amge danab ah oh, ag oolagppanu laa nug attemun genab tutukku hak danab Kayak noobppa daakku?

³ Danab laa nug Kayak ele hettoɗiak abenppa daaglahnu hekku dayeb, danab amu nug nuhig naippa Kayak nainu nob mekkunu hekku dayeb amu, danab amu nug nuhig naippa haen laippu Kayak nakok laa eɗidkkute? Iittanab!

⁴ Kayak Nug keeke oh dootte, doyak dabmak ena nuhig am bodok iitta. Nuhig ɠagattag ele okkai, naɗi ele. Laa nug wagai ma, Kayak eɗidkkunu haaha eɗidkkute? Iittanab iitta!

⁵ Kayak Nug he, qauko ag pahanab ahan, laih gotteb; Nug oo nauhe he, qauko ag nena qena ikkilag wan yaatte.

⁶ Kayak Nug he, wan imu uɗalala, abenppa ii daatte. Ao, Nug he, wan mawaknu keeke okkai okkai am uɗaltte.

⁷ Kayak Nug aamnu a, ii amahaltte; Nug he, hoɗoppai ag wan amahlak nakok laa ii medatteb.

⁸ Kayak, laa iitta, Kayak Nug nukka hab babaittom; Nug nukka yu duban qaɗeppa oitte.

⁹ Nug hoɗoppai oh hattowa, hoɗoppai huu mak anen anenppa meum. Hoɗoppai huu mak laa am ag Bea atteb, laanu ag Orion atteb. Ao, huu mak laa ag Pledes atteb, am Nug hoɗoppai huu mak laala ele hatta, habppa, yau uɗitteppanu, appa meum daatteb.

¹⁰ Nug uɗat ɠagattagnab, danab laa nug uɗat amu diig dookkunu elele iitta aakku hette. Ao, Nug kobol danab hekkunu elele iitta kuɗumnab, danab ebaqadkkunu elele iitta hette.

¹¹ Kayak Nug da qe-eɗila ugekke, da nug ii anidttem. Ao, Nug da qe-eɗila ugekke, da Nug amu heum dookkulnu elele iitta.

¹² Nug keeke laa danab eppegppanu aɗitta aokkunu heebeb amu, laa nug ii aomanu akkunu elelete? Iitta! Ao, laa nug Nug amegppa, ‘Na attem hena aottem,’ akkunu elelete? Iitta!

¹³ Kayak Nug he, nuhig oo nauhak bodo-ii-ettom daatte. Ao, yuppan doɗ nau onig Rahap, nuhikkud ehanittak, ag Kayak baeg waappa hahaɗnan daappig.

¹⁴ Kayak Nug anam daatte amunu, da attem heppi, Nug da ele naippa nug mehqak hekkunih? Ao, da, da attem heppi, i nai a ona a doak heɗaɗa, da nai elele madikkul?

¹⁵ Da beɗulppa aab iitta, amge da Kayak, nuhig nainu nob laa mekkulnu ib laa iitta; da laa da epeɗiltte amu, da nug dahilnu oo gai-iitta doya oo meɗa ehaniɗeb ena daakkulnu aakkuib oo doyakppa oɗ medakkulnu elele.

¹⁶ Da hettoɗiak abenppa ukken dayeye, da laa nug da epeɗiltte ele onigppa eppi, nug uɗikku dayeb amu, Nug nai doya mala hettoɗia epeɗia elele mettak kobol dim lamitta, nai dahil babaittak hekkunu amu, da Nug dahil nai ii bappaidma oolppa genab doottem.

¹⁷ Nug dahil nai ii dooma. Iitta! Da anam helom, Nug heeb, ulah naunab nau uɗia, heiɗeb nauhlom; Nug heeb, diig iittappa guittak mettaknu ihilad kuɗumnab da beɗulppa daalob.

¹⁸ Da hik niɗeb, ulah aokkulnu hebippi, Nug heeb, da eɗuen, hik elele awen, ena ii daalom; iitta, Nug heeb, da guittak, uug nau ele doolom.

¹⁹ Laa nug nuhig ɠagattagppa Kayak eɗidkkunu elelete? Iittanab! Kayak Nug am ɠagattag oh ele. Ge, laa nug Kayak awa, hettoɗiak abenppa ukka, appa naippa yaakkunu elelete? Iittanab! Kayak Nug am nai doya mala hettoɗia epeɗia elele mettak kobolnu diig amunu, auntai laa nug naippa yaakkunu elele iitta.

