Job 42 - Nobonob Baibel

Job nug eɗua, nob ma, Yawe amegppa nai mattiom

¹ Amu Yawe Nug Job amegppa anam mattia male, Job nug oɗeppa awa aum.

² “Da doottem, na keeke oh hekkutnu elele. Na keeke laa hekkutnu maittak aome dayeb amu, laa nug heeb, na ii hemananu elele iitta.

³ Na oɗ meɗame. ‘Laa nug nai doyak iitta ele mattiaya ha, dahil ulum nai gatatuppa tonom daatte amu, laa amu nug am aun?’ Na anam oɗ meɗame, am gemu da doottem, genab da keeke laalanu, da keeke amunu diignu doyak tutukku iitta amu, da keeke amunu mattimi. Ge, keeke amuam keeke enanag, da keeke amunu diig dookkulnu elele iitta.

⁴ Na ame. ‘Na daut humappe, da nai madikkul. Da na keeke laalanu oɗ medappi, na oɗmak amunu nob da meɗakkut,’ ame.

⁵ Gemu da imu doottem. Tatam amu, laa ag nahipnu aegeg, da daulppaib doomi. Gemu amu, da amelppa na anidmi.

⁶ Anam amunu, da gemu da dakka, da dahilnu, da ena iinab doottem. Da anam doyeye, da wan gappudppa, uhuɗppa ele dayeye, da ool eɗue aute autenab aottem,” awa aum.

Yawe Nug Job laikkud ewam daulag batom

⁷ Yawe Nug Job amegppa nai amu oh mattia mala, dimppa Nug Teman ted Elipas amegppa aum. “Da nahipnu, na laipaɗ dilahnu ele ool nauhtte. Aɗinu? Ag dahil maɗi nid Job, nug dahilnu nai tutukku mattiom bia ii madippig. Ag eheɗ madippig.

⁸ Ag eheɗ anam madippig amunu, ag makau gaiɗ eblaih aɗit ele, sipsip dawai eblaih aɗit ele, ag amu ele aon, dahil maɗi nid Job gumidna gona, ag doɗ amu manaknu ofa daaglagnu manadna meɗeg! Ag amu heppeg, dahil maɗi nid Job nug ahilagnu da unuqilkku. Nug anam unuqilkku, da nuhig unuqittak doyen, diig amunu da ag dahilnu dab-ii-maama hak kobol dim lamidppig amu, da kobol amunu bu madappi aolob ii madapa. ⌊Da ii madapa, amge ag bu aoglagnu daappig.⌋ Aɗinu? Ag dahil maɗi nid Job, Nug dahilnu nai tutukku mattiom bia ii madippig. Ag eheɗ madippig,” awa aum.

⁹ Kayak Nug Teman ted Elipas amegppa anam a, nug, Suha ted Bildad, Nama danab Sopar ele ag oh Yawe aum bia heeg, Job ahilagnu Yawe unuqitte, Yawe Nug nuhig unuqittak doya, laikkud ewam ehanattom.

Jobnu wanppa dayak gog tak am ena

¹⁰ Amu Job nug laikkud ewam dilagnu unuqitta male, Yawe Nug Job ehanitte, nug eɗua, keekenu elelenab baula dayom. Yawe he, Job tatam doɗ keeke, gane dayom amu, gemu nug amu eɗittak, kuɗumnab ele dayom. Anukka aɗi doɗ keeke, laippu dayom amu, gemu aɗit daapiɗ.

¹¹ Yawe ehanitte, Job eɗua ena daya, keeke ele daye amu, nug awakkud, amakkud, appinkkud ele, amu laa oh ag nug tatam dooppig ele amu, ag oh uɗin, nug laugppa ee lappig. Ag uɗin, uug oh ⌊ahilag dabmakppa⌋ Kayak he, Job nuhigppa beumnu amu, ag oo mak nai nug mettan, ag anen anen oh silwa men doɗo laippu, eppeg doɗoppanu ring golppa hak laippu ele nug medappig.

¹² Amu Job nug tatam dayeye, Yawe Nug ititte, keeke ele dayom; uug awom dimppa Kayak nug ititte, keeke ele dayom amu, itittak ena dimnu am itittak ena tatamnu eɗittak. Dimnu itittak enanu amu Job nug sipsip 14,000, kamel 6,000, makau okkai ebehi ele 2,000, donki anig 1,000 ele.

¹³ Laa amu, Yawe Nug Job bekkod eblaih aɗit ele, aɗekkud ewam ele mettom.

¹⁴ Aɗeg tatamnu am Jemima. Jemima dimugppan am Kesaia. Kesaia dimugppan am Kerenhapuk.

¹⁵ Job aɗekkud amu oh ag ah iɗulag tuqaknab ele. Ahilag neekkak enanag, am wan amuppan ah laa oh eɗattak. Nug aɗekkud ag anam daaegeg, Job nug ag awalkad amalkad ele aulag mattatta, nug aɗekkud ele aulag amu laih ag mattom.

¹⁶ Aria, amu dimppa amu Job nug maɗ 140 baula wanppa dayom. Nug dayaya, nug bekkod anattatta, nug bekkod bekkalkad anattatta, nug alakkud amu bekkalkad anattatta, amu nug dokkiappud bekkalkad ele anattom

¹⁷ Job anam daya, memetappud amu anatta, nug kainonab ma dayaya, nug aakku mauhom.