Job 41 - Nobonob Baibel

¹ “Behimotnu am anam, amge leppan doɗ naɗi laa onig lewiatan dabmekkut. Na nug kakainu hukppa eeɗkkutnu elelete? O iitta, na nug lemaɗu muɗippa hippegppa qagakkutnu elelete?

² Na nug noob atulna, muɗi amuppa qakkan heppe, laih laih gokkute? O iitta, na huk naɗi aon, nug hippegppa yaan, amuppa ulum medakkute?

³ Lewiatan nug na nuhignu oot gai-iitta doon oot mettan ehanidkkutnu ii daye daye unuqidkkute? Ao, nug baag bodoettakppa na amenppa nai madikkute?

⁴ Nug hanhan nahip begbeg maɗi nid daakkunu, nug na ele nug tituana nai qakkak hekkulahte?

⁵ Na heppe, nug ai laa manan metteb bia nahip doɗ manannab daakkute? Ge, na muɗi baegppa qagappe, na aɗenad ag nug manannab dayebeb atognokkulagte?

⁶ Keeke laihnu awa dadennu mak danab ag lewiatan aoglagnu hekkulagte? Ge, laa ag nug aon, qeppeg mauheb, nug teppu oppatppeg, naunau neeb, keeke laihnu awa dadennu mak danab ag aoglagte?

⁷ Na ban gudkkud kuɗum ewadna, nug yaappe, gaɗappa daaglagte? O iitta, na dakkal kuɗum ewadppe, ikki qena daaglagte?

⁸ Na nakok laa aɗakkut dayeb amu, na nug ele ban naɗi heyaya daaglah. Na baula anambia iinab hemana.

⁹ Na nug eɗidkkutnu dabmettem dayeb amu, dabmak amuam hambuppuak aakkuib. Na anam iinab hemana. Ge, na neegppe ukkeb, doɗ amu anidna, na beɗun bodoetteb, gai-iitta daakkut.

¹⁰ Danab laa nug nukka nug nuhignu, ‘Da am ban danab ɠagattagnab,’ doya, doɗ amu goɗitteb ahakkunu iinab hema, ⌊amge da doɗ amu hemi⌋; anam amunu, aun nug da eɗilkkunu elele? Laa iitta!

¹¹ Auntai laa nug da keeke meɗom amunu, da eɗue, amunu nob nug medakkulnu daatte? Laa iitta; keeke oh hab waappa daatte amu, keeke amu oh am dahilib.

¹² Gemu da lewiatannu tuɗitten madikkul. Nug baeg, eppeg ele am enanag hetteb; nuhig ɠagattag, nug beɗu ele am elelenab daatte.

¹³ Laa nug lewiatan gaɗa hiɗakkunu elelete? Iitta! O iitta, laa nug muɗi awa, hos noobppa hetteb bia, nug muɗi amu lewiatan noobppa qagakkunu nug guguitta gokkute? Iitta!

¹⁴ Auntai laa nug eppegppa heeb, lewiatan nug oɗe aahak daakku? Laa iitta; oɗeppa aeg nau huanak daatteb.

¹⁵ Gomeppa guppiɗ kuɗumnab huu anen anenppa daatteb; ag qataiettaknab daatteb.

¹⁶ Guppiɗ amu oh ag qataiettaknab anam daatteb. Ao, ulah nakok laa ele guppiɗ aɗit gamalahppa gokkunu elele iitta.

¹⁷ Guppiɗ amu qataiettaknab anam daan, laa nug layag ɠagattag aɗatte. Ge, ag anen anen ag ɠagattag anam nug aɗan daaegeg, laa nug laa awa, laa uueb daakkunu elele iitta.

¹⁸ Lewiatan nug le ooppanu ba, ulah le ele noobppanu huana iwale, le bud bia te, aam ye amemɗiag aotte. Nug ameg am, aam beebe, amahlak eppeg doɗo bia tette, ameg amubia amahaltte.

