Job 39 - Nobonob Baibel

¹ Na meeme dakkuɗ haen ganeb nag menutte doottemte? Ao, doɗ dia nag menuewe, na neegna anidttemte?

² Doɗ dawai anig papaleb, kalam gane ukkeb menukkunu daatte na ebqettemte? Ge, haen ganeb doɗ amu anig menukku amu, na doottemte?

³ Doɗ amu ag nalkad menuadkkulagnu ag bitolkad qeeg ne, nalkad menuadtteb; ag menuatteg, guattak aakku iitta mette.

⁴ Ag nalkad menuatteg, nalkad ag dona, atuppa okkai mena, ɠagattag aon oitteb; nalkad amu ag anilkad uuadna oinna, eɗun ii uɗitteb.

⁵ Anukka donki dakkuɗ ii daappig, mananib, amge aun he, gemu ag dakkuɗ hamu qagattak iitta daatteb? Ge, aun ag anam daaglagnu uhuqattom?

⁶ Da donki dakkuɗ ag wan meu waknu nakokib elele, ag amuppa daaglagnu aben amu ag mattami. Ao, da aben keeke kuɗum ii betteppa, ag amuppa daaglagnu aben amu ag mattami.

⁷ Donki dakkuɗ ag aab okkaippa muttub qak huanak eleppa daaglagnu eheɗ doon, ii daatteb; laa nug donki dakkuɗ uɗat nakok laa ii madatte.

⁸ Ag qauko nakokppa daan, ee anidna lakkulagnu oitteb; ag aɗi keeke bau bette anidna, aon lakkulagnu maditteb.

⁹ Makau okkai ebehi ele dakkuɗ laa, nug uɗia, nahip uɗat hekkunu oo hekkute? Ge, nug tuqan ee mettak tappiɗ daugppa dayaya, butti eɗua nahip uɗat hekkute?

¹⁰ Na wagai mena, wan buuaknu keekenu muɗi nuhigppa qagappe, nug eeɗebeb, wan buukkutte? Ge, nug na dim lamitta, wan buuaknu keeke eeɗebeb, wan buukkute?

¹¹ Makau okkai ebehi ele dakkuɗ am ɠagattag okkainab ele amunu, na ɠagattag okkai amuppa nahip uɗat heppe, ha malakkunu dabmekkutte? Ge, na nug uɗia hekkunu, na nahip uɗat uug ele uukkutte?

¹² Na doɗ amu nug nukka nug ee aeg nahip dattanu awa uɗia, na medakkunu ootppa genab dookkutte? Ao, nug nahip ee aeg awa uɗia, nahip ee aeg mumuɗaknu abenppa mekkute?

¹³ Ai okkai ostris nug gamag ahak doyaya, haug papaɗtte; nug amu hette, amge nug stok hagagaɗa gotte bia ii hette.

¹⁴ Ostris nug oppa mekkunu wan ooppa mette. Ao, makkulkkunu nug oppa ihi ooppa me dayeye, ihi gakkaɗak medatte.

¹⁵ Nug doɗ laa uɗia, tappeb aoɗkku, o iitta, nug amu ii dabmette. Ao, nug doɗ dakkuɗ laa tabakkutai am ii dabmette.

¹⁶ Ostris nug nakkud dilag dab-ii-mette; doɗ laa nakkud dilag dootte bia ii hette amunu, guittak aoglag, o iitta, nug dab-ii-mette. Ao, nug oppa mak uɗat heum, amge amu meu okkute, o iittate, nug amunu dabmak laa ii aotte.

¹⁷ Aɗinu nug anam hette? Da Kayak, da doyak dabmak ena ele ii mettami; da doyak doɗ laa oh mattai oitteb ele, da doyak amu nug ii mettami.

¹⁸ Da amu ii mettami, amge haen nug qaietta gokkunu ha, nug haug taiedatte amu, nug danab hos attan paha gotte, nug danab, hos amu ele eɗat-tte.

¹⁹ Hos amu, nate hee, hos ag ɠagattag okkainab ele daatteb? Ge, nate hee, hos duugppa uɗig enanag daatte?

²⁰ Nate hee, hos ag tap-lokus ooltteb bia oolkkulagnu elele daatteb; Ao, nate hee, hos ag huana hiɗapna heeg, danab ah ag eheɗ nau baɗatteb?

²¹ Bannu hos amu, ban danab nug qaɗeppa dayeye, hos banppa gokkunu dayaya, nug ɠagattag okkai ele doya, gamag ahe, nug qeɗ awawa, wan eppegppa haɗatte. Ao, nug amu he, ⌊ban danab okkai nug banppa ukkaknu e,⌋ hos nug huanaknab qaietta, banppa gotte.

²² Hos nug keeke laanu ii baɗatte; danab nug keeke laa antta imatte, nug baɗaknu keekenu amubia hette. Ge, ban danab laa nug qep elab aɗa, hos amu, o ban danab nug qaɗeppa daatte yaakkunu heehe, hos nug baɗa ottaia, laih ii gotte.

²³ Ban danab nug hos qaɗeppa daatte amu, nuhig ban hak keeke mawe, uɗalele, oqotti otte; ban gudkkud, o ban hawaɗ, ban danab aɗatte amu, ban amu ikki aam ye, amemɗi aotte.

²⁴ Keeke amu oh he, hos nug oo huanaknab ahe, qaiettaknab gotte. Ge, ban danab laa nug daup ag gona, ban hekkulagnu trampet ele iwaltte amunu, hos nug hamu, baeg ya toetta daakkunu elele iitta.

²⁵ Ban danab laa nug daup ag ban hekkulagnu trampet iwale, hos nug huana hiɗaptte. Nug noob oɗeppa ulah eeɗa, ban abenppanu danab tiig, o doɗ tiig keeke, nug amu uɗig dootte. Daup dilag okkai ag ahilkad daup aɗi aɗi hekkulagnu eegeg doya, danab ban haknu ewak ele eegeg doya, ⌊hos nug gamag ahe, banppa daakkunu ii baɗa, qaietta, huana gotte⌋.

²⁶ Ai kihkih amu, nate na nahip doyak dabmak ena eleppa hee, nug hagagaɗa oikkunu dootte? Ao, nug deɗ laa yau uɗitteppanu gokkunu dootte amu, nate hee, nug amu dootte?

²⁷ Nate ai igel nug hekkununab ae, nug attan hamu hamu hagagaɗtte? Ge, nate hekkununab ae, nug teɗ aben attannab, aguppa qa mette?

²⁸ Nug teɗ bai okkaippa ha, appa dayaya, tuqan ele appa niitte; nug bai igippa teɗ ma, appa aɗi doɗ laa heeb nauhkkunu am iitta.

²⁹ Nug teɗ bai okkai igippa daatteppanu doɗ laa antta na, qeeb awa lakkunu neegtte; nug umanab appanu neekke ukke, anidtte.

³⁰ Ai igel nug doɗ antta qe, nakkud ag doɗ ⌊teppu,⌋ tiig eleppa hobul hena latteb; ai igel nug adeppa doɗ laa qeum amu, nug appa aakku daatte.” Yawe Nug Job amegppa anam aum.