Job 37 - Nobonob Baibel

¹ Kayak he, hakkaɗ qak huanak qette amu, da oqotti amu dooi, gamalppan uttu taub dahil huanak qutu qutu edatte. Da doyen, da eheɗ ottaittem.

² Kayak baag am hakkaɗ qak bia; na daut human doye! Ao, Kayak nai mattieye, mattiak nuhig am hakkaɗ qak uma umanu uɗie, danab dootte bia; na daut human doye!

³ Nug he, amemɗi hab waappa aben ohppa gotte; Nug he, wan batakppa gotte.

⁴ Amemɗi awe, dim hakkaɗ qette, amuam Kayak baag bia. Ao, hakkaɗ qak okkai he, oqotti okkainab o, danab ag ebehilag oh bodoetta le mette amubia Kayak nai mattie, danab ag ebehilag oh bodoetta le mette. Amemɗi awe, hakkaɗ qe, oqotti uma uma gotte, amubia Kayak nai mattie, mattiak amu wan atu ohppa gotte amunu, danab ag Nug baag dootteb.

⁵ Kayak Nug baagppa nai mattieye, keeke enanagnab, danab dookkunu elele iitta betteb. Ao, Nug a, keeke ig diignu doyak tutukku aognignu elele iitta aakku betteb.

⁶ Nug a, sno aakku wanppa nette. Ge, Nug a, gu naɗi okkai ele wanppa nette.

⁷ Nug danab oh, Nug ag hattom amu, Nug ag ahilag uɗat uun, ag nuhig hak anidna dabmekkulagnu anam hette.

⁸ Kayak Nug nuhig hak okkai amu he, doɗ ag gu keeke aqamanu ag dimittim, hamu ii daatteb; ag ahilkad teɗppa gona daatteb.

⁹ Kayak he, ulah daatteppanu uɗitte. Ao, Nug he, ulah huana uɗie, danab ah oug aqatte.

¹⁰ Kayak he, oug nau daye, le eɗua, ais daatte. Genab, Kayak he, le gottu naɗi qaɗeppa aisib daatte.

¹¹ Kayak he, le lombig ambak daye, amemɗi huanak ele lombigppa daatte.

¹² Lombig anam daaegeg, Kayak Nug ag aɗi hekkulagnu, ag adeppa adeppa gokkulagnu haknunab a, ag aakku hetteb.

¹³ Ge, Nug lombig anam anam hekkulagnu haknunab attenu diig laa am, Nug danab ah eheɗ heppignu bu madakkunu hette. Aria, diig laa am, Nug wan leppu medakkunu, Nug oo mauhaknab kobol nuhig miag daakkunu hette.

¹⁴ Job, na daut human, nai dahil imu doye! Na toettan daan, Kayak Nug kobol danab hekkunu elele iitta hette amu, na uɗat amu oh dabmenan daye!

¹⁵ Job na Kayak attemnab he, lombig ag Nug oo hette aakkuib dim lamidtteb doottemte? Ge, Nug attemnab he, amemɗi awa, wan amahalidtte na doottemte?

¹⁶ Na lombig, ag am keeke enanag, laa Nug keeke oh dootte ele babaittom amu, na lombig ag habppa aihak attem daatteb doottemte?

¹⁷ Job, ⌊na danabib daattem⌋. Ulah yau, ulah amuam gakkaɗaknab, ulah amu uɗia he, wan toetta dayeye, na amunu gakkaɗak nau doyeye, heɗi eheɗ nidatte.

¹⁸ Na anam daattem amunu, na Kayak ehanidppe, Nug hab taiedakkute? Ao, na ehanidppe, Nug hab taietteb, hab ɠagattag, keeke brasppa hak bia anam daakkute?

¹⁹ Ig laa oh ig gatatuppa daattem, ig Kayak amegppa ihinig nai bappaidta madipput dookkunu elele ii doottem, amge na nakka, na amu hekkutnu elele doottem amunu, na ippunigppe, ig amu hetu!

²⁰ Laa Nug dahilnu Kayak amegppa, ‘Nug na amenppa nai ab dookkutnu oo daatte,’ akku am enate; danab laa nug anam ha, nug uug iite anidma?

²¹ Aam nug hab attan amahalala daakku, amge bud teppunab ele dayeb, danab laa aam ii anidma. Amge ulah uɗia, bud yeeb ukka maleb, danab nug neekkeb ukkeb, aam huanak neeb anidkku.

²² Yawalti uɗia ye, bud ukka male, danab aam anidna, ⌊enanag dootteb⌋. Ao, Kayaknu amu, nuhig ɠagattag okkai naɗi ele, danab nug antta, nug ebehi oh bodoetta le mette.

²³ Laa Nukka Ɠagattag Oh Ele Nug ig eɗikka auta autanab aotte. Nug nuhig ɠagattag am okkainab ele. Nug nai doya mala hettoɗia epeɗia elele mettak kobol ele hanhan dim lamidtte. Nug aɗi hette ele amu, Nug genab tutukku hak kobolppaib hette amunu, Nug danab laa diig iittappa bu ii medatte.

²⁴ Kayak Nug anam hette, diig amunu danab ag nuhignu ebehilag oh bodoetta le mette. Auntai laa ag akka, ag ahilagnu, ag am danab doyak dabmak ena ele dootteb amu, Nug ag binalag ii mette.” Elihu nug anam mattia aum.