Job 8 - Nobonob Baibel

Bildadnu nai tatamnu

¹ Job nug anam mattia male, Suha ted Bildad nug oɗeppa awa aum.

² “Na nai kaliak madittem; amu haen gane laa ele ukkeb, na mattiak amu uukkut? Nahip nai am ulah ɠagattag bia.

³ Kayak Nug nai doya mala hettoɗia epeɗia elele mettak kobol awa he, kaliak daattete? Ge, Laa Nukka Ɠagattag Oh Ele Nug kobol ena awa he, kaliak daattete?

⁴ Nahipad nid ag Kayak, nuhigppa hipunin heppig. Ag anam heeg, Nug ag hipunin amunu bu aoglagnu daaegeg, uuatte aoppig.

⁵ Nug ahilagppa anam heum, amge na Kayaknu ehanittak aokkutnu Nug dabmekkut dayeb, ao, na Laa Nukka Ɠagattag Oh Ele oo doyakppa Nug unuqppeppe,

⁶ na ootppa oppiak ele daan, genab tutukku hak kobol dim lamidna oikkut dayeb amu, diig amunu Kayak Nug ehanidkkunu ahakku. Ao, Nug heeb, na daalom bia eɗun daakkut.

⁷ Na anam daakkut amunu, tatam na keeke ele daame amu, dimppa Kayak ehanitteb, na keekenu elelenab daakkut; tatam aɗan daame eɗittak.

⁸ Na anukkan danab, ig memetankad anukkanu, ag anukka aɗi nai mattiegeg uɗie, gemu ele laa nai amu dootteb ele mattieg doottem amu, na nai amu dabmenana, aɗi ippunigtte doye!

⁹ Aɗinu? Ig memetankad anukkanu nai tuɗitta uɗiak ele amu, nai amunu diig am okkai. Ig gemu wanppa daattem, ig tumaiib domut; wanppa ele haen elab ii daamut amunu, ihinig dabmak am tutunab. Ge, ig am danab aamppa dayeye, itotog daya paha iitta mette, amubia ig haen tutuib daattem ⌊amunu, ihinig dabmak am tutuib⌋.

¹⁰ Na ig memetankad dilag nai dabmekkut dayeb amu, na appanu ippunittak iite aomna? Ge, na ig memetankad dilag doyak okkai dabmekkut dayeb amu, na nai amuppanu diignu doyak tutukku iite aomna?

¹¹ Papairus ɗuppa ii daakku dayeb amu, nug ena bekkute? Ge, qao nug le ii daatteppa ena bekkute?

¹² Le daugppan keeke amubia amu, le iitta me, ag paha nauhtteb. Ge, gikkiɗah am nakok haen elab wan qaɗaiettakppa daakku, amge ɗuppan keeke, o le daugppan keeke am anam iitta.

¹³ Amubia amu, danab ag Kayaknu daulag atitte, ag ele paha iitta metteb. Ao, danab ag Kayaknu, nuhig haknu ele uuak kobol dim lamidtteb amu, ag ena bena daaglagnu dabmak aɗan oiglagnu elele iitta.

¹⁴ Danab amu ag keeke gai-iittanu oolagppa genab dootteb. Ge, ag danab nug goɗimnu amapip nug ehanidkkunu dabmette, ag amubia hetteb.

¹⁵ Danab Kayaknu, nuhig haknu ele uuak kobol dim lamidtteb amu, ag laa nug hibaitta dayaya, na qemanu goɗimnu amapip ehanidkkunu eppegppa aɗatte, amge pakkue, na qette, ag amubia hetteb. Ge ag laa nug goɗimnu amapip ehanidkkunu eppegppa ɠagattag aɗa daatte, amge goɗimnu amapip ɠagattag ii daya pagutte, ag amubia hetteb.

¹⁶ Danab ag Kayaknu, nuhig haknu ele uuak kobol dim lamidtteb amu, ag uud laa bia daatteb. Uud amuam ⌊haen tutu⌋ aben le eleleppa, aam ele elele netteppa dayaya, ebekkud, uɗug ele dad tonatte.

¹⁷ Uud amu diɗiud am umanab nona, men wan ooppa daatteb taliliadtteb. Ao, uud amu ɠagattag daakkunu nug diɗiud umanab nona, men naunau daattebppa daatteb.

¹⁸ Anam, amge danab o aɗi keeke laa uɗia hiɗe nauhtte, amubia danab ag Kayaknu, nuhig haknu ele uuak kobol dim lamidtteb amu, ag nauhtteb. Ge, ag daappig bia baula iinab daatteb.

¹⁹ Uud abenabppan hiɗak, appa ii daatte, bunaɗtte amu, danab ag Kayaknu, nuhig haknu ele uuak kobol dim lamidtteb, ag amubia daatteb. Ao, uud dayom abenppa amu, uud amu hiɗak dimppa bala laala ag bena daatteb, amu danab ag Kayaknu, nuhig haknu ele uuak kobol dim lamidtteb, ahilagppa anam bette.

²⁰ Ig doottem, Kayak Nug danab nug nuhig neekkakppa danab ooppa kaliak laa iitta ele ii geɗidtte; Nug danab eheɗ hette ele ii ehanidtte.

²¹ Kayak Nug anam hette amunu, ⌊na oot eɗueb,⌋ Nug heeb, na gamag ahak naɗinab doon imakkut. Ao, Nug heeb, na baat okkaippa gamag ahak ele ekkut.

²² Nug heeb, nahip kekeɗ ag uɗa nak naunab dooglag. Ao, Nug heeb, eheɗ hak danab ag baula ii daamna.” Bildad nug Job amegppa anam mattia aum.