¹⁹ Lewiatan nug le ooppanu ba, ulah iwalele, aab ewak, kahug ele bia gotte. Ao, ulah aab he, aab aeg pitikka tette bia, ulah nug oɗeppanu uɗitte.

²⁰ Ulah nug noobppanu uɗiaya, aab kah bia tette; am waa aab gakkaɗaknab attan daye, le huana hipaɗ qeeqe, omuh ba gotte, amubia.

²¹ Nug le ooppanu ba, ulah iwalele, nug ouɗi am gakkaɗaknab, keeke heeb eokku bia; am aab aɗu doa gotte bia.

²² Nug duug am ɠagattagnab; nug oiyeye, laa oh ag oo uug nau qak dootteb.

²³ Nug teppu oh am ɠagattag; laih gai-iitta laa ii daatte.

²⁴ Nug momo am ɠagattag, men bia; danab nug ee aeg men aɗitppa ganuɗe, kalu nette, nug momo am men laa, laa waappa daatte, am amubia daatte.

²⁵ Doɗ lewiatan nug ahe, danab ɠagattag ag baɗak eheɗ nau dootteb. Ao, nug aha he, boob laih watte, eɗua laih dotte amu, danab ɠagattag ag amu anidna, ag ooltteb.

²⁶ Danab laa qep elabppa makkuɗkkunu hette amu, doɗ nug guittak ii aotte; amubia ele danab laa nug ban diig attenppa ette, o qekkunu lat doɗo ette amu, lewiatan nug guittak laa ii aotte.

²⁷ Danab nug ban, o lat doɗo aenppa hak e, doɗ amu beɗu qe, aen amuam wit keeke gumu bia daatte. Ao, danab nug ban, o lat doɗo brasppa hak e, ban, o lat doɗ amu beɗu qe, bras amuam ad beɗak bia daatte.

²⁸ Danab nug doɗ amu qekkunu lat doɗo ette dayeb amu, doɗ nug lat doɗo antta, baɗa ii ooltte; keeke hamuib dootte. O iitta, danab nug men ketapolppa ewa, doɗ amu qekkunu hette amu, doɗ nug keeke hamunab, ee aeg dappunkkeg beɗu yaakkunu hette bia dootte.

²⁹ Danab nug daɗib aɗa, makkuɗkkunu hette dayeb amu, doɗ amu nug danab amu wit keeke gumu aɗatte bia dootte. Ao, danab nug ban hawaɗppa yaakkunu hette dayeb amu, doɗ nug hamunab, danab nug keeke hamunu imatte bia, nug anam dootte.

³⁰ Nug oo wanppa eɗi noak daatte, oo gaɗa amuppa aeg kuɗum, waa aoɗak maha kuɗum bia daatteb. Ao, anam daatte amunu, nug wan lekkohppa oiyeye, aeg amu wan aɗa ugekke, lekkohppa dottog kobol kobol ele daatte.

³¹ Lewiatan nug mutui ma, le ooppa noa oiyeye, qiɗumɗum bette. Ao, nug le ooppa noa oiyeye, le goɗen hipaɗ qette bia hette.

³² Nug le gaɗappa oiyaya, uub naɗi ugekke, dimugppa uubnu le ippu aam ye, amemɗiag aotte, amubia nug dimugppa daatte; danab nug amu antta, nug, ‘Boobppa he, le hipaɗ qette,’ dootte.

³³ Wanppan keeke laa am lewiatan bia iitta, laa nug ii eɗidtte; nug baɗak laa ii dootte.

³⁴ Aun aɗi laa oh ag dada hena laa eɗittaknu dabmak aotteb amu, nug amu oh dilagnu, ‘Ag keeke hamu,’ dootte. Ao, nug laa oh ag dada danab hetteb bia hetteb amu, nug amu dilag king daatte.” Kayak Nug anam aum.