Job 5 - Nobonob Baibel

¹ Amu Job, na oot heeb, na huana ekkut, amge laa nug eɗua nob medakkute? Na auntai laa nug Kayaknu tituanak daatte, na ehanidkkunu oɗ medakkuttai, amge laa ii ehanidma.

² Danab nug Kayak dab-ii-maama ii dim lamidtte ele, nug laanu oo elele ii doyak ge iitta doyeye, kobol amu nug he nauhtte. Ao, danab nug doyak ii awak ele nug laan keekenu ameg qe, oo elele ii daatte, kobol amu he, nug mauhtte.

³ Da dakka, da deɗ laala anidmi. Danab nug Kayak dab-ii-maama ii dim lamidtte ele nug ɠagattag, ena ele daakkunu bette; amge laippun nug baegppan ele ag eheɗ laa awaknu anak waappa daan nauheg anidmi.

⁴ Danab amunu nid ag enaib daaglagnu ib laa iitta; hettoɗiak abenppa amu, nid amu ag laa ehanadkkulagnu laal iitta.

⁵ Danab amunu amu, laa ag enug aqatte, ag ahan, nuhig ee dattanu, nuhig ee nukka hamu beum ele aon latteb. Ao, laa le baalag diitte, ag nuhig en aoglagnu hik aqatte.

⁶ Keeke uug megatteb am wanppanu hamu ii betteb. Ge, uug digdig iqatte ele, uug amu qaɗu wanppanu bette bia hamu ii betteb.

⁷ Am genab, uug digdig ig danab, ihinigppa betteb am hamu ii betteb; ig heut betteb. Ao, aab ewewe, aeg genabnab pitigna tetteb, nak o laih laih ukkak iitta, genab amubia ig heut, uug ig iqatte.

⁸ Anam, amge Job, da nahip abenppa daalom, da inam helom. Da Kayak dahil nai dookkunu oo doyak ele oɗ mettalom. Ao, da keeke oh dahilppa beum miagib Nug amegppa appi doolo.

⁹ Nug kobol danab hekkunu elele iitta, ig danab ig amunu diig tutukku doognignu elele iittanab daattem amu, Nug kobol amu Nug hette. Ge, Nug kobol danab hekkunu elele iitta kuɗumnab, ebaqaknu elele iitta hette.

¹⁰ Kayak Nug he, gu wan ehanidkkunu nette. Ao, Nug he, wan le elele daatte.

¹¹ Danab ag onilag iitta amu, Nug he, ag danab okkai daatteb. Ao, laa ag uugppa daatteb amu, Nug ehanatte, ag laa eppelagppa ii daatteb.

¹² Kayak Nug laa ag lokkumakppa kobol kobol hekkulagnu doon autna aotteb ele, Nug ahilag maittak he nauhtte. Amu diig amunu ahilag hakppa meu laa ii bette.

¹³ Danab ⌊wan imuppan⌋ dabmak doyak ena ele laala ag doyak amuppa ag keeke laa hekkulagnu lokkumakppa dabmenana maittak eheɗ aotteb amu, Kayak Nug he, ag nuhig pelemppa tetteb. Ge, danab laa ag keeke laa hekkulagnu lokkumakppa dabmenana maittak eheɗ aotteb ele amu, Kayak Nug he, ahilag hak nau amu aakku padal mette.

¹⁴ Danab ag amu hetteb ele amu, amunppa Kayak he, gatatu ag tonatte daatteb. Ao, Kayak he, aam anignab ag danab tuqan, amahlak iitta ele laa ag akka ag eppelagppa ehanattette, ena iitta oitteb amu, ag anambia oitteb.

¹⁵ Kayak Nug daɗek ehanatte, laa naippa eheɗ hattaglagnu hetteb ele eppelagppa ii daatteb. Ge, Nug he, daɗek ag danab ɠagattag eppelagppa ii daatteb.

¹⁶ Kayak anam hette amunu, daɗek ag ena bekkulagnu dabmak aɗan oiglagnu elele. Kayak anam hette amunu, nai doya mala, hettoɗia, epeɗia, elele ii mettak kobol iitta mette.

¹⁷ Kayak Nug danab auntai laa tolitta bu medatte ele, danab amu nug itittak ena awom daatte. Anam amunu, na Laa Nukka Ɠagattag Oh Ele Nug na tolitta bu medatte, na amunu ena iinab doyak aib doome.

¹⁸ Aɗinu? Kayak Nug danab bu mette, ihiud medatte, amge dimppa Nug ihiud amu itatte. Ge, Kayak Nug danab bu mette, ihiud medatte, amge Nug he, ihiud qaɗaiedatteb.

¹⁹ Kayak Nug baubau ehanitteb, na qagaiettakppa ii daamna. Ge, haen kuɗum uug nahip-ppa bekkunu daakku, amge nahip-ppa ii bema.

²⁰ Enug haenppa Kayak Nug uug amunu qagaiettakppanu eɗua uhuqeb, na ii mauhmana. Ao, ban haenppa Nug heeb, laa qep elabppa ii duut oma.

²¹ Kayak Nug ehanitteb, laa nai mattiak ahilagppa guittak ii mettamna; Ao, na hak nau bak haenppa ele Nug na ehanittebeb, na baɗak ii doomnanu elele daakkut.

²² Enug haen, o he nauhak haen beebeb amu, na amunu keeke hamu bia dookkut; doɗ dakkuɗ nau dilagnu ele na baɗak ii doomnanu, elele daakkut.

²³ Na anam daakkutnu diig am, ⌊Kayak heeb,⌋ wan ee huana medakku. Ao, doɗ dakkuɗ ele ag nahipnu, ‘Ihinig kekeɗ,’ ii doomna.

²⁴ Nahip lagnu amu, na maɗoɗ appa daakku dookkut; na nahipad keeke ebaqadna, laa qettoɗom ii anidmana.

²⁵ Na nahipad nid ag kuɗumnab daaglag dookkut. Ge, na buɗunad ag gikkiɗah wan qaɗeppa daatte bia daaglag dookkut.

²⁶ ⌊Kayak Nug heeb,⌋ na kaino elelenab mena, mauhkkut; danab ee meu oɗue haenppa aotte, amubia.

²⁷ Ig keeke amu oh anidta malamut. Keeke amu oh am genabib. Anam amunu, na dahil nai doon, dabmenan dim lamidkkut aakkuib am ena.” Teman danab Elipas nug Job amegppa anam aum.