Job 38 - Nobonob Baibel

Yawe Nug digma, Job amegppa nai mattiom

¹ Elihu nug nai amu mattia male, Yawe Nug ulah ɠagattag ooppanu Jobnu nai am nob ma, Nug mattia aum.

² “Laa nug nai doyak iitta ele mattiaya ha, dahil ulum nai gatatuppa tonom daatte amu, laa amu nug aun?

³ Na ahan, ɠagattag daappe, da na keeke laalanu oɗ medappi, na oɗmak amunu nob da meɗakkut.

⁴ Da wan daakkunu ukku bappaidmi amu, na haen amuppa adeppa daame? Na da amu attem attem hei beum doottem dayeb amu, na appe dookkul.

⁵ Aun nug wannu okkai attem daakkunu dabma, at meum? Na amu doottemte? Ge, aun nug melemel meum?

⁶ Aɗi keeke wan mawa daatte? Aun nug mawaknu keeke amu anuqak abenppa meum?

⁷ Haen laa amu heum amu, haen amuppa hoɗoppai buttuanab amahaltteb ele, ag ahi ettaeg, engel ele ag gamag ahak naɗinab doon eppig.

⁸ Haen yu digma, nid anig ooppan dimittim dotte bia beum amu, aun nug yu nuhig tom eɗidmanu tom amu meum?

⁹ Da, Yawe, da yu, nuhig tom ele hemi, amu haen da amu heinne, da bud naɗi yu amu tonakkunu hemi. Ao, da bud teppu ele yu tonakkunu ai, anam dayom.

¹⁰ Da Yawe, da yu nuhig abenppaib daakkunu aakku tom memi. Ao, da hei, tom amuam od, odnu manak qaknu keeke ele, am amubia dayom.

¹¹ Haen da amu oh hein, da yu amegppa ami. ‘Na iikku batak uɗikkutnu elele. Tom imu amu, na ii eɗidmana. Ao, nahip duban am ɠagattag okkai ele, dada danab daatte bia daatte, amge aben imu ii eɗidma.’ Da amu ai, anam dayom.

^12-13 Job, nau hak danab ag tuqan hak nau ahilag tuɗidna hemananu na deɗ laa ae, wagkkaɗomte? Ge, na ae, aam digma mappatomte?

¹⁴ Wakkaɗebeb, danab nug wan iɗu attem daatte anidtte. Ao, wakkaɗebeb, lamenppa kobol kobol daya miag atitte, amubia wan iɗu miag atitte

¹⁵ Anam amunu, nau hak danab ag ⌊ahilag uɗat uutteb⌋; ag tuqan, gatatu ele ahilag hak nau kuɗum hetteb, amge aam be, ag ahilag gatatu manak aakku daatte. Ao, da hei, aam ba, wan amahlak medatte amunu, nau hak danab ag ahilag hak nau hekkulagnu elele iitta; danab eppeg qiiom bia.

¹⁶ Job, na deɗ laa oin gona, yu ooppa le qeppuɗia betteppa oimete? Ge, na yu unuqag, appa tappan gomete?

¹⁷ Laa nug omaitta ukka, mauhak abennu od ippunittomte? Ao, na mauhak aben, aben amuam lokko ele, na aben amunu od anidmete?

¹⁸ Amu wan am naɗi okkai ele; na amu oh dabmena, elele doomete? Na amu oh doottem dayeb amu, na appe dookkul.

¹⁹ Na amahlaknu dayak abenppa ukkaknu ib doottemte? Ge, na gatatunu dayak aben adeppa daatte doottemte?

²⁰ Na amahlak, gatatu ele omalatna, aa anen anen daattep-ppa gokkutnu elelete? Ge, na aa laulahppa ukkaknu ib doottemte?

²¹ Na anukkanab na anin ooppanu nena, wanppa daamete amunu, na keeke amu doolom? Ao, nahip wanppa dayaknu maɗ am kuɗumnabte amunu, na keeke amu oh doolom?