²⁰ Da beɗulppa aab iitta, amge hettoɗiak abenppa da Kayak noobppa daye nai madippi amu, da oɗel am da eheɗ hemi alo. Ge, da am danab ooppa kaliak laa iitta ele daattem, amge da Kayak noobppa daye nai madippi, da oɗelnab da beɗulppa aab ele daatte alo.

²¹ Da danab ooppa kaliak laa iitta ele daattem, amge da gemu dahilnu dabmak okkai ii aottem; da bau dayaknu ena iinab doottem.

²² Danab nug beɗuppa aab ele, o danab nug beɗuppa aab iitta ele am keeke hamu; diig amunu da attem, ‘Kayak Nug nuhig neekkakppa danab laanu, nug danab ooppa kaliak laa iitta anitta, Nug danab amu, nau hak danab ele oh he nauhtteb.’

²³ Amu haen uug danab aqe mauhtteb laa ba, danab aqe mauhegeg, laa ag beɗulagppa aab iitta, ag aɗi bette anidna, ag ele mauhkkulagnunab doon, tuɗidna elele daaglagnu iinab doyegeg amu, Kayak Nug amu dab-ii-mette.

²⁴ Ao, nau hak danab ag wan laa aon gumaegeg, Kayak Nug wan amuppan epeɗiak danab paɗatte, ag nai doya mala hettoɗia epeɗia elele mettak kobol ii dim lamidtteb. Kayak Nug amu ii hette dayeb amu, auntai laa nug aakku he bette?

²⁵ Dahil bau dayaknu haen am paha iitta mette; da gamag ahak nakok laa ii dooiyi, dahil bau dayaknu haen paha gogppa tekkunu tette.

²⁶ Dahil bau dayak haen am uub papairusppa hak, paha paha uug iitta doa gotte, amubia hette; am ai igel nug doɗ aokkunu haug aɗe te, kekaɗa wanppa nette, amubia dahil bau dayak haen am paha iitta mette.

²⁷ Amu deɗ laala da dakka, da dahilnu inam attem. ‘Uuppe, da dahil uugnu dab-ii-mepa! Ao, da iɗul tigugɗak daatte amu, da heppi, imak am da iɗulppa daakku,’ attem.

²⁸ Da anam attem, amge dabmak amuam hamu. Aɗinu? Da doottem, da beɗulppa aab laa ii daatte, amge na da beɗulppa aab daatte akkut amunu, da amu doyen, da guittak amu dookkulnu baɗak okkai doyeye oittem.

²⁹ Na dahilnu, ‘Na beɗunppa aab ele,’ akkut. Anam amunu, aɗinu da hik iweb, ‘Da beɗulppa aab iitta,’ ii daye daye akkul?

³⁰ Anam amunu, da sop awen, beɗul amuppa ihakkul dayeb, ge, da sop ɠagattag ele awen, eppel ihakkul dayeb amu,

³¹ na le moɗ laa muag naunab eleppa buɗilppe nokkulnu doottem. Ao, na amu heppe, dahil lamen da beɗulppa daakkunu uua autanab aokku.

³² Anam, amge Kayak Nug danab iitta. Nug danabib da bia daalo, da Nug noobppa dayeye, Nug dahilnu atte amu, da nob mettalom; o iitta, Nug danabib da bia daalo amu, i oh hettoɗiak abenppa goɗa daaɗa, appa nai imu bappaidlop.

³³ O gadon, ig danab amu, ig danab daattem, Kayak Nug danab ii daatte, Nug Kayak amunu, gamag danab laa ihinih gamagppa daalo, amuam enanag; danab laa anam daalo, nug dahil nai doya, Kayaknu ele doolo.

³⁴ Laa nug gamag danab dayaya, da Kayak eppegppa guittak baula ii awen, baɗak eheɗ nau ii doopanu, nug heeb, Kayaknu bu mettak dahilppa ii daalo am enanag.

³⁵ Laa anam daya, anam helolob amu, da Kayak amegppa nai madikkulnu ii baɗalom; amge laa anam hekkunu ii daatte amunu, da amu hekkulnu elele iitta.