Job 4 - Nobonob Baibel

Elipasnu nai tatamnu

¹ Job nug anam mattia male, Teman danab Elipas nug oɗeppa awa aum.

² “O gadon, laa nug na amenppa nai laa madikku dayeb amu, na bahin yaakkute? Amge nahip nai nob maknu amu, auntai laa nug amu ii helo elelete? Iitta. Nob mekkuoitte!

³ Na heppe, danab ah kuɗum na ehanadnana, ulum nai ena mattame dautppa doaɗ! Ge, danab ah kuɗum ag gai-iitta daaegeg ehanatte, eɗun ɠagattag daappig ele dautppa doaɗ!

⁴ Haen kuɗum na laa ag nena qekkulagnu heegeg, na nai ena matte, ag nena ii qeppig. Ao, na laa ag danab gateg nau ele oikkunu haaha, elele iitta dootte bia daan ehanatte, ag ehanittak nahip amuppa ɠagattag aon daappig.

⁵ Na ag anam ehanadme, amge gemu uug laa nahip-ppa be, nahip dabmak am qe nak daatte. Yo, uug amu na nitte, na oot uug nau qak daatte.

⁶ Na ebehin oh Kayaknu bodoetta le mette amunu, na qinob Kayak eɗua ehanitteb, na ena daakkutnu dabmak aɗan oikkutnu elele iittate? Ao, na Kayaknu neekkakppa danab ooppa kaliak laa iitta ele daattem amunu, na eɗun, ena bekkutnu dabmak aɗan oikkutnu elele iittate?

⁷ Na imuam dabmekkutoitte. Laa nug beɗuppa genab aab iitta ele amu, nug hamu mauhkkute? Ge, genab tutukku hak danab adekkutai nug kekeɗ heeg nauhomte? ⌊Dahil dabmakppa am iitta.⌋

⁸ Da neekki ukke anidttem am iikku. Danab aɗi aeg ebatte, nug meu anamib aotte. Anam amu, amubia danab nug eheɗ hette, nug eheɗ hak nuhigppa meu nau aotte. Ge, amubia laa nug hipunin haaha daatte amu, nug hipunin hak nuhigppa meu nau aotte.

⁹ Kayak Nug ouɗi nakokib ahilagppa iwale, danab nau hetteb ele ag nauhtteb. Ge, Nug ahilagnu oo nauhak doya he, ag mauhtteb.

¹⁰ ⌊Danab nau hetteb ele ag am laion bia.⌋ Laion ag doɗ ɠagattag, ag baalagppa liɗimtteb, oɗelagppa ele gaatteb, amge laion bau, ag ele nauhtteb.

¹¹ Doɗ laa, laion anig nug aqa lakkunu ii daatteb dayeb amu, laion nug mauhe, laion nakkud tamtam gona daatteb, ⌊amubia danab nau hetteb ele, ag nauhtteb⌋.

¹² Anam amu, laa nug lokkumakppa nai laa da amelppa a doomi. Yo, da daulppa otiptip-ppa keeke amunu nai nakok doomi.

¹³ Tuqan danab huana niitteb haenppa, haen amuppa da tul niimi. Da tul niimi, amge tul niiak amuppa da oolppa maɗoɗ ii doyeye,

¹⁴ da baɗak okkai, naunab dooiyi he, da ebehilad oh hahaɗom.

¹⁵ Da ebehilad hahaɗeɗe, ouɗi ulah bia, da noolppa ukkom. Ao, nug ugekke, da gaɗemal huana ahom.

¹⁶ Ouɗi ugakka, baeg ya dayom, amge da neekki ukke, pehettak anidkkulnu elele iitta daami. Ao, keeke dottog miag atiak iitta bia aakkuib andette dayeye, da baag doomi, amge baag am nakoknab, otiptip-ppa mattiom.

¹⁷ Nug mattiaya inam aum. ‘Danab nug ah ooppanu doum ele amu, nuhig genab tutukku hak am Kayaknu genab tutukku hak eɗidkkunu elelete? Ge, danab nug ah ooppanu doum amu, oppia dayak nuhig am Kayak, nug heum ele amu, am nuhig oppia dayak eɗittak daakkunu elelete?

¹⁸ Kayak Nug nuhikkud maɗi nid, amuam nuhikkud engel amu, Nug ag amelagppa, “Ag eheɗ laa aib heppig,” atte, amge Nug ag genabnab genab amu hekkulagnu ooppa genab ii dootte dayeb, ge, Nug nuhikkud engel ag eheɗ hettebnu naippa yaaladtte dayeb amu,

¹⁹ genabnab genab nug danab dilagnu anam doya hekku. Danab dilagnu amu, Nug ag gappudppa hattom. Danab dilagnu amu, ag diilag gappudppa daatte. Danab dilagnu amu, ag am qagapuɗ, laa nug uɗat okkai ii haaha, qagapuɗ he nauhtte, ag qagapuɗ amubia daatteb.

²⁰ Danab ag anilkad oolagppanu dona, haen elab iitta ag nauhtteb. Yo, ag nauheg, laa ag ii dabmetteb.

²¹ Danab nug peh nuhig awa ukka, laih mekkunu peh taiettaknu tutuɗ wanppanu hiɗa aotte, amubia danab ag anilkad oolagppan dona, eɗun iite mauhtteb. Ge, ag doyak dabmak ena ele iitta iite mauhtteb.’