Job 7 - Nobonob Baibel

¹ Ig danab ig wanppa daat oittem amu, ig heɗiag hetata ele iite daattem? Ge, ig danab wanppa daattem, ig uɗat ɠagattag, danabnu uɗat nid nuhig uɗat hette, ig amubia wanppa daatta, iite hettem?

² Ig begbeg maɗi nid laa, nug laanu uɗat huana haaha, tueb meeb, hik awa daakkunu oo huana hette bia daattem. Ao, ig laa nug laanu uɗat nid, nug uɗat haaha, nuhig daden aokkunu oo huana hette bia daattem.

³ Anam, amge ⌊Kayak he,⌋ da kalam kuɗum iikku keeke ena laa hekkulnu elele iitta daattem. Ao, ⌊Nug he,⌋ da tuqan kuɗum beɗulppa, dabmakppa ele guittak okkai doyeye daattem.

⁴ Da tuqan niiak abenppa ukke qein niikkulnu heinne, da, ‘Wagɗak buttua paha uɗieb anidlom,’ doottem; da bet attan ukke qein niieye, da beɗul itoɗieye, ii niiiyi, haen elab ukke, wagkkaɗtte.

⁵ Da beɗulad oh nauhom. Ihilad huana daye, gawat ihiladppa daaeg, ihil gon tonatteb. Ge, da gaɗalppa am ihilad huanak daye, yu ele nette.

⁶ Da aakku mauhkkulnu hei, dahil haen miagnab doum daatte. Da haen elab ii daapa, da paha mauhkkul; da mauhkkulnu hein dayeye, da eɗuen, ena bekkulnu dabmak aɗe iinab oittem.

⁷ O Kayak, na imu dabmenan daakkutnu oɗ medattem. Wanppa dayaya oiyak dahil am tutu, danab hik laippu aotte, amubia; da wanppa bau dayeye, baula gamag ahak dookkulnu, da nakok laa ii doottem. Da eheɗib doyeye, daappi ukkeb, da mauhkkul doottem.

⁸ Laa gemu nug amegppa da aniɗtte amu, haen elab iitta nug baula ii aniɗma; na da aniɗkkutnu neegkkut, amge da ii daapa.

⁹ Lombig dayaya, iitta mette; amubia laa nug mauha, moɗppa notte ele, nug eɗua aha, bau ii daatte.

¹⁰ Nug baula nug laugppa ii tette. Ge, nug daatteppa amu, nug appa baula ii daama.

¹¹ Ag da oɗel qamutkkulnu atteb, amge iitta! Da oɗel ii qamutpa. Ge, da oolppa guittak naɗinab doottem amunu, da diig dookkulnu madikkul. Genab, da oolppa ninig doottem amunu, da amunu naittuɗ mekkul.

¹² Da keeke eheɗ laa, o da yuppan doɗ okkai nau ele laatai, amu diig amunu na maniguiɗttem?

¹³ Deɗ laala da niiak aben dahilppa ukke qein niieye, oo mak aokkulnu dabmettem. Ao, da heɗig dahilppa niieye, nakok ena dookkulnu dabmettem.

¹⁴ Da anam dabmettem amge iitta. Da anam niiiyi, na he, da tul nau, baɗak ele niittem. Ge, da anam niiiyi, na he, tuleglegppa da keeke nau antten, eheɗ nau baɗattem.

¹⁵ Anam amunu, laa nug da baal ɠagattag aɗeb, ulah ii awen mauhkkulnu am da ena doottem. Ge, da tuɗitten, beɗul nau imuppa daakkulnu amu, da ool ii daatte.

¹⁶ Da bau dayak dahilnu ena iinab doottem. Da hanhan daakkulnu ool ii daatte. O Kayak, dahil bau dayak am tutunab, omuh ta, paha iitta mette amubia amunu, na da uuiɗppe ⌊mauhkkul⌋ am ena.

¹⁷ Ig danab amu, ig am keeke okkainab iitta. Ig anam daattem amunu, da na ihinignu dabmak okkai aona, ⌊eheɗ heut bu megattem⌋ amu, da amunu diig ii doottem; na ihinignu dabmak okkai aottemnu diig amu, da ii doottem.

¹⁸ Diig aɗinu na buttua ohppa ahan neekkigttem amu, da ool ii maidtte. Ge, diig aɗinu na hanhan ma anttak megattem amu, da ootot iutte.

¹⁹ Na ma anttak meɗakkutnu ii neekkiɗkkutnu ool daatte, amge na amu ii hekkut bia doottem. O na haen tutunab, ameg amuhak laippu bia, na haen tutunab amuppa da eheɗ hettemtai, o iittatai anidkkutnu ii neekkiɗkkutnu ool daatte, amge na amu ii hekkut bia doottem.

²⁰ O na ig danab, na ig neekkigna daattem amu, da hipunin hemi dayeb, da na, da nahip-ppa aɗi hemi? Da na da iuttemnu diig amu, da ii doottem. Da na uug kuɗum medattemte?

²¹ O Kayak, dahil hipunin uhuqna ii meɗattemnu diig amu, da ool ii maidtte. Ao, na eheɗ hak dahil uhuqna ii meɗattemnu diig am, da ii doottem. Aɗinu? Haen elab iitta da mauhen, wanppa niikkul. Ge, da anam heppi, na aniɗkkutnu mattiɗkkut, amge na ii aniɗmana.” Job nug anam aum.