Job 40 - Nobonob Baibel

¹ Yawe Nug Job amegppa ana mala, Nug tuɗitta aum.

² “Laa nug da, Da Dakka Ɠagattag Oh Ele, nug da ele nai auɗ ona auɗ dotte ele amu, nug da daul ele batakkute? Ge, laa nug da, Kayak, nug da naippa yaaiɗtte amu, nug da mattiminu nob aakku da meɗaɗ!” awa aum.

³ Yawe Nug anam a, Job nug nob ma aum.

⁴ “Da keeke hamu. Da nob na medakkulnu elele iitta. Da oɗel qamut-ttem.

⁵ Da matu nai mattimi, amge da nob baula ii mepa. Genab, da haen aɗit nai mattimi, amge da baula nai ii madipa,” awa aum.

⁶ Job nug anam a, Yawe Nug ulah ɠagattag ooppanu Job amegppa mattia, inam aum.

⁷ “Na ahan, ɠagattag daappe, da na keeke laanu oɗ medakkul. Da oɗ medappi amu, na oɗmak amunu nob da meɗakkut.

⁸ Na da nai doya mala hettoɗia epeɗia elele mettak kobol ii dim lamidttemnu dabmena attemte? Ao, na nakka na hena, genab tutukku hak danab daakkutnu, na da naippa yaaiɗkkutte?

⁹ Da, Kayak, da ɠagattag okkainab ele. Na ele anambia daattemte? Ge, da baalppa nai oqotti okkainab, hakkaɗ qak bia akkulnu elele. Na ele anam bia hekkutnu elele daattemte?

¹⁰ Na anam daattem dayeb amu, na heppe, binag amahlak oppiaawak ele, ɠagattag okkai naɗi ele lamen bia nahip-ppa dayeɗ! Ao, na anam daattem dayeb amu, na laa nug binag ele, aria nug ele dagom onig ɠagattag ele amu, na heppe, amu ele lamen bia nahip-ppa dayeɗ!

¹¹ Na anam daattem dayeb amu, na nau hak oh neegna anidna, bu mettak pehettak he! Ge, na dada danab ohnab neekkadna heppe, ag honap neig!

¹² Genab, na dada danab ohnab neekkadna anadna heppe, ag danab nukka onig qe ne oitte bia dayeg! Ao, na nau hak danab oh ag daattebppa oɗoɗadppe, ag nauheg!

¹³ Na heppe ag mauhna, wanppa niieg! Ge, na heppe, ag moɗppa niieg!

¹⁴ Na keeke amu oh hekkutnu elele daalomlob amu, da ele, da na nagakka ehanidkkutnu ɠagattag elele, ele doyen, da anam alom.

¹⁵ Na doɗ naɗinab laa onig behimot antte! Da na, nug ele oh hatmi. Doɗ amu nug makau okkai ebehi ele gikkiɗah latte bia gikkiɗah latte.

¹⁶ Ɠagattag naɗinab nug baegppa daatte. Ao, nug beɗu, amuppa ɠagattag okkainab daatte.

¹⁷ Nug boob ad sida ulah awa ukke, eɗua dotte bia hette; nug tuɗi am hoh okkai akkak bia.

¹⁸ Nug ebehi am brasppa hak bia. Ge, nug baeg ebehi am aenppa hak bia.

¹⁹ Da Kayak, da nug doɗ laa oh eɗattak hemi, amge da, da nug hemi amu, da nug qep elabppa qeppi mauhkkunu elele.

²⁰ Nug qauko nakokppa ee lanan daatte amunu, doɗ dakkuɗ laa oh ag appa qiɗ henan daatteb.

²¹ Nug ad lotus waappa niitte; qao ɗuppa daatteb, appa nug nukka lokkumidtte.

²² Nug ad lotus waappa niieye, lokko amu nug tonatte. Ao, nug ad popla, lenag daugppa huanak daatteb amu, nug amu waappa dayeye, ad popla kuɗum nug talilidna daatteb.

²³ Le ui o, nug doya, ottaia ii baɗatte. Ge, Jodan le ui ob, le huanak nug oɗeppa ukkeb, nug ɠagattag doya daalo; eheɗ laa ii doolo.

²⁴ Laa nug behimot ameg beha heeb nauheb, doɗ amu aɗakkunu elelete? O iitta, laa nug pelemppa awa, nug noob atula, huk ma, muɗippa qakka, awa gokkute? Amu oh am iitta.” Yawe Nug anam awa aum.