²² Na aben laa sno nekkunu aguppa qagmak daatte amu, na aben amuppa wana oimete? Ao, na aben laa ais doɗo nekkunu aguppa qagmak daatte amu, na aben amu anidmete?

²³ Da sno, ais doɗo ele aa ban haenppa uɗat matakkulnu anam daaglahnu ai daattep. Ao, da ai, aa ban haenppanu anam daattep.

²⁴ Amemɗi adeppanu digma, amuppanu ya uɗitte amu, na aben amuppa ukkaknu ib doottemte? O amu iitta, kaɗag adeppanu digma uɗia, wanppa aben adekku adekku iwaltte amu, na aben amu doottemte?

^25-27 Laa amu, atu taɗakppa, danab ii daattebppa, ge, atu taɗakppa, auntai laa appa ii oittebppa, appa aun nug gu huana nekkunu ib bappaidtte? Ao, appa aun nug lombig hinqak gokkunu ib bappaidtte? Genab, aun nug atu hele-ettakppa, wan meu waknu nakokib elele, nug appa he, wan leppu ele aotte? Yo, appa aun nug he, gikkiɗah appa bette?

²⁸ Aun nug gu mameg daatte? Ge, aun nug baito mameg daatte?

²⁹ Aun nug ais anig daatte? Ge, oug haenppa bud ad uɗugppa keeke, ais mette, aun nug amu anig daatte?

³⁰ Aun nug he, le gottu ɠagattag, menbia ebatte. Ge, aun he, yu gaɗa ais ma, ɠagattag daatte.

³¹ Hoɗoppai ag ameg anen anenppa daatteb. Laa onig Pledes. Na hoɗoppai amu ag anam qagmak daaglagnu appe daaglagnu elelete? O iitta, hoɗoppai ameg laa am Orion amu, na heppe, hoɗoppai amu ag qagmak amuppa ii daamnanu elelete?

³² Hoɗoppai huu mak haenppa miag atitte ele, na heppe, ag haenppa miag atiglagnu elelete. Ao, na hoɗoppai huu mak laa onig bea, na nug nakkud ele omaladppe, habppa oiglagnu elelete?

³³ Ɗo daaegeg, hoɗoppai, aam, kalam ele ag attem attem gotteb amu, na ɗo amu oh doottemte? Ao, aam, kalam, hoɗoppai ele ag wannu attem attem hetteb amu, na appe, ag amu hekkulagnu elelete?

³⁴ Na baat okkaippa appe, lombig ag dooppeg, gu okkai nahip-ppa nekkute?

³⁵ Na ae, amemɗi aha, laih amahalttete? Ao, na ae, amemɗi ahan uɗin, ‘Ig iikku daattem. Attem hekkunignu daatte amu, na appe dootu,’ attebte?

³⁶ Aun nug doyak dabmak ena ele danab oolag unuqagppa meum? Ge, aun nug diignu doyak tutukku danab dilag dabmakppa meum?

^37-38 Haen wan gappud qagma, ɠagattag ebatte, ge, haen wan le iittanu ɠagattagnab ebatte amu, aun laa nug lombig elele daaglagnu doyak dabmak ena ele nuhigppa heeb dokkulagnu elele? Ge, aun nug heeb, gu nekkunu elele?

^39-40 Laion nakkud ag teɗppa ee aon lakkulagnu daaegeg, o iitta, ag aben ad naunau keeke huana daattebppa ee aon lakkulagnu lokkumna daaegeg, diig amunu na anilagnu doɗnu makkaɗna oittemte? Ge, diig amunu na nakkud amu dilag ee aon madattemte?

⁴¹ Laa amu, ai alɗal anig, haen nug nakkud ag da Kayak, da dookkulnu, ag eenu gaan, ee iittanu beɗulkad gai-iitta daatteb amu, aun nug ee ag anilag medatte?