Job 6 - Nobonob Baibel

Job nug Elipasnu nai nob meum

¹ Elipas nug anam mattia male, Job nug oɗeppa awa aum.

² “Laa nug dahil guittaknu uug dookkunu skelppa mekkunu elele daya melo am ena. Ao, laa nug da oolppa uug doottem, nug uug amu awa, skelppa ma, nuhig uug anidkkunu elele daya helo am ena.

³ Laa nug anam hekkunu elele daya helo amu, ig dahil guittak, da oolppa uug nau doottem ele amu, keeke amunu uug am yu ihippa ihinu uug eɗidkku anidlom; amu diig amunu da dabmak awen, nai ii mattimi. Iitta. Da mattiakib mattimi.

⁴ Laa Nukka Ɠagattag Oh Ele amu, nuhig lat doɗo da iwom. Amu lat doɗo aegppan leppu nau da ouɗilppa ukkom daatte. Ge, Kayak he, da baɗak eheɗ nau doottem.

⁵ Donki dakkuɗ nug gikkiɗah lanan dayaya, nug eenu gaattete? O iitta, makau okkai ebehi ele ee nuhig lanana, nug eenu gaattete?

⁶ Danab laa nug ee laa miti iitta ele hamu yu iitta lanana, ena doottete? O iitta, danab nug matuk oppa laih hakkabib daatte lanana, miti laa doya, ena doottete?

⁷ Da ee amubia nakok laa ii lattem; ee amubia he, da ool kabolitte.

⁸ O gadon, da Kayak keeke laanu Nug oɗ medakkulnu hettem ele amu, Nug amu da meɗalonu ool okkai daatte. Ao, Kayak Nug heeb, aɗi keeke dahilppa bekkunu ool hette, keeke amu bekkunu dabmak aɗen oippi bekkunu ool daatte.

⁹ Keeke da ool hette ele am, Kayak Nug elele doya heeb, da mauhkkul; Nug eppeg bahia heeb, da iitta mekkul.

¹⁰ Da guittak okkai ii daye daye doottem, amge Kayak, Nug oppiaawak ele, Nug anam heeb mauhkkul dayeb, da Nug oɗe nakok laa tappai ii neum doyen, oolppa gamag ahak doyen mauhkkul. Ge, da anam doyeye mauhkkul dayeb amu, da amuppa oo mak aokkul.

¹¹ Dahilppa keeke ena laa bekkunu dabmak aɗe oikkulnu ɠagattag laa dahilppa ii daatte. Ao, da keeke ena laa dahilppa bekkunu oolppa maɗoɗ ele dayeye, ameg mekkulnu amu, da amunu nakok laa dabmekkulnu ii doottem.

¹² Dahil ɠagattag am mennu ɠagattag biate? Ge, da teppul am bras biate?

¹³ Dahil keeke oh iitta meum. Anam amunu, da dakka, da ib laappa da ehaniɗkkulnu ɠagattag laa dahilppa daattete? Iitta.

¹⁴ Danab nug eɗua ena daakkunu ib laa iinab anidtte ele amu, danab amu nug Laa Nukka Ɠagattag Oh Elenu ebehi oh bodoetta le mekkunu ib apiɗidmanu, nug laikkud ag ehanidkkulag am ena.

¹⁵ Da lailad ag da ehaniɗlob, amge iitta. Ag am le nag laa, deɗ laala le amuppa dayaya, danab ah ehanadtte, deɗ laala le appa ii daya, danab ah ii ehanadtte, ag amubia daan hetteb. Ag am le laa, deɗ laala ui otte, deɗ laa ui ii otte, amubia ag pehettak hanhan ii ehaniɗtteb.

^16-17 Ge, ag am le laa, gogppa ais o sno naɗi okkai daye, aam qe, le ma, le huana na gotte, amge haen nakok ukke, aam huana ne, ais o sno iitta me, aam haen daye, le amu qaɗaiette, appa le ii daatte, ⌊amubia da lailad ag anambia henana ehaniɗtteb⌋.

¹⁸ Le nag amu, ahilag le ippu laih wana, laih dotteb; ag wan meu waknu nakokib eleleppa qaɗaiedatteb.

¹⁹ Danab ag en kamel qaɗelkadppa mena, aon gona laih meppeg, laa daden mekkulagnu atu taɗakppa, le iittappa oitteb amu, amunu laa ag Tema danab. Ag oinna, le anidkkulagnu hena oitteb. Ao, keeke laihnu awa dadennu mak danab Sebanu, ag atu taɗak le iittappa oinna, ag le anidkkulagnu dabmak aɗan oitteb.

²⁰ Ag, ‘Ig genab aben amuppa le anidkkunig,’ oolagppa genab doon gotteb, amge ag appa tena, le ii anidtteb amunu, ag oolagppa uug nau dootteb. Ao, ag appa tetteb, amge ag le iitta anidna, ag oolag uug ele daatteb.

²¹ Le daalo amge ii daye, danab amu ehanittak ii aotteb amunu, amubia da ahilagppanu ehanittak laa ii aottem; ag dahilppa uug naunab nau beum anidna, ag eheɗ baɗan, ii ehaniɗna hetteb.

²² Ag en keeke, da ehaniɗna meɗaglagnu deɗ laa oɗ mattamite? Ge, da eɗuen ena daakkulnu deɗ laa ag en ahilag laa aon, da ehaniɗkkulagnu Kayak, o laa mettaglagnu amelagppa amite?

²³ Ag da kekeɗ eppelagppanu awiɗkkulagnu deɗ laa ag oɗ mattamite? O iitta, da ag danab oo doyak ii doonna nau hetteb ele, da amu eppelagppanu awiɗkkulagnu ag en ahilag aon, danab amu mattaglagnu ag amelagppa amite?

²⁴ Da eheɗ hemi dayeb amu, ag ippuniɗppeg dookkul. Ao, ag ippuniɗppeg, da oɗel qamuten, nai ii madipa.

²⁵ Nai genab am danab ooppanab notte. Amge ahilag nai am hamu, keeke laa pehettak ii ippunigtte.

²⁶ Ag dahil nainu, ‘Nug aum am nau, nug inam alo,’ dabmenan attebte? Ag dootteb, da oolppa da eɗuen, ena daakkulnu nakok laa ii doottem amunu, aɗinu ag dahil nainu, ‘Am nai hamunab,’ dabmetteb?

²⁷ ⌊Ag am danab oo doyak nakok laa iitta!⌋ Ib laa bekku dayeb amu, ag nid laa, mameg mauhom ele, ag nug laa dilag maɗi nid daakkunu om yaakppa ag eppelagppa mekkulag. Ge, ib laa bekku dayeb amu, ag, ag lailag aon meppeg, laa uɗia, nuhig maɗi nid daakkunu daden ma, awa gokku.

²⁸ Amge gemu amu, ag da neekkiɗna, dabmak tutukku aoglagnu oɗ madattem. Da ag noolagppanab dayeye, hambuppualadkkulnu hekkul bia doottemte? Am iitta! Da anam ii hepa!

²⁹ Ag ahilag dabmak eɗueg! Ag nai doya mala hettoɗia epeɗia elele mettak kobol dim lamitteg! Ao, ag ahilag dabmak eɗueg! Da genab tutukku hak kobol dim lamidttem.

³⁰ Da hambuppuak nai laa madittemte? Ao, da keeke laa anttena, da keeke amunu kobol nau, o kobol ena anidkkulnu, da oo maittak awaknu ehah iittate?