Job 36 - Nobonob Baibel

¹ Elihu nug anam mattia mala, nug nai tuɗitta aum

² “Job, da baula nai madippi, na oot aib nauhom. Ge, da mattien, da Kayak eheɗ laa ii hette ele ippunidkkul.

³ Da dahil doyakppanu ig madittemnu doyak oh dahil, da amu naippa ippunidkkul; da Kayak Nug hanhan nai doya mala hettoɗia epeɗia elele mettak kobol aakkuib dim lamidtte ippunidkkul.

⁴ Genabnab, nai dahil am nai genab, hambuppuak laa ii daatte amunu, ⌊amuam⌋ laa doyak oh ele ina daatte ⌊ippunigtte⌋.

⁵ Kayak Nug ɠagattag okkainab ele, amge Nug danab dilagnu ena iinab doyak ii dootte; Nug am ɠagattag ele, amu Nug aɗi hekkunu dabmette amu, Nug aakku hette.

⁶ Nug he, nau hak danab ag bau ii daatteb; Nug laa ag onilag, enulag ele iitta, Nug ahilagnu nai doya mala hettoɗia epeɗia elele mettak kobol dim lamidtte.

⁷ Nug genab tutukku hak danab hanhan dabmadatte. Ao, Nug he, ag king ele sia kingppa daan, ag danab okkai hanhan daatteb.

⁸ Amge danab ag qagaiettak daatteb; oɗe keeke hippalatte daatteb amu,

⁹ Kayak Nug ag aɗi eheɗ heppignu ippunadtte; Nug ag dada kobol hena, hipunin heppig a dootteb.

¹⁰ Kayak Nug ib laa oh keldo, ag ib laa iitta, ag nuhig daug batak nai dootteb. Ao, Nug ag oolag eɗueb, baula eheɗ ii hemananu ag amelagppa haknunab nai amu atte.

¹¹ Nug anam he, ag Nug waappa daan, Nug oɗe dim lamidna hetteb dayeb amu, ag haen amuppa eɗun, bau dayak laa oh ahilagppa daatte amu, ag haen amu oh ena daatteb. Ao, ag ahilag maɗ laa oh daatteb amu, ag maɗ amu ohppa ag maɗoɗ ele daatteb.

¹² Amge Kayak Nug ag daulag bate, ag dooglagnu uutteb dayeb, ag qep elabppa mauhkkulag. Ao, ag doyak iitta ele mauhkkulag.

¹³ Danab ag Kayaknu nuhig haknu ele uuak dootteb amu, ag oolagppa oo aeg bak ambak daatte; Kayak ag dabmak eɗuglagnu dabma, amunu qakkaladtte amu, haen amuppa ele ag amu dabmenana, Nug ag ehanadkkunu onigppa ii etteb.

¹⁴ Danab amu ag nid bau daan, ag mauhtteb. Ao, ag danab bau kayak hambuppuak dilag mettid lag nakokppa danab laa ah ele niitteb bia danab danab ele niitteb, ag ag ele daan, paha mauhtteb.

¹⁵ Laa Kayaknu daug batak dooglagnu uutteb ele, ag anam mauhtteb, amge laa ag akka ag onilag qeeg ne oitteb amu, ag guittak doyegeg, Kayak he, ehanittak aotteb. Ao, Kayak Nug he, ag uug nau ahilagppa daan, ag doyak tutukku aotteb.

¹⁶ Anam amunu, Kayak Nug na uug nau daattemppanu gemu ehanidkkunu hette. Ao, Nug ehanitteb, na enanag, uug iitta daakkutnu hette. Am genab, Nug ehanitteb, na eɗun ena daan, na nahip balalppa daan, ee digdig enanag amuppa aon lakkutnu hette.

¹⁷ Gemu amu, na nau hak danab dilag bu aqak waappa daattem. Ao, Kayak Nug nai doya mala hettoɗia epeɗia elele mettak kobol dim lamitta haaha, bu na aottem aakku medatte,

¹⁸ Am laa nug na nuhig dabmak dim lamidkkutnu en okkainab medakkunu ab, diig amunu na amu aib dabmeme. Ge, laa nug na Kayak dimedappe, nug na lokkumakppa eheɗ haknu ehanittak okkainab medakkunu ab, diig amunu na dabmak amu aib dim lamidme.

¹⁹ Nahip en okkainab ehanittebeb, na uug nau ii anidkkutte? Ao, na nakka ena daakkutnu uɗat okkainab heme amu, uɗat amu oh uug nauppa daamnanu ehanidkkute?

²⁰ Na mauhkkutnu deɗ laala ame. Baula aib ame! Mauhak abenppa na aɗi keeke ena laa ii aomna.

²¹ Gemu na uug doomnanu, na kobol eheɗ hekkutnu oot daatte bia, na amunu dabme! Na kobol eheɗ hekkutnu dimette!

²² Kayak Nug ɠagattag oh ele amunu, Nug onig okkai ele; ippunittak danab laa Nug bia laa ii daatte.

²³ Auntai laa nug Kayak ib attem dim lamidkkunu ippunittom? Laa anam iinab ippunittom. O iitta, auntai laa nug tutukku mattia, Kayak amegppa, ‘Na eheɗ heme,’ mattiom. Laa nug anam iinab mattiom.

²⁴ Laa ag Kayak heumnu binag menana, ahi edappig amunu, na ag ele anamib hekkutnu dabmenan he!

²⁵ Danab ah ohnab ag Kayaknu uɗat amu anidna malappig; danab ag umanab daan, neekkeg ukke, anidtteb.

²⁶ Kayak Nug keeke laa oh eɗattak; ig danab ig nuhig ɠagattag, Nug binag, onig okkai ele, ig amunu diignu doyak tutukku aognignu elele iitta. Ao, Kayak Nug hanhan daatte; laa nug maɗ nuhig ebaqakkunu ele iitta.

²⁷ Kayak Nug he, le wanppanu ta, lombigppa daatte; Nug he, le amu lombigppanu eɗua, wanppa nette.

²⁸ Anam amu, diig amunu gu huanaknab lombigppanu nette; gu elele danab ah ele aqadtte.

²⁹ Aun laa nug Kayak he, lombig ag attan daattebnu diig doottete? Ao, aun laa nug Kayak he, hakkaɗ huanak hab attannu nettenu diig doottete?

³⁰ Job na Kayak he, amemɗi habppanu na, yu ooppa amahlak ele daatte antte!

³¹ Kayak Nug he, gu wanppa ne, amuppa ee wanppanu ba, wan atu oh danab ah ee madatte. Ao, Kayak Nug ib amuppa danab ah ee okkai madatte.

³² Kayak Nug amemɗi gumatte. Ao, Nug amemɗi aben adeppa aokkunu dabmaama a, aben amu aakku amemɗi aotte.

³³ Nug he, hakkaɗ qe, ulah, gu ele nekkunu hette danab ah ippunadtte. Yo, makau ele ag gu nekkunu doon, ahilag hakppa, danab ah ippunadtteb.